अन्तरिक्षमा स्टेशन बनाउन चीनद्वारा रकेट प्रक्षेपण- विश्व - कान्तिपुर समाचार

अन्तरिक्षमा स्टेशन बनाउन चीनद्वारा रकेट प्रक्षेपण

एजेन्सी

बेइजिङ — चीनले स्थायी अन्तरिक्ष स्टेसन निर्माण गर्ने महत्वाकांक्षी कार्यक्रमका लागि आवश्यक सामग्रीको केही अंश बिहीबार प्रक्षेपण गरेको छ ।

तस्बिर : रोयटर्स

स्टेसन निर्माणका लागि अन्तरिक्ष यात्रुहरूको बासस्थान रहने ‘तिन्हे’ अंश वेनचाङ् अन्तरिक्ष प्रक्षेपण केन्द्रबाट ‘लङ मार्च–५बी’ रकेटमार्फत बिहीबार प्रक्षेपण गरिएको हो । चीनले सन् २०२२ सम्ममा अन्तरिक्षमा आफ्नै नयाँ स्टेसन सञ्चालनमा ल्याउने बताइसकेको छ ।

अहिले अन्तरिक्षमा एक मात्र स्टेसन छ । उक्त अन्तर्राष्ट्रिय अन्तरिक्ष स्टेसनमा चीनलाई सहभागी गराइएको छैन । अन्तर्राष्ट्रिय अन्तरिक्ष स्टेसन सन् २०२४ मा बन्द हुने बताइएको छ । त्यसपछि अन्तरिक्षमा चीनको मात्र स्टेसन हुने सम्भावना छ ।

अन्तरिक्ष अन्वेषणसम्बन्धी कार्यमा अमेरिकी र रुसको तुलनामा चीन निकै पछाडि छ । चीनले सन् २००३ मा मात्रै अन्तरिक्षमा आफ्नो पहिलो यात्री पठाएको थियो । अमेरिका र रुस (तत्कालीन सोभियत संघ) ले त्यसभन्दा निकै अघि अन्तरिक्षमा यात्री पठाएका थिए ।

चीनले हालसम्म परीक्षणका रूपमा अन्तरिक्षमा पठाएका दुइटा स्टेसनमा छोटो समयका लागि यात्रीहरू रहन सक्छन् । तिन्हे स्टेसन अन्तरिक्षमा कम्तीमा १० वर्ष सञ्चालनमा रहने चिनियाँ अधिकारीको भनाइ छ ।

पृथ्वीबाट ३४० देखि ४५० किलोमिटरको दूरीमा रहने स्टेसनका लागि चीनले कम्तीमा अन्य १० वटा अंशहरू पठाउने जनाएको छ ।

यसअघि चीन र रुसले संयुक्त रूपमा चन्द्रमाको सतहमा अन्तरिक्ष स्टेसन बनाउने घोषणा गरेका थिए । अन्तरिक्ष कार्यक्रममा ठूलो खर्च गरेको चीन सन् २०१९ मा चन्द्रमाको पछिल्लो भागमा मानवरहित यान पठाउने पहिलो देश हो ।

प्रकाशित : वैशाख १६, २०७८ २२:०७
प्रतिक्रिया
पठाउनुहोस्

भारत आइपुग्यो बेलायतको सहयोग

- पछिल्लो समय अनियन्त्रित बनेको कोरोना भाइरसको महामारीसँग जुध्न भारतलाई अमेरिका, बेलायत, ईयूलगायतले आपत्कालीन सामग्री सहयोग गरेका हुन्
एजेन्सी

नयाँदिल्ली — भारतमा पछिल्लो समय अनियन्त्रित बनेको कोरोना भाइरसको महामारीसँग जुध्न बेलायतले गरेको सहयोग पहिलोपटक नयाँदिल्ली आइपुगेको छ ।

भेन्टिलेटर र अक्सिजन उपकरणलगायतको बेलायती सहयोग मंगलबार दिउँसो भारत आइपुगेको हो । संक्रमण तीव्र रूपमा फैलिएपछि भारतमा पछिल्ला दुई सातायता अक्सिजन, आईसीयू बेडको चरम अभाव भएको छ । अधिकारीहरुले अझ धेरै अक्सिजन तथा भेन्टिलटरको आवश्यकता रहेको बताएका छन् ।

एक स्वास्थ्य सल्लाहकारले १ अर्ब ३० करोडभन्दा बढी जनसंख्या भएको देशका लागि बेलायतको सहयोग समुद्रमा पानीको थोपासरह भएको प्रतिक्रिया दिएका छन् । बीबीसीसँग कुरा गर्दै जरिर उद्वादियाले मुम्बईका अस्पतालहरुमा अक्सिजन तथा भेन्टिलेटरको अभावमा मानिसहरु छटपटाइरहेको देखेको बताएका छन् ।

भारतीय प्रधानमन्त्री नरेन्द्र मोदीले सोमबार अक्सिजनको अभाव पूर्तिका लागि सबै जिल्लामा अक्सिजन प्लान्ट स्थापना गरिने ट्वीटरमार्फत जनाएका छन् । पछिल्लो लहरको संक्रमणलाई मोदीले ‘आँधीबेहरी’ संज्ञा दिएका छन् । दोस्रो लहरको संक्रमण रोक्न विफल भएको भन्दै सरकारको कडा आलोचना भएपछि मोदीको भनाइ सार्वजनिक भएको हो ।

भारतको स्वास्थ्य तथा परिवार कल्याण मन्त्रालयका अनुसार मंगलबार ३ लाख २३ हजार १ सय ४४ संक्रमित थपिएका छन् । पछिल्लो २४ घण्टामा संक्रमितमध्ये कम्तीमा २ हजार ७ सय ७१ जनाको मृत्यु भइसकेको छ । सोमबार ३ लाख ५२ हजार ९ सयभन्दा बढी संक्रमित भएका थिए । अधिकारीहरुका अनुसार दिल्लीलगायत राज्यमा परीक्षण दर घटेकाले संक्रमित संख्यामा केही कमी आएको हो । केही दिनयता ६० हजारभन्दा बढीको परीक्षण गरेको दिल्लीले मंगलबार ४५ हजार जनामा मात्र भाइरस परीक्षण गरेको हो । अप्रिल १३ मा दिल्लीमा १ लाख ८ हजार जनामा भाइरस परीक्षण गरिएको थियो । कपितय प्रयोगशालाले कामको चाप बढेको भन्दै तीन दिनसम्म पनि परीक्षणको रिपोर्ट नदिएका भारतीय सञ्चारमाध्यमले उल्लेख गरेका छन् ।

त्यसैगरी, अमेरिकालगायत अन्य देशहरुले सहयोग गरेका आपत्कालीन सामग्रीहरू पनि भारत आउने क्रममा रहेका जनाइएको छ । अमेरिकाले कच्चा पदार्थमा लगाएको निर्यात प्रतिबन्धसमेत हटाइसकेको भारतमा खोप निर्माणका लागि पछिल्लो समय कच्चा पदार्थको निकै अभाव छ । अमेरिकाले भारतका लागि भेन्टिलेटर, पीपीई तथा परीक्षण किटहरू पठाइसकेको सीएनएनले जनाएको छ ।

अमेरिकी राष्ट्रपति कार्यालय ह्वाइटहाउसले सोमबार भारतका खोप उत्पादकहरूलाई आवश्यक पर्ने कच्चा पदार्थ तत्काल उपलब्ध गराउने जनाएको हो । ‘महामारीको सुरुवाती चरणमा जसरी भारतले हामीलाई सहयोग गर्‍यो, त्यसरी नै हामी पनि भारतलाई मद्दत गर्न प्रतिबद्ध छौं,’ अमेरिकी राष्ट्रपति जो बाइडेनले भनेका छन् । भारतीय अधिकारी तथा सिरम इन्स्टिच्युटका प्रमुख कार्यकारी अधिकृत अदर पुनावालाले अमेरिकालाई कच्चा पदार्थमा लगाएको निर्यात प्रतिबन्ध हटाइदिन आग्रह गरेका थिए ।

त्यसैगरी, बेलायतले भारतका लागि भेन्टिलेटर तथा अक्सिजन कन्सन्ट्रेटरसहित ६ सय वटा उपकरणहरू पठाएको छ । ती सामग्री मंगलबार बिहान नयाँदिल्ली उत्रने जनाएका छन् । ‘यो निकै चिन्ताजनक समयमा हामी एक मित्र र साझेदारका रूपमा भारतसँगै उभिएका छौं,’ बेलायती प्रधानमन्त्री बोरिस जोन्सनले भनेका छन् ।

भारतले जर्मनीबाट पनि उपकरणहरू निर्यात गर्न लागेको छ । ती सामग्रीहरू शुक्रबारसम्म देशभित्र आइपुग्ने भारतीय रक्षा मन्त्रालयले जनाएको छ । फ्रान्सले भारतका लागि आफूले सक्दो अक्सिजन आपूर्ति गर्ने बताएको छ । युरोपेली संघले पनि अक्सिजन तथा औषधि भारत पठाउने बताएको छ । त्यसैगरी, सिंगापुर, संयुक्त अरब इमिरेट्स, साउदी अरबले पनि विभिन्न सामग्री तथा उपकरणहरू पठाइसकेका बीबीसी हिन्दीले उल्लेख गरेको छ ।

प्रकाशित : वैशाख १४, २०७८ २१:१४
पूरा पढ्नुहोस्
प्रतिक्रिया
पठाउनुहोस्
×