चीनमा पोआउ एसिया मञ्‍चको सम्मेलन सुरु, बीआरआईप्रति सीको अठोट- विश्व - कान्तिपुर समाचार

चीनमा पोआउ एसिया मञ्‍चको सम्मेलन सुरु, बीआरआईप्रति सीको अठोट

चिनियाँ राष्ट्रपति सी भन्छन्- ‘बीआरआईमा रूचि राख्ने कुनै पनि मुलुकहरूले भाग लिएर सहकार्य गर्दै साझा फाइदा उठाउन सक्छन्। यसको लक्ष्य पनि साझा विकास र साझा फाइदा नै हो।’
लक्ष्मी लम्साल

बेइजिङ — चीनको हाइनान प्रान्तमा पर्ने पोआउ सहरमा मंगलबारदेखि पोआउ एसिया मञ्च-२०२१ को वार्षिक सम्मेलन सुरू भएको छ। चिनियाँ समयअनुसार मंगलबार बिहान भएको उद्घाटनमा चीनका राष्ट्रपति सी चिनफिङले बेइजिङबाट भिडियोमार्फत सम्बोधन गरे।

उद्घाटन समारोहमा कम्बोडिया, श्रीलंका, कजाखस्तान, लाओस, दक्षिण कोरिया, बंगलादेश, सिंगापुर, भियतनाम, मंगोलिया, अन्तर्राष्ट्रिय मुद्रा कोष लगायतका प्रमुखहरूले भिडियोमार्फत् सम्बोधन गरे।

झण्डै बीस वर्षदेखि नेपालले पनि यस मञ्चमा सक्रियताका साथ भाग लिँदै आएको छ। विगतमा राष्ट्रपति, प्रधानमन्त्री लगायत उच्च राजनीतिक नेतृत्वलाई निम्त्याउने गरेको चीनले यसपटक भने कुनै पनि उच्च नेताहरूलाई चीनमा बोलाएको छैन। चीनका लागि विभिन्न देशका कूटनीतिज्ञहरू, अर्थविद् तथा चीनस्थित उच्च प्रतिनिधिहरूले कार्यक्रमस्थलमा पुगेर भाग लिएका छन्।

चीनका लागि नेपाली राजदूत महेन्द्रबहादुर पाण्डेले कार्यक्रममा भाग लिएका छन्। सम्मेलनमा भाग लिनका लागि पाण्डे सोमबार बिहान बेइजिङबाट त्यसतर्फ गएका थिए। सम्मेलनका दौरान उनले मंगलबार र बुधबार गरी ३ वटा मुख्य तथा विषयगत बहसमा भाग लिने कार्यक्रम छ।

उद्घाटन मन्तव्यका क्रममा चिनियाँ राष्ट्रपति सीले विगत २० वर्षमा चीनले सक्रियताका साथ क्षेत्रीय सहकार्यलाई अघि बढाउँदै एसियाका साथ प्रगति गर्दै र विश्वका साथ विकास गर्दै गएको बताए। 'एउटै डुंगामा कठिनाइको संयुक्त सामना तथा साझा भविष्यको सिर्जना' विषयक सम्बोधनमा सीले अन्तर्राष्ट्रिय सम्बन्ध बनाइराख्न सबैले छलफल गर्नुपर्ने तर केही मुलुकहरुले तर्जुमा गरेको नियम लाद्न नहुने बताए। ठूला मुलुकले अरु बढी जिम्मेवारी लिनुपर्ने औंल्याउँदै उनले चीनले अघि सारेको बेल्ट एण्ड रोड (बीआरआई) सबैका लागि हातमा हात मिलाएर हिँड्न सक्ने फराकिलो बाटो भएको तर कसैको निजी बाटो नभएको स्पष्ट पारे। उनले भने, ‘बीआरआईमा रूचि राख्ने कुनै पनि मुलुकहरूले भाग लिएर सहकार्य गर्दै साझा फाइदा उठाउन सक्छन्। यसको लक्ष्य पनि साझा विकास र साझा फाइदा नै हो।’

चिनियाँ राष्ट्रपतिले खुलापन र सहनशील भावनाका साथ बीआरआईमा संलग्न सबै पक्षसँग मिलेर गरिबी निवारण तथा विकास गर्ने प्रतिबद्धता जनाए। अर्काको आन्तरिक मामिलामाथि हस्तक्षेप गर्न नहुने भन्दै सीले शान्ति, विकास, न्याय, निष्पक्षता, प्रजातन्त्र र स्वतन्त्रतालगायत मानवीय मूल्य मान्यताका साथ मानव सभ्यताको विकासलाई अघि बढाइनुपर्ने बताए।

सन् २०३० सम्ममा बीआरआईमार्फत् विश्वका ७६ लाख जनतालाई चरम गरिबी र ३ करोड २० लाखलाई मध्यम गरिबीको अवस्थाबाट मुक्त गरिने अठोट सुनाउँदै सीले साझा समृद्धिका लागि सक्रिय योगदान गर्ने र कस्तै विकसित भएपनि प्रभु्त्ववाद वा विस्तारवादको होडबाजी नगर्ने उल्लेख गरे। उनले वर्तमान संकटको सामनाका लागि एशिया तथा विश्वका विभिन्न मुलुकले युगको आह्वानलाई ध्यान दिनुपर्ने र हातमा हात मिलाएर कोभिड-१९को सामना गर्नुपर्ने बताए। आर्थिक खुलापन र पारस्परिक आदान प्रदानमा सीको जोड थियो।

प्रकाशित : वैशाख ७, २०७८ २१:१८
प्रतिक्रिया
पठाउनुहोस्

फोर्ब्सको प्रभावशाली सूचीमा कोइराला

कान्तिपुर संवाददाता

काठमाडौँ — वित्तीय साक्षरताका अभियन्ता प्रकाश कोइराला फोर्ब्स  म्यागेजिनको प्रभावशाली युवाको सूचीमा परेका छन् । फोर्ब्स  म्यागेजिनले हरेक वर्ष छनोट गर्ने एसियाका ३० वर्षमुनिका ३० जना युवाको सूचीमा कोइराला छानिएका हुन् ।

सन् २००९ देखि वित्तीय साक्षरता अभियान सञ्चालन गरिरहेका कोइरालाले सन् २०१७ यता फिनलिट नेपाल नामक संस्था स्थापना गरी साक्षरता अभियान चलाइरहेका छन् । सूचीमा परेसँगै वित्तीय साक्षरताका लागि थप काम गर्ने ऊर्जा प्राप्त भएको कोइरालाले प्रतिक्रिया दिए । फिनलिट नेपालले व्यक्तिगत वित्त व्यवस्थापनका लागि आधारभूत ज्ञान सिकाउँदै आएको छ । कोइरालाले विशेषगरी नेपालका कम आय भएका र जोखिममा रहेका समुदायमा गरिबी न्यूनीकरणका लागि वित्तीय साक्षरतामा काम गरिरहेका छन् ।

फिनलिट नेपालले सरकारी निकाय र विभिन्न कम्पनीसँग मिलेर वित्तीय साक्षरताको प्रवद्र्धन गर्न र वित्तीय प्रणालीमा समावेशिताका लागि काम गर्दै आएको छ । वित्तीय साक्षरतामा काम गरेबापत कोइरालाले विभिन्न अन्तर्राष्ट्रिय अवार्ड पनि जितेका छन् । उनले सन् २०१७ मा हार्भर्ड केनेडी स्कुलमा छात्रवृत्ति पनि पाएका थिए ।

वित्तीय साक्षरतामा काम गरेबापत उनले सन् २०१५ मा बेलायतको संसद् भवनमा ग्लोबल अवार्ड पाएका थिए । नेपाल सरकारले सन् २०१६ मा उनलाई राष्ट्रिय युवा प्रतिभा पुरस्कारबाट सम्मानित गरेको थियो । कोइरालाले सन् २०१८ मा बेलायतको लन्डन इन्स्टिच्युट अफ बैंकिङ एन्ड फाइनान्सबाट बेस्ट आउटरिच इनिसिएटिभ अवार्ड पनि पाएका छन् ।

कोइरालाले वित्तीय साक्षरताका लागि विभिन्न पुस्तकसमेत प्रकाशन गरेका छन् । राष्ट्र बैंकका लागि वित्तीय साक्षरतासम्बन्धी पुस्तक र बालबालिकालाई वित्तीय साक्षरता सिकाउन ‘फिनलिको’ नामक कमिक पुस्तक पनि लेखेका छन् । ‘पैसाको खेती’ नामक वित्तीय साक्षरताको अर्को पुस्तकमा पनि उनको सहलेखन छ ।

प्रकाशित : वैशाख ७, २०७८ २०:३२
पूरा पढ्नुहोस्
प्रतिक्रिया
पठाउनुहोस्
×