म्यान्मारमा ७ प्रदर्शनकारीको मृत्यु- विश्व - कान्तिपुर समाचार

म्यान्मारमा ७ प्रदर्शनकारीको मृत्यु

(एजेन्सी)

यांगुन — म्यान्मारमा सैनिक ‘कु’ को विरोधमा गरिएका प्रदर्शनका क्रममा कम्तीमा ७ जनाको मृत्यु भएको छ । बुधबार गरिएको प्रदर्शनका क्रममा सुरक्षाकर्मीको गोली लागेर उनीहरुको ज्यान गएको हो ।

सैनिक ‘कु’ को विरोधमा म्यान्मारमा दंगा भड्किएपछि स्थिति नियन्त्रणमा लिने प्रयासमा अश्रुग्यास प्रहार गर्दै प्रहरी : तस्बिर : रोयटर्स

मृत्यु हुनेमा ५ जना केलका र २ जना बागोका रहेका समाचार संस्था रोयटर्सले जनाएको छ । प्रदर्शनकारीले बुधबार यांगुनस्थित एक चिनियाँ उद्योगमा आगो लगाइदिएका बीबीसीले जनाएको छ । साथै उनीहरूले चिनियाँ झन्डासमेत जलाएका छन् ।

म्यान्मारमा गत नोभेम्बरमा भएको चुनावमा व्यापक धाँधली भएको भन्दै म्यान्मारको सेनाले फेब्रुअरी १ मा सत्ता कब्जा गरेको हो । त्यसयता लोकतन्त्र पक्षधरहरूले आन्दोलन चर्काएका हुन् । स्वतन्त्र अन्तर्राष्ट्रिय पर्यवेक्षकहरूले भने चुनावमा धाँधली नभएको बताउने गरेका छन् ।

पछिल्ला दिनहरूमा सैनिक सरकारले प्रदर्शनकारीमाथि चरम दमन गर्न थालेको छ । प्रदर्शनका क्रममा हालसम्म ५ सय ८० जनाभन्दा बढीको ज्यान गइसकेको छ ।

नोभेम्बरमा भएको चुनावमा लोकतन्त्रवादी नेतृ आङ सान सुचीको दल नेसनल लिग फर डेमोक्रेसी (एनएलडी) ले अत्यधिक बहुमत ल्याएको थियो । सेना प्रमुख मिन ह्यालिङले ‘देशमा निष्पक्ष चुनाव गर्ने’ बताउँदै आएका छन् । तर उनले चुनावको मितिबारे भने केही उल्लेख गरेका छैनन् ।

सत्ता कब्जा गरेसँगै एनएलडी प्रमुख सुची सैनिक नियन्त्रणमा छिन् । उनीविरुद्ध विभिन्न मुद्दा लगाइएको भए पनि त्यसविरुद्धका प्रमाण सार्वजनिक गरिएको छैन । नेतृ सुचीले आफूविरुद्धका आरोपहरू अस्वीकार गर्दै आएकी छन् । सैनिक ‘कु’ सँगै सुचीसहित एनएलडीका दर्जनौं नेता, पत्रकार तथा मानवअधिकारकर्मीलाई पनि पक्राउ गरिएको छ ।

पछिल्ला दिनहरुमा देशका प्रमुख सहरहरूमा दैनिकजसो सरकारविरोधी प्रदर्शन हुँदै आएका छन् । सैनिक नरसंहारको संयुक्त राष्ट्रसंघ, युरोपेली संघ, अमेरिका, बेलायत, अस्ट्रेलिया, जापानलगायतले निन्दा गरेका छन् । लोकतन्त्र पक्षधर प्रदर्शनकारीमाथि सुरक्षाकर्मीले गरेको ‘चरम दमन अस्वीकार्य’ भएको उनीहरूको भनाइ छ ।

यसअघि बेलायतसहित एक दर्जन देशका रक्षामन्त्रीहरूले यसअघि संयुक्त विज्ञप्ति जारी गरी सैनिक दमनको कडा निन्दा गरेका थिए । त्यसैगरी, संयुक्त राष्ट्रसंघीय महासचिव एन्टोनियो गुटेरेस, अमेरिकी राष्ट्रपति जो बाइडेन, बेलायती विदेशमन्त्री डोमिनिक राबलगायतले सैनिक दमनको चर्को आलोचना गरेका छन् ।

अमेरिका, बेलायत, क्यानाडा, संयुक्त राष्ट्रसंघ, युरोपेली संघलगायतले यसअघि नै सैनिक नेतृत्वमाथि प्रतिबन्धहरू घोषणा गरिसकेका छन् । तर चीन र रुसले भने हालसम्म कुनै प्रतिक्रिया जनाएका छैनन् ।

प्रकाशित : चैत्र २५, २०७७ २२:०७
प्रतिक्रिया
पठाउनुहोस्

ब्राजिलमा कोरोना भाइरसको संक्रमणका कारण एकै दिन ४ हजारको मृत्यु

ब्राजिलमा गत महिना मात्रै ६६ हजार ५ सय ७० जनाको ज्यान गएको थियो । जुन अघिल्लो महिनाको तुलनामा दोब्बर हो ।
(एजेन्सी)

ब्रासिलिया — ब्राजिलमा कोरोना भाइरसको संक्रमणका कारण एकै दिन कम्तीमा ४ हजार जनाको ज्यान गएको छ ।

अधिकारीहरूले २४ घण्टाको अवधिमा भाइरसको संक्रमणका कारण ४ हजार १ सय ९५ जनाको मृत्यु भएको पुष्टि गरेका अन्तर्राष्ट्रिय सञ्चारमाध्यमहरूले जनाएका छन् । यो भाइरसका कारण ब्राजिलमा एकै दिन मृत्यु भएको हालसम्मकै ठूलो संख्या हो ।

कोरोना भाइरस प्रभावित देशको सूचीमा दोस्रो स्थानमा रहेको ब्राजिल हालसम्म ३ लाख ३६ हजार ९ सय ४७ जनाको ज्यान गइसकेको छ । जोन्स हप्किन्स विश्वविद्यालयका अनुसार बुधबार साँझसम्म संक्रमित हुनेको संख्या १ करोड ३१ लाख ५ सय ८० पुगिसकेको छ ।

स्वास्थ्य मन्त्रालयका अनुसार पछिल्लो समय ब्राजिलमा कोरोना भाइरसको संक्रमण निकै तीव्र बन्दै गएको छ । अस्पतालहरूले बिरामीको चाप थेग्न नसकेपछि उपचारमा समस्या भएको जनाएका छन् । तर राष्ट्रपति जैर बोल्सोनारोले भाइरसको नियन्त्रणका लागि कुनै पनि प्रतिबन्ध तथा लकडाउन घोषणा नगरिने जनाएका छन् ।

भाइरस नियन्त्रणका कारण आवश्यक कदम नचालेको भन्दै उनको निकै चर्को आलोचना हुने गरेको छ । तर राष्ट्रपति बोल्सोनारोले भने आफ्नो नीतिको बचाउ गर्दै आएका छन् । उनले लकडाउन तथा प्रतिबन्धहरूका देशको अर्थतन्त्र बिग्रने दाबी गरेका छन् । जुन देशका लागि भाइरसको प्रभावभन्दा बढी हानिकारक हुने उनको दाबी छ ।

राष्ट्रपतीय कार्यालय अगाडि मंगलबार समर्थकमाझ बोल्दै बोल्सोनारोले क्वारेन्टाइन व्यवस्थाको आलोचना गरेका छन् । तर उनले भाइरसका कारण एकै दिन ४ हजार १ सय ९५ जनाको मृत्यु भएको बारे भने केही उल्लेख नगरेको बीबीसीले उल्लेख गरेको छ । ब्राजिलमा गत महिना मात्रै ६६ हजार ५ सय ७० जनाको ज्यान गएको थियो । जुन अघिल्लो महिनाको तुलनामा दोब्बर हो ।

ब्राजिलको पछिल्लो अवस्थाका कारण अन्तर्राष्ट्रिय समुदायसमेत प्रभावित हुने देखिएको स्वास्थ्यविद्हरूको भनाइ छ । ‘अन्तर्राष्ट्रिय समुदायले गरेका सबैजसो प्रयासका लागि हाल ब्राजिल प्रमुख चेतावनीका रूपमा देखिएको छ,’ ब्राजिलको संक्रमणबारे अध्ययन गरिरहेका डाक्टर मिगुएल निकोलेलिसले भने, ‘यदि ब्राजिल सुरक्षित रहेन भने विश्व नै सुरक्षित नहुने देखिन्छ किनकि हरेक साता नयाँ भेरियन्ट (प्रजाति) देखा परिरहेको छ ।’

पोर्चुगलको एक स्वास्थ्य संस्थाका अनुसार कारण ब्राजिलका सबै राज्यका अस्पतालहरूमा ९० प्रतिशतभन्दा बढी सघन उपचार कक्ष कोरोना भाइरस संक्रमितले भरिएका छन् । कतिपय राज्यले अक्सिजन आपूर्तिमा समस्या भएको जनाएका छन् ।

भाइरसबाट सबैभन्दा बढी प्रभावित अमेरिकामा ३ करोड ८ लाख ४७ हजारभन्दा बढी संक्रमित छन् । बुधबार साँझसम्म अमेरिकामा मृत्यु हुनेको संख्या ५ लाख ५६ हजार ५ सय ४८ पुगिसकेको छ ।

त्यस्तै संक्रमित संख्याका आधारमा भारत, फ्रान्स र रुस क्रमशः तेस्रो, चौथो र पाँचौं स्थानमा छन् । भारतमा १ करोड २८ लाख १ हजार ७ सय ८५ जना संक्रमित भइसकेका छन् भने १ लख ६६ हजारभन्दा बढीको ज्यान गइसकेको छ । त्यस्तै, ४९ लाख २ हजार जनाभन्दा बढी संक्रमित रहेको फ्रान्समा मृत्यु हुनेको संख्या ९७ हजार ४ सय ३१ छ । जोन्स हप्किन्स विश्वविद्यालयका अनुसार रुसमा संक्रमितको संख्या ४५ लाख ५४ हजार ५ सय पुगेको छ । त्यहाँ भाइरसका कारण ९९ हजार ८ सय जनाको मृत्यु भइसकेको छ ।

सन् २०१९ को डिसेम्बरमा चीनको वुहानबाट फैलिएको कोरोना भाइरसका कारण हालसम्म विश्वभर २८ लाख ७६ हजारभन्दा बढीले ज्यान गुमाइसकेका छन् । विश्वविद्यालयका अनुसार १३ करोड २५ लाख ५७ हजारभन्दा बढी संक्रमित भइसकेका छन् ।

प्रकाशित : चैत्र २५, २०७७ २१:२४
पूरा पढ्नुहोस्
प्रतिक्रिया
पठाउनुहोस्
×