‘सेना फिर्ता भए तालिवान शक्तिशाली’

अमेरिकी पूर्वराष्ट्रपति डोनाल्ड ट्रम्प र तालिवान विद्रोहीबीच भएको सम्झौताअनुसार अप्रिल महिनाभित्र अमेरिकाले अफगानिस्तानबाट सेना फिर्ता गर्न सहमत भएको थियो । तर अफगान राष्ट्रपति असरफ घानीलाई लेखेको पत्रमा ब्लिंकनले ‘भयानक आक्रमण’ हुन सक्ने चेतावनी दिएका छन् ।

सन् २००१ मा अमेरिकी सेनाले अफगानिस्तानमा आक्रमण गर्दै तालिवानलाई सत्ताच्युत गरिदिएको थियो । २००१ को सेप्टेम्बर ११ मा अमेरिकाका वासिङटन र न्युयोर्कमा गरिएका आतंककारी आक्रमणको बदलामा अमेरिकी सेनाले अफगानिस्तानमा हमला गरेको थियो ।

अमेरिकी राष्ट्रपति जो बाइडेनले गत जनवरीमा ट्रम्प प्रशासन र तालिवानबीच भएको सम्झौताको पुनरावलोकन गर्ने बताएका थिए । उक्त सहमतिमा तालिवानले हिंसात्मक गतिविधि अन्त्य गर्ने र त्यसको बदलामा मे १ भित्र अमेरिकी नेतृत्वका १० हजार नेटो सैनिक फिर्ता गरिने उल्लेख छ ।

अमेरिकी राष्ट्रपति कार्यालय ह्वाइटहाउसले ‘अफगान विद्रोही समूह तालिवानले आफ्ना प्रतिबद्धता पूरा गर्नुपर्ने’ जनाएको छ । त्यसका साथै सैनिक फिर्ताअघि तालिवानले हिंसा त्याग्नुपर्ने र आतंकवादीहरूसँगको सम्बन्ध अन्त्य गर्नुपर्ने ह्वाइटहाउसको भनाइ छ ।

विदेशमन्त्री ब्लिंकनले लेखेको पत्रमा ‘९० दिनभित्र हिंसात्मक गतिविधि अन्त्य गर्न तथा राष्ट्रसंघको पर्यवेक्षणमा दिगो र विस्तृत युद्धविराम’ गर्न आह्वान गरेका बीबीसीले जनाएको छ । अफगानिस्तानको सुरक्षा अवस्था थप बिग्रन नदिन यो अत्यावश्यक भएको ब्लिंकनको भनाइ छ ।