भारतीय प्रधानमन्त्री नरेन्द्र मोदीले लगाए कोरोना खोप
काठमाडौँ — भारतीय प्रधानमन्त्री नरेन्द्र मोदीले कोरोना भाइरसविरुद्धको खोप लगाएका छन् । उनले सोमबार बिहान अखिल भारतीय आयुर्विज्ञान संस्थान (एम्स)मा पुगेर कोरोना भाइरसविरुद्धको खोपको पहिलो डोज लगाएका हुन् ।
मोदीले ट्वीट गर्दै आफूले कोरोनाविरुद्धको खोप लगाएको जानकारी दिएका छन् । मोदीले ट्विटरमा लेखेका छन्, ‘एम्समा कोभिड–१९ विरुद्धको खोपको पहिलो डोज लिएँ । हाम्रा चिकित्सक र वैज्ञानिकले कोभिड–१९ विरुद्धको वैश्विक लडाइँलाई मजबुत बनाउन तीव्र रुपमा काम गरिरहेको उल्लेखनीय छ ।’
उनले कोरोना खोप लगाउन योग्य सबैलाई खोप अभियानमा सहभागी हुन पनि उनले आग्रह गरेका छन्, ‘आऔँ सबै मिलेर भारतलाई कोभिड–१९ मुक्त बनाऔँ ।’
Took my first dose of the COVID-19 vaccine at AIIMS.
— Narendra Modi (@narendramodi) March 1, 2021
Remarkable how our doctors and scientists have worked in quick time to strengthen the global fight against COVID-19.
I appeal to all those who are eligible to take the vaccine. Together, let us make India COVID-19 free! pic.twitter.com/5z5cvAoMrv
भारतमा सोमबारदेखि वरिष्ठ नागरिक, गम्भीर बिरामी र ४५ वर्षभन्दा बढी उमेरका व्यक्तिलाई कोरोना खोप लगाइँदैछ । पहिलो चरणमा सरकारी केन्द्रमा मात्र कोरोना खोप लगाइन्थ्यो । अब भने भारतमा निजी अस्पतालमा पनि कोरोना खोप उपलब्ध हुनेछ । त्यसका लागि नागरिकले आफै शुल्क तिनुपर्नेछ ।
दस हजार सरकारी अस्पतालमा कोरोना खोप नि:शुल्क लगाइनेछ । तर २० हजार निजी अस्पतालमा भने शुल्क लिएर खोप लगाइनेछ । एक डोजका लागि २५० रुपैयाँसम्म शुल्क लिइने बताइएको छ ।
भारतमा गत जनवरी १६ देखि कोरोना खोप लगाउन सुरु गरिएको हो । जुलाई ३० सम्म ३० करोड नागरिकलाई कोरोनाविरुद्धको खोप लगाउने भारत सरकारको लक्ष्य रहेको छ । भारतीय स्वास्थ्य तथा परिवार कल्याण मन्त्रालयका अनुसार आइतबार साँझसम्म भारतमा १ करोड ४३ लाखभन्दा बढीलाई कोरोना खोप लगाइएको छ ।
प्रकाशित : फाल्गुन १७, २०७७ ०९:१०
