मध्य प्रदेश बस दुर्घटना : मृतकको संख्या ५० पुग्यो
नयाँदिल्ली — भारतको मध्य प्रदेश राज्यको सिधी जिल्लामा मंगलबार भएको बस दुर्घटनामा मृत्यु हुनेको संख्या ५० पुगेको छ । समाचार संस्था एनएनआईले जिल्ला अधिकारी रवीन्द्रकुमार चौधरीलाई उद्धृत गर्दै मृतकको संख्या ५० पुगेको जनाएको छ ।
भारतीय सञ्चारमाध्यमका अनुसार सिधीबाट सत्ना गइरहेको बस मंगलबार बिहान नहरमा खसेको हो । दुर्घटनास्थल मध्यप्रदेशको राजधानी भोपालबाट करिब ५ सय ६० किलोमिटर टाढा पर्छ ।
प्रहरीका अनुसार बस सडक छेउमा रोक्ने क्रमममा पुलबाट ३० फिट गहिरो नहरमा खसेको जनाइएको छ । खसेपछि ७ यात्रु भने पौडेर बाहिर निस्कन सफल भएका थिए । प्रहरी नियन्त्रण कक्षको जानकारीअनुसार चालकले नियन्त्रण गुमाएपछि बस नहरमा खसेको हो ।
स्थानीय सञ्चारमाध्यमका अनुसार बसमा ५७ जनाले यात्रा गरिरहेका थिए । मध्य प्रदेशका मुख्यमन्त्री शिवराज सिंह चौहानले मृतकका परिवारलाई राहतस्वरुप जनही ५ लाख दिने घोषणा गरेका छन् ।
त्यस्तै घटनाप्रति भारतीय प्रधानमन्त्री नरेन्द्र मोदीले दु:ख व्यक्त गर्दै ज्यान गुमाउनेहरुका परिवारजनलाई थप २ लाख क्षतिपूर्ति उपलब्ध गराइने घोषणा गरेका छन् । उनले घाइतेलाई ५० हजार भारु उपलब्ध गराइने पनि जनाए । त्यसैगरी, राष्ट्रपति रामनाथ कोभिन्दले पनि मृतकप्रति समवेदना प्रकट गरेका छन् ।
प्रकाशित : फाल्गुन ५, २०७७ १०:४९