ब्याडमिन्टनका प्रिन्स ओलम्पिकको कठिन समूहमा
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — नेपालका युवा ब्याडमिन्टन खेलाडी प्रिन्स दाहाल पेरिस ओलम्पिकको कठिन समूहमा परेका छन् ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![ब्याडमिन्टनका प्रिन्स ओलम्पिकको कठिन समूहमा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/third-party/prince-dahal-nepal-badminton-1-1272024044835-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
शुक्रबार गरिएको ‘ड्र’ अनुसार पुरुष सिंगलतर्फ ३६ देशका ४१ खेलाडी प्रतिस्पर्धी छन् । उनीहरूले १३ वटा समूहमा रहेर प्रारम्भिक चरणमा प्रतिस्पर्धा गर्नेछन् । एउटा समूहमा ३ वा ४ खेलाडी रहेका छन् ।
त्यसअनुसार प्रिन्स समूह ‘पी मा परेका छन् । जहाँ विश्व नम्बर दुई वरीयता तथा दुईपल्टका विश्व च्याम्पियन डेनमार्कका भिक्टोर एक्सेलसनसहित तीनपल्ट ओलम्पिक खेलिसकेका इजरायलका मिसा जिल्बरमन र आयरल्यान्डका नहत गुएन रहेका छन् । सन् २०१२, २०१६ र २०२० को ओलम्पिक खेलेका मिसा युरोपियन च्याम्पियनसिपका पदकधारी हुन् । आइरिस गुएन पनि युरोपियन यू–१७ च्याम्पियनसिपका स्वर्ण विजेता हुन् ।
राउन्ड रोबिनमा प्रतिस्पर्धा गरेपछि समूहका शीर्षस्थानमा रहने खेलाडी नकआउट पुग्नेछन् । प्रत्येक खेल बेस्ट अफ थ्रीमा हुनेछ । ब्याडमिन्टनको प्रतिस्पर्धा पेरिसस्थित पोर्टे डे ला चापेल एरिनामा जुलाई २७ देखि अगस्ट ५ सम्म हुनेछ ।
बीडब्लूएफ विश्व वरीयताप्राप्त शीर्ष १३ खेलाडीलाई वरीयता दिइएको थियो । हरेक समूहमा १–१ जना रहेका छन् ।
ओलम्पिकमा नेपाली ब्याडमिन्टनले पहिलोपल्ट सहभागिता जनाउन लागेको हो । त्रिपक्षीय आमन्त्रण कोटामा प्रिन्सले यो अवसर पाएका हुन् । उनी पनि नेपालका जुनियरतर्फ विश्व नम्बर एकमा पुगेका खेलाडी हुन् ।
घरेलु भूमिमा भएको १३ औं दक्षिण एसियाली खेलकुदमा डबल्सतर्फ दुई कांस्य पदक जितेका प्रिन्सले गत वर्ष चीनमा भएको हाङचाउ एसियाड पनि खेलेका थिए । एसियाडमा उनी राउन्ड अफ ३२ मा पराजित भए । उनले दर्जनभन्दा बढी राष्ट्रिय प्रतियोगितामा सफलता पाएका छन् । अहिले प्रिन्स श्रीलंकामा प्रशिक्षण गरेर स्वदेश फर्किएका छन् ।
आसन्न ओलम्पिकका लागि नेपालबाट प्रिन्ससहित सात खेलाडीले भाग लिने भएका छन् । त्यसमा एथलेटिक्सकी सन्तोषी श्रेष्ठ, पौडीका एलेक्जेन्डर शाह र डुवाना लामा, टेबलटेनिसका स्यान्टु श्रेष्ठ, जुडोकी मनिता श्रेष्ठ प्रधान र सुटिङकी सुस्मिता नेपालले सहभागिता जनाउने छन् ।
टेबलटेनिसका स्यान्टुले दक्षिण एसियाली क्वालिफाइङ प्रतियोगिता जितेर पेरिसको टिकट काटेका हुन् । अरू खेलाडी खेलअनुसार फरक कोटामार्फत छानिएका हुन् । नेपाली ओलम्पिक इतिहासमा छनोट खेलेर ओलम्पिक उनी तेस्रो खेलाडी हुन् । यसअघि तेक्वान्दोका संगीना वैद्य र दीपक विष्ट छनोट भएर ओलम्पिक खेलेका थिए ।
अहिले एलेक्जेन्डर अमेरिका, डुवाना थाइल्यान्ड, स्यान्टु अस्ट्रेलिया र प्रिन्स श्रीलंकामा प्रशिक्षणरत रहँदा सुस्मिता, सन्तोषी र मनिताले नेपालमै प्रशिक्षण गरिरहेको नेपाल ओलम्पिक कमिटीले जनाएको छ ।
![](https://assets-cdn.ekantipur.com/uploads/source/ads/900-x-100-1-0282024055738.gif)