दक्षिण अफ्रिकामाथि भारतको सजिलो जित- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

दक्षिण अफ्रिकामाथि भारतको सजिलो जित

एएफपी

सेन्चुरियन — भारतले दक्षिण अफ्रिकाविरुद्धको पहिलो टेस्टमा १ सय १३ रनको जित निकाल्दै सिरिजमा सुखद सुरुआत लिएको छ । सुपर स्पोर्टस पार्कमा जितका लागि ३ सय ५ रनको लक्ष्य पाएको दक्षिण अफ्रिकाले पाँचौं तथा अन्तिम दिन बिहीबारको सुरुआत चार विकेट गुमाएर ९४ रनबाट गरेको थियो ।

लन्च सत्रपछिको पहिलो दुई ओभरमा तीन विकेट गुमाएपछि दक्षिण अफ्रिका १ सय ९१ रनमा अलआउट भयो । भारतका लागि जसप्रित बुमराह र मोहम्मद सामीले ३–३ विकेट लिए । यस्तै फास्ट बलर मोहम्मद सिराजले दुई विकेट लिए । अफस्पिनर रविचन्द्रन आश्विनले लगातार दुई बलमा अन्तिम दुई विकेट लिए ।

यस जितसँगै तीन टेस्टको विश्व टेस्ट च्याम्पियनसिप शृंखलामा भारतले १–० को अग्रता लिएको छ । खेलपछि भारतीय कप्तान विराट कोहलीले भने, ‘हामीले उत्कृष्ट सुरुआत लिएका छौं । यो जित चार दिनमा सम्भव भएको हो, त्यसैले हाम्रो टिम कति राम्रो छ, देखाउँछ ।’ टेस्टको पूरा एक दिन वर्षाले खेल सम्भव नभएर पनि भारत यो सजिलो जितसम्म पुगेको हो ।

दक्षिण अफ्रिकाका लागि कप्तान डिन एल्गर र टेम्बा बाभुमाले केही सुदृढ खेल प्रदर्शन गरे । एल्गर ७७ रन बनाएर बुमराहको बलमा एलबीडब्लू भए । बाभुमा भने ३५ रनमै सीमित रहे । हारपछि एल्गरले भने, ‘हामीले पर्याप्त रन बटुल्न सकेनौं, त्यसैले हामीले बलियो चुनौती पनि पेस गर्न सकेनौं ।’

प्रकाशित : पुस १६, २०७८ ०७:४४
प्रतिक्रिया
पठाउनुहोस्

राष्ट्रिय भारोत्तोलन यसै महिना

कान्तिपुर संवाददाता

काठमाडौँ — नेपाल भारोत्तोलन संघको आयोजनामा २४ औं पुरुष तथा ९ औं महिला राष्ट्रिय भारोत्तोलन प्रतियोगिता पुस २७ गतेदेखि हुनेछ र यसमा तीन विभागीय टोली पुलिस, आर्मी र एएपीएफसँगै विभिन्न २० जिल्लाका गरेर २३ टिमको सहभागिता रहनेछ ।

संघका अध्यक्ष रामकृष्ण श्रेष्ठले बिहीबार पत्रकार सम्मेलनमा प्रतियोगितामा दुई सयभन्दा बढी खेलाडी सहभागी रहने बताए । जुनियर/सिनियर तथा युथ पुरुष/महिलातर्फ विभिन्न ४० तौल समूहमा प्रतिस्पर्धा हुनेछ । सहभागी टोलीको खाना, बसोबास र यातायात खर्च आयोजक संघले बेहोर्नेछ ।

तीनदिने प्रतियोगिता मध्यपुर थिमि नगरपालिकाको थिमि बैंक्वेटमा हुनेछ । मेयर मदनसुन्दर श्रेष्ठले नगरपालिकाले खेल क्षेत्रलाई अगाडि बढाउन हरदम सहयोग गरिरहेको स्मरण गर्दै प्रतियोगितामा पनि नगरपालिकाको साथ र सहयोग रहने प्रतिबद्धता जनाए । नेपाल ओलम्पिक कमिटीका उपाध्यक्ष चतुरानन्दराज वैद्यले प्रतियोगिताको सफलताका लागि शुभकामना दिए ।

प्रकाशित : पुस १६, २०७८ ०७:४१
पूरा पढ्नुहोस्
प्रतिक्रिया
पठाउनुहोस्
×