कान्तिपुर हाफ म्याराथनको पुरस्कार वृद्धि

अनिश्चित र अनपेक्षित जलवायु परिवर्तनको कारण विश्वमै मानिसहरूको जीवनशैलीमा ठूलो असर गरिरहेको छ । जीवजन्तु र वनस्पतिजगतमा पनि नराम्रो प्रभाव पारिरहेको छ । कान्तिपुर मिडिया ग्रुप (केएमजी) द्वारा आयोजित कान्तिपुर हाफ म्याराथनको नवौं संस्करण २०७६ साल जेठमा भएको थियो । कोभिड–१९ महामारीले प्रभावित भएपछि दुई वर्षपछि आएर दसौं संस्करण यही जेठ २१ गते शनिबार हुँदै छ । यो संस्करणका लागि ह्यासट्याग रनफरग्रिननेपाल र क्लाइमेटचेन्जक्राइसिस चलाइएको छ ।

तीन विधा (हाफ म्याराथन, कर्पोरेट र ह्विलचेयर) समावेश गरिएको म्याराथनमा सहभागी हुनेले विभिन्न वनस्पतिसँग लैजान पाउनेछन्, जसलाई आफ्नो घर वा कार्यालयमा सजाउन सकिने छ । हाफ म्याराथनमा देशकै नाम चलेका खेलाडीहरूले प्रतिस्पर्धा गर्नेछन् । २१.१ किमिको यो स्पर्धामा महिला र पुरुषका विजेतालाई नवौं संस्करणमा नगद ५०–५० हजार रुपैयाँ दिइएको थियो । यसपालि नगद पुरस्कार वृद्धि गरी १–१ लाख बनाइएको छ । दोस्रो, तेस्रो, चौथो र पाँचौं हुनेले क्रमशः ५० हजार, ३० हजार, २० हजार र १० हजार प्राप्त गर्नेछन् । हाफ म्याराथनमा १८ वर्ष पुगेका खेलाडीमात्रै सहभागी हुन पाउनेछन् ।

विभिन्न कर्पोरेट हाउसमा संलग्न व्यक्तिहरूका लागि ५ किमिको कर्पोरेट रेस राखिएको हो । यसमा विजेतालाई पोखरा र दोस्रो हुनेलाई नगरकोटमा बस्ने–घुम्ने प्याकेजको व्यवस्था गरिएको छ भने तेस्रो हुनेले माउन्टेन फ्लाइटको टिकट हात पार्नेछन् ।

शारीरिक रूपमा फरक क्षमता भएकाहरूका लागि ह्विलचेयर दौड निकै रोचक हुने गर्छ । महिला र पुरुष दुवै विधामा हुने यो रेसमा पहिलो, दोस्रो र तेस्रो हुनेले ३० हजार, २० हजार र १० हजार प्राप्त गर्नेछन् । गत संस्करणमा तीनै स्पर्धामा गरी ३ हजार ५ सय जना सहभागी भएका थिए ।

एनआईसी एसिया बैंक मुख्य प्रायोजक रहेको कान्तिपुर हाफ म्याराथनमा नेपाल एथलेटिक्स संघको प्राविधिक सहयोग रहेको छ । संघले यही हाफ म्याराथनको नतिजाका आधारमा तीन महिनाभित्र नेपाललाई अन्तर्राष्ट्रिय प्रतियोगितामा निमन्त्रणा आएका देशको प्रतिनिधित्व गर्ने खेलाडी छनोट गरी पठाउने पनि जनाएको छ । त्यसैले खेलाडीहरूका लागि कान्तिपुर हाफ म्याराथन महत्त्वपूर्ण बनेको छ ।