सेन्ट्रल जोन भलिबलको उपाधिका लागि नेपालले उज्वेकिस्तानसँग खेल्ने
काठमाडौँ — नेपालले एसियन सेन्ट्रल जोन सिनियर वुमेन्स भलिबल च्यालेन्ज कपको उपाधिका लागि उज्वेकिस्तानसँग प्रतिस्पर्धा गर्ने भएको छ ।
समूह चरणको खेलमा नेपालले उज्वेकिस्तानमाथि ३–० को सेटमा रहज जित निकालेको थियो ।
बंगलादेशको ढाकामा लिग चरणको अन्तिम खेलमा किर्गिस्तानलाई ३–० को सोझो सेटमा हराएर नेपाली टोली अपराजित रहँदै फाइनलमा पुगेको हो । पाँच खेलमा नेपालको १४ अंक भएको छ ।
लिगको अन्तिम खेलमा श्रीलंकालाई ३–२ को प्रतिस्पर्धात्मक सेटमा पराजित गरी उज्वेकिस्तान लिगको उपविजेता रह्यो । उसले ५ खेलबाट ११ अंक जोडेको छ ।
सन् २०१९ मा भएको पहिलो संस्करणको विजेता नेपालले किर्गिस्तानविरुद्ध धेरै दबाब महसुस गर्नु परेन । नेपालले २५–८, २५–१४ र २५–१७ को सेटमा जित हासिल गरेको हो ।
नेपाली टोलीका मुख्य प्रशिक्षक जगदीश भट्टले उज्वेकिस्तानलाई समूह चरणमै पराजित गरिसकेका कारण फाइनलमा अधिक दबाब महसुस गर्नु नपर्ने प्रतिक्रिया दिएका छन् ।
उज्वेकिस्तानले श्रीलंकामाथि २६–२४, २५–१४, २०–२५, १९–२५ र १५–१२ को सेटमा प्रतिस्पर्धात्मक जित हासिल गरेको हो ।
नेपाल र उज्वेकिस्तानबीचको फाइनल खेल मंगलबार हुनेछ ।
प्रकाशित : पुस १२, २०७८ १४:२७