एपीएफ र प्रदेश १ भिड्ने- खेलकुद - कान्तिपुर समाचार
प्रधानमन्त्री कप महिला राष्ट्रिय क्रिकेट

एपीएफ र प्रदेश १ भिड्ने

चित्रांग थापा

धनगढी — फाप्ला क्रिकेट मैदानमा भइरहेको प्रधानमन्त्री कप महिला राष्ट्रिय क्रिकेटको उपाधिका लागि विभागीय टोली एपीएफ र प्रदेश १ बीच प्रतिस्पर्धा हुने भएको छ । शनिबार सेमिफाइनलमा प्रदेश १ ले घरेलु टोली सुदूरपश्चिमलाई ९ विकेट र एपीएफले लुम्बिनी प्रदेशलाई ३८ रनले हराए ।

पहिलो सेमिफाइनलमा सुदूरपश्चिमले टस जितेर ब्याटिङ गर्दै २० ओभरमा ७ विकेट गुमाई ८५ रन बनायो । सुदूरपश्चिम ७ रनमै ३ विकेट गुमाएर दबाबमा परेको थियो । सम्झना खड्काले सर्वाधिक २७, कप्तान रितु कनौजियाले २५ र डली भट्टले १२ रनको योगदान दिएका थिए । प्रदेश १ बाट कप्तान रुबिना क्षेत्री, अलिशा खाडिया, संगीता राई र ज्योति दनुवारले १–१ विकेट लिए ।

८६ रनको लक्ष्य प्रदेश १ ले एक विकेट क्षतिमा पूरा गर्‍यो । १६.५ ओभरमा लक्ष्य पूरा गरेको प्रदेश १ का लागि पहिलो विकेटमा ओपनरद्वय कप्तान रुबिना र काजल श्रेष्ठले ५३ रनको साझेदारी गरेर विजय आधार खडा रेका थिए । कप्तान रुबिनाले अविजित ३१ रन बनाइन् । कविता जोशीको बलमा बोल्ड भएकी काजलले २८ रन बटुलिन् । रुबिनाले अप्सरी वेगमसँग दोस्रो विकेटमा ३३ रनको साझेदारी गरिन् । अप्सरीले अविजित ९ रन बनाइन् । सुदूरपश्चिमबाट कविता जोशीले मात्रै एक विकेट लिइन् । प्रदेश १ की कप्तान रुबिना प्लेयर अफ द म्याच भइन् ।

दोस्रो सेमिफाइनलमा टस जितेर पहिले ब्याटिङ गर्दै एपीएफले २० ओभरमा ३ विकेट गुमाएर १ सय २९ रन बनायो । एपिएफकी रोमा थापाले अविजित ४२ रन बटुलिन् । ममता चौधरीले २७, सीता रानामगरले १८, राजमति ऐरी १४ र ज्योति पाण्डेले ११ रन जोडेका थिए । लुम्बिनीका मधु डिसी, नेरी थापा र कृतिका मरासैनीले १–१ विकेट लिए ।

जवाफमा लुम्बिनी प्रदेशले ९१ रनमात्रै बनाउन सक्यो । २० ओभरमा लुम्बिनीले ५ विकेट गुमाई उक्त रन जोडेको हो । लुम्बिनीबाट नेरी थापाले अविजित ३८ र नितु भण्डारीले १८ रन जोडे । तेस्रो विकेटमा नेरी र नितुले ४६ रनको साझेदारी गरेका थिए । एपीएफका रेखा रावलले ३ र सीता रानामगरले १ विकेट लिए । एपीएफकी रोमा थापा प्लेयर अफ द म्याच भइन् ।

प्रकाशित : पुस ११, २०७८ ०७:४१
प्रतिक्रिया
पठाउनुहोस्

सेन्ट्रल जोनमा लगातार तेस्रो जित

कान्तिपुर संवाददाता

काठमाडौँ — घरेलु टोली बंगलादेशलाई ३–० को सोझो सेटमा पराजित गरेसँगै नेपाली महिला टोलीले एभीसी सिनियर वुमेन्स सेन्ट्रल जोन भलिबलमा उपाधि रक्षा अभियान बलियो बनाएको छ । नेपालले यसअघि दुई जित (श्रीलंका र माल्दिभ्सविरुद्ध) हासिल गरिसकेको थियो ।

ढाका मिरपुरस्थित शाहिद सुरवार्दी इन्डोर रंगशालामा शनिबार बंगलादेशविरुद्ध नेपालले प्रभावशाली प्रदर्शन गरेको थियो । पहिलो सेट २५–०५ ले सहजै आफ्नो पक्षमा पारेको नेपालले दोस्रो र तेस्रो सेटमा प्रतिस्पर्धात्मक खेल खेल्दै २५–१५, २५–१७ ले सेट जितेको हो ।

नेपालका मुख्य प्रशिक्षक जगदीश भट्टले बंगलादेशसँग सुधारिएको प्रदर्शन गरेको बताए । समूह चरणका अबका दुई खेलमा नेपाल सम्हालिनुपर्ने उनको भनाइ छ ।

‘उज्वेकिस्तानसँग हामी पहिलोपल्ट खेल्दैछौं । नेपाल, श्रीलंका, उज्वेकिस्तान र किर्गिस्तानको स्तर धेरै तल–माथि छैन । हामीले फाइनलमा आफ्नो दावेदारी पेस गर्न भोलि (आइतबार) को खेलमा सम्हालिनुपर्ने हुन्छ,’ प्रशिक्षक भट्टले कान्तिपुरसँग भने, ‘विपक्षीलाई कमजोर नसोचेर आफ्नो खेल प्रदर्शन गर्न सकियो भने जित निकाल्छौं ।’

नेपालले आइतबार उज्वेकिस्तान र सोमबार किर्गिस्तानसँग खेल्दै छ । पुरुषतर्फ शनिबार नेपाल आफ्नो तेस्रो खेलमा श्रीलंकासँग २५–१८, २२–२५, २५–१६, २५–१५ ले पराजित भयो । नेपालले ३ खेलबाट ३ अंकमात्र जोडेको छ । बंगलादेशसँग पराजित नेपालले साबिक उपविजेता उज्वेकिस्तानलाई हराएर अंक बटुलेको थियो ।

प्रकाशित : पुस ११, २०७८ ०७:३८
पूरा पढ्नुहोस्
प्रतिक्रिया
पठाउनुहोस्
×