सुदूरपश्चिम प्रदेशका आन्तरिक मामिला तथा कानुनमन्त्री प्रकाशबहादुर शाहले प्रदेश प्रहरीको अधिकार हालसम्म पनि प्रदेश सरकार मातहत आउन नसकेकोले आफू 'कानुनमन्त्री' मात्र हुन सकेको तर 'आन्तरिक मामिला मन्त्री' हुन नपाइएको बताएका छन् । उनले प्रदेश प्रहरीको अधिकार छिटो भन्दा छिटो प्रदेश मातहत आउनुपर्ने बताए ।
नेकपा दाहाल–नेपाल समूहका अध्यक्ष पुष्पकमल दाहालले प्रतिगमन र प्रतिक्रान्तिविरुद्ध आफू अन्तिमसम्म लड्न तयार रहेको बताएका छन् । उनले प्रधानमन्त्री केपी शर्मा ओली जस्तो अमानवीय, निर्मोही र रुखो मान्छे अहिलेसम्म नदेखेको बताए । कुनै हालतमा पनि ओलीको प्रतिगामी कदमलाई सफल हुन नदिन आफू फेरि लडाइँको मैदानमा उत्रेको उनको भनाइ थियो ।
नेकपा (दाहाल–नेपाल समूह) का नेता भीम रावलले बहुमतको सरकारले प्रतिनिधिसभा भंग गर्न नपाउने गरी संविधानमा धारा ७६ को व्यवस्था गरिएको बताएका छन् । अन्तर्राष्ट्रिय मान्यताको हास्यास्पद तर्क कानुनले व्याख्या गर्न नमिल्ने उनले बताए ।
प्रधानमन्त्री केपी शर्मा ओलीले ६४ प्रतिशत सांसदको समर्थन प्राप्त प्रधानमन्त्रीका हैसियतले आफूले अन्य विकल्प नभएपछि प्रतिनिधिसभा विघटन गरेको दोहोर्याएका छन् । उनले संसद् चल्न नदिएर निकम्मा बनाउन खोज्ने अवस्था आएपछि ताजा जनादेशका लागि जानुपरेको बताए ।
संघीय सरकारले निश्चित समूहबाहेकलाई शुल्क लिने घोषणा गरेपछि कोरोना परीक्षण गराउनेको संख्या घट्न थालेको छ । प्रदेश सरकारले सबैका लागि निःशुल्क सेवालाई नै निरन्तरता दिएका अस्पताल र प्रयोगशालामा भने स्वाब दिनेको भीड उस्तै छ ।
नेपाली सेनाले महेन्द्रनगरकमा पृथ्वी नारायण शाहको सालिक अनावरण गरेको छ । गुरुपूर्णिमाको अवसर पारेर सेनाको महेन्द्रनगर भगतपुरस्थित २५ नं. वाहिनीको मुल गेटमा आइतबार पृथ्वी नारायण शाहको पूर्ण कदको सालिकको अनावरण गरेको हो ।
सुरुआती चरणमै कोरोनाका पाँच संक्रमित भेटिएको सुदूरपश्चिम प्रदेशले वैशाख लागेयता थप संक्रमण झेल्नुपरेको छैन । पाँचै जना निको भएर घर फर्किसके । तर पनि संक्रमण तीव्र रहेको भारतबाट स्वदेश भित्रिन थुप्रै नेपाली दशगजामा तमतयार बसेकाले यहाँ उच्च जोखिम कायमै छ ।
मंसिरमा दार्चुलाको कालापानी, लिपुलेक र लिम्पियाधुरासमेत नेपाली भूभाग भारतको नक्सामा गाभियो । दार्चुला त्यसबखत पनि शान्त थियो । जनस्तरमा विरोध भएन । ६ महिनापछि भारतले नेपाली भूभाग लिपुलेकमा सडक निर्माण गरी उद्घाटनसमेत गर्यो । अहिलेसम्म दार्चुलामा कुनै असर परेको देखिन्न । सडक उद्घाटन भएको चार दिन बितिसक्यो तर यहाँ सामान्य विरोधसभासमेत भएको छैन ।
