किन दिए १६ रेफ्रीले राजीनामा ?

एन्फाले असोज ७ मा फिटनेस टेस्ट लिएर रेफ्रीहरूलाई सन् २०२२ का लागि अन्तर्राष्ट्रिय फुटबल महासंघ (फिफा) मा नाम पठाएको थियो । उनीहरूले नै मंसिर ३ मा सुरु भएको ‘ए’ डिभिजन लिगका खेलहरू खेलाइरहेका छन् । फेरि पुस ८ गते फिटनेस टेस्ट दिनुपर्ने सूचना पाएपछि रेफ्रीहरूले एन्फा अध्यक्ष शेर्पासमक्ष आग्रह गरेका थिए, ‘हामी फिटनेस टेस्ट दिन्छौं, त्यसका लागि तयारी गर्ने पर्याप्त समय दिनुपर्‍यो कि त लिग सकेपछि टेस्ट लिनुपर्‍यो । लिगका खेल खेलाइरहेको अवस्थामा फिटनेस टेस्ट दिन सम्भव हुन्न । किनभने फिटनेस टेस्ट निकै कठिन हुन्छ र यसको तयारी गर्न कम्तीमा एक महिना लाग्छ । विगतमा हामीले तीन महिनाअघि नै तयारी गर्थ्यौं ।’

रेफ्रीहरू एन्फापरिसरमा देख्नेबित्तिकै अध्यक्ष शेर्पा झोंक्किएका थिए । एक रेफ्रीले भने, ‘अध्यक्षज्यूले तिमीहरू राजनीति गर्न आयो, जुलुस आयो भन्दै हामीलाई धम्क्याउनुभयो । एकदम नराम्रो शब्द प्रयोग गर्दै गालीगलौज गर्नुभयो । हामीलाई हेप्नुभयो । विनातयारी फिटनेस टेस्ट दिदा इन्ज्युर्ड हुने सम्भावना अत्यधिक हुन्छ । त्यसैले टेस्ट अलि पर सारौं भन्दा अध्यक्षले हामीलाई दुर्व्यवहार गर्नुभयो । जहाँ हाम्रो सम्मान छैन, त्यहाँ बसेर के काम भनेर सामूहिक राजिनामा दिएका हौं । अब हामी काम गर्दैनौं ।’

अर्का रेफ्रीले भने, ‘अध्यक्षले औंला ठड्याएर कुरा गर्ने, ठाड्ठाडै गाली गर्ने हामी उहाँको घरमा काम गर्ने मान्छे त होइन नि !’

त्यसपछि चार फिफा रेफ्रीमध्ये नवीन्द्र महर्जन, प्रकाशनाथ श्रेष्ठ, प्रज्वल क्षत्री तथा सबै (६ जना) फिफा सहायक रेफ्रीहरू नानीराम थापामगर, माधव खत्री, युनाल मल्ल, सहदेव श्रेष्ठ, विक्रम चोधरी र किसन यादवले संयुक्त राजीनामा दिएका थिए । उक्त राजीनामा पत्रमा फिफा रेफ्री कविन व्यञ्जनकारको नाम समावेश भए पनि उनले हस्ताक्षर गरेका छैनन् । युनालको पनि हस्ताक्षर छैन । मौखिक सहमतिमा उनको नाम समावेश गरिएको बताएका छन् । पछि दबाबमा नेपाली सेनाका विक्रम र माधवले राजीनामा फिर्ता गरेको बताएका छन् । उनीहरूले राजीनामाको कारण उल्लेख नगरे पनि ‘चलिरहेको कतार एयरवेज सहिद स्मारक ‘ए’ डिभिजन लिग २०२१/२२ मा सहभागी नहुने’ लेखेका छन् ।

फिफा रेफ्री र सहायक रेफ्रीहरूले संयुक्त राजीनामा दिएको केही घण्टापछि १४ जनामध्ये ९ राष्ट्रिय रेफ्री शुक्र तामाङ, प्रकाश भुजेल, श्याम दनुवार, प्रजेश अमात्य, हरिश कार्की, मधुकर आचार्य, ज्ञान तामाङ, सविन ढकाल र उमेश बिडारीले पनि ‘फिफा रेफ्री तथा सहायक रेफ्रीहरूले दिएको राजीनामाप्रति समर्थन गर्दै जारी लिगमा सहभागी नहुने’ उल्लेख गर्दै संयुक्त राजीनामा गरेका हुन् । सविनले भने हस्ताक्षर गरेका छैनन् । सेनाका विश्वास कार्की, प्रवीन गौतम, सुमन श्रेष्ठ, गणेश चौधरी र धनकुटाका तुफान लिम्बुले मात्रै राजीनामा दिएनन् । एन्फाले गत साउनमा भारतका पूर्वफिफा रेफ्री गौतम कौरलाई रेफ्री निर्देशक नियुक्त गरेको थियो । नेपाली रेफ्रीहरू उनीसँग पनि रुष्ट छन् ।

दुर्व्यवहार नगरेको दाबी

एन्फा अध्यक्ष शेर्पाले रेफ्रीहरूप्रति आफूले दुव्यर्वहार गरेको अस्वीकार गर्दै भने, ‘रेफ्रीहरूको डेलिगेसन आएको सुनें । डेलिगेसन आउँदा समय लिएर आउनुपर्छ, त्यसरी आएनन् । मैले उनीहरूलाई हलमा कुर्नु भनें । उनीहरू निवेदन ल्याएर आए । फिटनेस टेस्ट लिगपछि गरौं भन्ने कुरा भयो । त्यो कुरा विभाग (रेफ्री) ले हेर्ने हो, त्यसबारे मलाई थाहा छैन भनेको हुँ । मैले त्यतिमात्र भनेको हो ।’

राजीनामा दिएका रेफ्रीहरूले लिगमा सहभागी नहुने जानकारी दिएका छन् । त्यसैले २४ जनामध्ये १६ रेफ्रीको राजीनामाले दशरथ रंगशालामा भइरहेको ‘ए’ डिभिजन लिग प्रभावित हुनसक्ने भएको छ । यसबारे, ‘अध्यक्ष शेर्पाले भने, ‘लिग भइहाल्छ नि ! कसले रोक्छ र ?’