यू–१९ राष्ट्रिय क्रिकेट प्रतियोगिता : वाग्मतीको झिनो आस- खेलकुद - कान्तिपुर समाचार

यू–१९ राष्ट्रिय क्रिकेट प्रतियोगिता : वाग्मतीको झिनो आस

कान्तिपुर संवाददाता

काठमाडौँ — वाग्मती प्रदेशले मंगलबार कर्णाली प्रदेशमाथि १ विकेटको रोमाञ्चक जित हात पार्दै वाइवाइ यू–१९ राष्ट्रिय क्रिकेट प्रतियोगिताको फाइनल प्रवेश गर्ने झिनो आस कायमै राखेको छ । मूलपानी क्रिकेट मैदानमा ७९ रनको विजय लक्ष्य पाएको वाग्मतीका लागि गौतम केसीले छक्का प्रहार गर्दै जित दिलाए । 

सानो लक्ष्य लिएर आए पनि वाग्मतीले २० ओभरको चौथो बलमा ७५ रन बनाउँदा ८ विकेट गुमाइसकेको थियो । त्यसको अर्को बलमा विपुल खनाल १ रनमै रनआउट भएपछि स्ट्राइकमा आएका उपकप्तान गौतमले प्रकाशको बलमा छक्का प्रहार गरे । गौतम ३ बलमा ७ रन बनाई अविजित रहे ।

विवेक मगर १८, उत्तम मगर ११ र क्रिस कार्की १२ रनमा आउट भए । विपिन शाही ८, फरिद खान शून्य, कप्तान प्रतिश जिसी ९, प्रशान्त महत १, स्वप्निलसिंह अधिकारी ४ रनमा आउट भए । कर्णालीका अनुज चुनाराले ५ विकेट लिए । उनले ८ ओभरमा १ मेडन राख्दै ३७ रन खर्चे । प्रकाश, युनिश सिंह र सुवास ऐरले १–१ विकेट लिए ।

यसअघि टस हारेपछि ब्याटिङमा आएको कर्णाली २७.१ ओभरमा ७८ रनमा अलआउट भयो । कप्तान निश्चल रावल (१५), सन्दीप शाही (१४), विपिन रावल (१२) र रुपक दाहाल (१०) बाहेक अन्यले दोहोरो स्कोर बनाउन सकेनन् । प्लेयर अफ द म्याच गौतमले ४ विकेट लिए । उनले ६.१ ओभरमा ३ मेडन राख्दै १० रनमात्र खर्चेका थिए । विशाल यादवले ५ ओभरमा ३ मेडन राख्दै ११ रन खर्चेर ३ विकेट लिए । क्रिसले २ र विपुलले १ विकेट बाँडेका थिए ।

वाग्मती पाँचौं खेलमा दोस्रो जित हात पार्दै सात प्रदेश सहभागी प्रतियोगिताको अंकतालिकामा चौथो स्थानमा उक्लेको छ । शीर्ष दुई टोलीले फाइनल खेल्ने प्रावधान छ । लुम्बिनी प्रदेश ८ र प्रदेश एक ६ अंकसहित पहिलो दुई स्थानमा छन् । सुदूरपश्चिम, वाग्मती, प्रदेश २ र गण्डकीको समान ४ अंक छ । ५ खेलमा एकमात्र जित हात पारेको कर्णाली प्रतियोगिताबाट बाहिरिसकेको छ ।

सुदूरपश्चिमले त्रिवि क्रिकेट मैदान कीर्तिपुरमा भएको खेलमा गण्डकीलाई ४ विकेटले हरायो । अर्जुन साउदले ६८ रन बनाउँदै सुदूरपश्चिमलाई जित दिलाए । उनले ७९ बल खेल्दै ६ चौका र २ छक्का प्रहार गरेपछि सुदूरपश्चिमले ४ बलअगाडि २ सय १० रनको विजय लक्ष्य २ सय १२ रन बनाएर पूरा गरेको थियो । प्लेयर अफ द म्याच अर्जुन ४८ औं ओभरमा आउट भए ।

गजेन्द्र बोहरा २, नरेश भट्ट १३ र लोकेश बम १५ रनमा आउट भएपछि अर्जुनले कप्तान खडक बोहरासँग चौथो विकेटमा ५०, राहुल भण्डारीसँग छैटौं विकेटमा ६५ रनको साझेदारी गरे । खडकले ७७ बल खेल्दै ४० र राहुलले ४२ बल खेल्दै ४२ रन बनाए । दुवैले समान ४ चौका प्रहार गरे । वसन्त कार्की ११ रनमा आउट भए । गण्डकीका सुवास भण्डारीले १० ओभरमा ३ मेडन राख्दै २१ रन खर्चेर ३ विकेट, सुदीप अर्यालले २ र अर्जुन कुमालले १ विकेट लिए ।

यसअघि गण्डकी ४९ ओभर खेल्दै २ सय ९ रनमा अलआउट भयो । दीपक डुम्रेले ५६ र ओपनर उत्सव श्रेष्ठले ४० रन बनाए । दीपकले ९९ बलमा ७ चौका र उत्सवले ५२ बलमा ५ चौका र २ छक्का प्रहार गरे । अर्जुन १३, कप्तान विष्णु पाण्डे ११, सुवास २८, कमल परियार २० र सुजन गौतम १० रनमा आउट भए । सुदूरपश्चिमका कैलाश ऐरीले ३, आकाश चन्द र गजेन्द्र बोहराले २–२ तथा नारायण जोशीले १ विकेट लिए ।


प्रकाशित : मंसिर १४, २०७८ २१:५०
प्रतिक्रिया
पठाउनुहोस्

पत्रकार सहकारी बनाउन अर्थमन्त्री शर्माको आग्रह

रासस

काठमाडौँ — अर्थमन्त्री जनार्दन शर्माले सामुदायिक पूँजी निर्माण गर्न पत्रकार सहकारी बनाएर उत्पादनमा सञ्चारकर्मी पनि जोडिनुपर्ने बताएका छन् । प्रेस सेन्टर नेपाल ललितपुर शाखाको चौथो जिल्ला अधिवेशनलाई मंगलबार सम्बोधन गर्दै उनले पत्रकारले पत्रकार सहकारी बनाएर जान सक्ने बताएका हुन् ।

पत्रकारिता पेसा मात्र नभएर अरू हिसाबले पनि आत्मनिर्भर र उत्पादनसँग जोडिन पत्रकारको सहकारी समूह बनाउन सकिने मन्त्री शर्माको भनाइ छ । 'पत्रकारिता मात्र पूर्ण पेसा नभएर अरू हिसाबले पनि आत्मनिर्भर हुनका लागि पत्रकारको सहकारी समूह बनाएर तपाईंहरू सञ्चालन गर्न सक्नुहुन्छ', उनले भने, 'एकातिर आत्मनिर्भर हुँदै पनि जाने र सामुदायिक शक्ति तथा क्षमतालाई पनि विकास गर्दै जाने गर्न सक्नुहुन्छ ।' त्यसबाट समग्र सामाजिक तथा राजनीतिक विचारलाई पनि स्थापित गर्दै लान सकिने उनले बताए ।

मन्त्री शर्माले तत्काल राष्ट्रिय पूँजी निर्माण हुने सम्भावना कम रहेकाले पहिले सामुदायिक पूँजी निर्माण गर्नुपर्नेमा जोड दिए । उनले व्यक्तिगत प्रतिस्पर्धालाई पनि कायम गरी समुदायलाई बलियो बनाउन स्रोत र साधनको स्वामित्व समुदायलाई प्रदान गर्नुपर्ने उल्लेख गरे ।

पत्रकारलाई गलत अवस्थामा पार्टीको आलोचना गर्ने स्वतन्त्रता रहेको पनि उनले बताए । आस्थाकै आधारमा गलत कार्य तथा प्रवृत्तिको आलोचना गर्न नपाउने भन्ने नहुने मन्त्री शर्माको भनाइ छ ।

सम्मेलनले रामहरि कार्कीको अध्यक्षतामा कार्यसमिति चयन गरेको छ ।

प्रकाशित : मंसिर १४, २०७८ २१:४१
पूरा पढ्नुहोस्
प्रतिक्रिया
पठाउनुहोस्
×