बेलबारी गोल्डकप यसै साता- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

बेलबारी गोल्डकप यसै साता

कान्तिपुर संवाददाता

विराटनगर — डाँगीहाट युथ क्लब मोरङको आयोजनामा कात्तिक ११ देखि चौथो बेलबारी गोल्डकप फुटबल प्रतियोगिता हुने भएको छ । आयोजकले जनाएअनुसार विजेताले ५ लाख र उपविजेताले २ लाख ५० हजार रुपैयाँ पुरस्कार पाउनेछन् ।

लक्ष्मीमार्ग खेल मैदानमा हुने प्रतियोगितामा एपीएफ क्लब, हिमालयन शेर्पा, च्यासल युथ, आयोजक बेलबारी युथ, रोलिङ क्लब झापा, गाईघाट फुटबल क्लब, उदयपुर, राजारानी क्लब धनकुटा र रोयल फुटबल क्लब सिलिगुडीले भाग लिने क्लबका अध्यक्ष विक्रम वान्तवा राईले बताए ।

कोरोना संक्रमणका कारण दुई वर्ष सञ्चालन हुन नसकेको प्रतियोगितालाई यसपालि बेलबारी नगरपालिकाले १० लाख आर्थिक सहयोग उपलब्ध गराएको छ । कात्तिक १७ सम्म चल्ने प्रतियोगितामा करिब ४० लाख रुपैयाँ खर्च हुने अनुमान गरिएको छ । प्रत्येक खेलका म्यान अफ द म्याचलाई ५ हजार र विधागत उत्कृष्ट हरेक खेलाडीलाई जनही ११ हजार पुरस्कारको व्यवस्था गरिएको अध्यक्ष राईले बताए ।

...

सिद्धार्थ र सपना विजेता

सिन्धुपाल्चोक– बाह्रबिसे नगरपालिका–४ द्वारा आयोजित बाह्रबिसे युथ दौड प्रतियोगिताको उपाधि बाह्रबिसेकै सिद्धार्थ तामाङले जितेका छन् । शनिबार उनले बाह्रबिसे नगरको बाह्रबिसे हुँदै कल्लेरीसम्मको ५ किलोमिटर दुरी २० मिनेट ५ सेकेन्डमा पूरा गर्दै २५ हजार रुपैयाँसहित ट्रफी जितेका थिए । बाह्रबिसेकै विशाल भुजेलले २१ मिनेट ३५ सेकेन्डबाट दोस्रो भए । उनले १८ हजार पुरस्कार पाए । २२ मिनेट ४५ सेकेन्डबाट तेस्रो भएका बाह्रबिसेकै एटिप श्रेष्ठले १२ हजार पुरस्कार हात पारे । महिलातर्फ निर्धारित दूरी १६ मिनेट ५ सेकेन्डबाट पूरा गरेकी बाह्रबिसेकी सपना बस्नेतले उपाधि जितिन् । उनले २० हजार पुरस्कार जितिन् । १७ मिनेट २५ सेकेन्डबाट जानु घिसिङ दोस्रो हुँदै १३ हजार र १७ मिनेट ५६ सेकेन्डबाट तेस्रो हुँदै सुजिता तामाङ ९ हजार रुपैयाँ जित्न सफल भए । दौडका विजेतालाई पूर्वमन्त्री मोहनबहादुर बस्नेतले पुरस्कृत गरेका थिए ।

प्रकाशित : कार्तिक ७, २०७८ ०७:२९
प्रतिक्रिया
पठाउनुहोस्

आर्मी र भनीमण्डल विजयी

कान्तिपुर संवाददाता

काठमाडौँ — मेयर कप भेट्रान्स फुटबलमा शनिबार पहिलो दिन त्रिभुवन आर्मी भेट्रान्स र भनीमण्डल क्लबले विजयी सुरुआत गरेका छन् । फ्रेन्ड्स र सानो गौचरन नाइट किङ क्लब (एसएनकेसी) ले भने २–२ गोलको बराबरी खेलेका छन् ।

दशरथ रंगशालामा समूह ‘ए’ मा आर्मीले फुटबल फेलोसिप क्लबलाई ७–१ गोलले पराजित गर्दा विकर्ण श्रेष्ठले ह्याट्रिक पूरा गरे । विकर्णले २०, २८ र अन्तिम मिनेटमा गोल गरे । खेल ६० मिनेटको हो । हरि महतोले १७ औं मिनेटमा गोल गरी आर्मीलाई अग्रता दिलाए । पहिलो हाफमै आर्मीलाई ५–१ को अग्रता दिलाउने क्रममा राजु तामाङ (२६) र जनमत कार्की (३०) ले पनि गोल गरे । आर्मीका चक्र तामाङले ४० औं मिनेटमा गोल गरे । फेलोसिपका नन्दनाथ खड्गीले २१ औं मिनेटमा एक गोल फर्काए ।

समूह ‘बी’ मा भनीमण्डल भेट्रान्सले न्युरोड टिम भेट्रान्सलाई २–० ले हरायो । भनीमण्डलका विजय श्रेष्ठले पहिलो हाफको इन्ज्युरी समयमा गोल गरी अग्रता दिलाए । अन्तिम ४ मिनेटअघि कृष्ण मालाकारले गोल गरी २–० को जित निश्चित गरे । समूह ‘सी’ का फ्रेन्ड्स र एसएनकेसीले २–२ गोलको बराबरी खेल्दै अंक बाँडे ।

फ्रेन्ड्सका तेज थापाले पाँचौं मिनेटमा दिलाएको अग्रतामा दोस्रो हाफको सुरुमै बालगोपाल साहुखलले बराबरी गोल फर्काए । राजेश शाहीले ४५ औं मिनेटमा एसएनकेसीलाई अग्रता दिलाए पनि फ्रेन्ड्सका मनोज लामाले ५५ औं मिनेटमा गोल गरे ।

प्रकाशित : कार्तिक ७, २०७८ ०७:२८
पूरा पढ्नुहोस्
प्रतिक्रिया
पठाउनुहोस्
×