फुटबलर कमल बागलुङमा सम्मानित- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

फुटबलर कमल बागलुङमा सम्मानित

बागलुङ

काठमाडौँ — तेह्रौं साफ च्याम्पियनसिपमा उपविजेता भएर घर फर्केका बागलुङका फुटबलर कमल थापा गृहजिल्लामा सम्मानित भएका छन् । बागलुङ जेसिजले शनिबार उनलाई उत्कृष्ट युवा सम्मान प्रदान गरेको हो । बागलुङ नगरपालिका–१० भकुन्डे घर भई हिमालयन शेर्पा क्लबमा अनुबन्धित कमलले माल्दिभ्समा सम्पन्न साफ च्याम्पियनसिप खेलेका थिए ।

फाइनल पुगेको नेपाल भारतसँग पराजित भएको थियो । २०५३ सालमा जन्मेका कमलले नेपाली राष्ट्रिय टोलीबाट उत्कृष्ट खेल प्रदर्शन गर्न गरेका थिए । बागलुङ जेसिजका अध्यक्ष आनन्दप्रसाद रेग्मीले भने, ‘हामीले १८ देखि ४० वर्षका युवाको सम्मान, उनीहरूको क्षमता विकास र नेतृत्व विकासमा काम गर्छौं, कमलले विद्यालय तहदेखि नै देखाएको लगनशीलता र क्षमताको कदर मात्रै गरेका हौं ।’ बागलुङस्थित कालीगण्डकी माविमा पढ्दा पनि उनी फुटबलका राम्रा खेलाडीमा पर्दथे ।

उनको सम्मानले राष्ट्रिय फुटबल टिमकै सम्मान भएको महसुस भएको जिल्ला फुटबल संघ बागलुङका अध्यक्ष रामराज गुरुङले बताए ।

यसअघि उनले बागलुङमा सम्पन्न मेयर कप फुटबलमा पनि उत्कृष्ट खेलाडीको पुरस्कार थापेका थिए । जेसिजले सप्ताहव्यापी कार्यक्रमअन्तर्गत कमलसँगै सामाजिक सेवामा लागेका २८ वर्षीया सुमिरा लामालाई पनि सम्मान गरेको छ ।

प्रकाशित : कार्तिक ७, २०७८ ०७:२७
प्रतिक्रिया
पठाउनुहोस्

प्रेरणा अल इन्डिया च्याम्पियन

कान्तिपुर संवाददाता

काठमाडौँ — नेपाली टेनिस खेलाडी प्रेरणा कोइरालाले अखिल भारत टेनिस संघद्वारा आयोजित यू–१८ च्याम्पियन टेनिस सिरिजमा महिला सिंगल्सको उपाधि जितेकी छन् ।

भारतमा आयोजित उमेर समूहको प्रतियोगिता जित्ने प्रेरणा पहिलो नेपाली खेलाडीसमेत बनेकी छन् । उनले छनोट खेल जितेर मुख्य प्रतियोगितामा प्रवेश पाएकी थिइन् । ‘यू–१४ तर्फको प्रतियोगिता खेले पनि त्यसयता भारतमा कुनै पनि प्रतियोगिता नखेलेका कारण भारतीय टेनिस संघको मापदण्डमा पर्न छनोट खेल खेल्नैपर्ने थियो,’ प्रेरणाका बुबा पुरुषोत्तम कोइरालाले कान्तिपुरसँग भने, ‘छनोट चरण पार गरेर मुख्य प्रतियोगिताको उपाधि नै जितेपछि अन्य अन्तर्राष्ट्रिय प्रतियोगिताका लागि उनलाई उत्साह बढाएको छ ।’

१७ वर्षीया प्रेरणाले शुक्रबार सम्पन्न फाइनलमा यो उमेर समूहमा भारतकी नम्बर एक खेलाडी कौशिला मोदीविरुद्ध २–१ को सेटमा पुनरागमन जित निकालेकी हुन् । पहिलो सेट टाइब्रेकमा गुमाएकी उनले त्यसपछि लगातार दुई सेट ६–३, ६–३ ले जितेर इतिहास रचिन् । उपाधि जित्दासम्म उनले लगातार ७ खेल जितेकी हुन् ।

सन् २०२० को फेब्रुअरीमा यू–१८ जे–५ प्रतियोगितामा नेपालकै अभिलाशा विष्टलाई हराएर उपाधि जितेकी प्रेरणा त्यसको एक वर्षपछि आयोजित सोही प्रतियोगितामा पहिलो खेलमै पराजित भएकी थिइन् । सोही उमेर समूहमा जे–४ तर्फ पनि उनको प्रदर्शन सन्तोषजनक थिएन ।

प्रेरणाले दुई वर्षअघि नेपालमै सम्पन्न १३ औं दक्षिण एसियाली खेलकुदमा उत्कृष्ट प्रदर्शनका साथ तीन कांस्य पदक जितेकी थिइन् । उनले महिला सिंगल्स, टिम र डबल्समा कांस्य जितेकी हुन् ।

प्रकाशित : कार्तिक ७, २०७८ ०७:२२
पूरा पढ्नुहोस्
प्रतिक्रिया
पठाउनुहोस्
×