साफ च्याम्पियनसिप : अपेक्षित टिम, रोहितले विराजको बराबरी गर्दै- खेलकुद - कान्तिपुर समाचार

साफ च्याम्पियनसिप : अपेक्षित टिम, रोहितले विराजको बराबरी गर्दै

हिमेश

माले — नेपालले साफ च्याम्पियनसिप २०२१ मा बुधबार बंगलादेशको सामना गर्दैछ र त्यसमा जित अथवा बराबरीको नतिजाबाट नेपालले फाइनलको यात्रा तय गर्नेछ ।

राउन्ड रोबिनको आधारमा चलिरहेको प्रतियोगितामा नेपालले आफ्नो अन्तिम खेलका लागि मुख्य प्रशिक्षक अब्दुल्लाह अल्मुताइरीले टिम पनि घोषणा गरेका छन् ।

त्यसमा कप्तान किरण लिम्बूसँगै दिनेश राजवंशी, अनन्त तामाङ, गौत्तम श्रेष्ठ, पुजन उपरकोटी, तेज तामाङ, अञ्जन विष्ट, सुजल श्रेष्ठ, नवयुग श्रेष्ठ, आयुष घलान र रोहित चन्द रहेका छन् । हार जोगाउनु पर्ने खेलका लागि प्रशिक्षक अल्मुताइरीले अपेक्षित जितको घोषणा गरेका छन् ।

यस खेलबाट रोहितले नेपालका लागि सर्वाधिक खेल खेलेको तथ्यांकमा पूर्व कप्तान विराज महर्जनको बराबरी गरेका छन् । नेपाली राष्ट्रिय टिमबा सन्यास लिइसकेको विराजले ७३ क्याप जितेकोमा अब रोहितले बंगलादेशविरुद्धको खेलसँगै त्यसको बराबरी गरेका छन् र संयुक्त रूपमा दोस्रो स्थानमा उक्लेका छन् । किरणले भने बंगलादेशविरुद्धको खेलबाट कीर्तिमान ७८ औं क्याप जितेका छन् ।

साफ च्याम्पियनसिपको इतिहासमा नेपाल र बंगलादेशबीच अहिलेसम्म सात खेल भएकोमा त्यसमध्ये नेपाल तीनमा विजयी रहेको छ भने चार खेल बंगलादेशको पक्षमा रहेको छ । त्यसमध्ये पछिल्ला तीन खेलमा नेपाल लगातार विजयी रहेको छ । समग्रमा नेपाल र बंगलादेशबीच अहिलेसम्म २३ खेल भएका छन् ।

त्यसमध्ये नेपालमा सातमा विजयी रहेको छ भने चार खेल बराबरीमा टुंगेका छन् । बाँकी १२ खेलमा भने बंगलादेशले जित निकालेको छ । यी दुई टिमबीचका पहिला पाँच खेलमा नेपाल दुईमा विजयी रहेको छ । यस्तै दुई खेल बराबरीमा टुंगेको छ भने एक खेलमा बंगलादेशले सफलता चुमेको छ ।

प्रकाशित : आश्विन २७, २०७८ १५:४३
प्रतिक्रिया
पठाउनुहोस्

संसद चलाउनेबारे सबैले आत्मसमिक्षा गरौं: सभामुख सापकोटा

कान्तिपुर संवाददाता

काठमाडौँ — सभामुख अग्निप्रसाद सापकोटाले संसद सुचारु गराउन नेकपा एमालेसँग छलफलको लागि तयार रहेको बताएका छन् । सभामुख सापकोटाले संसद चलाउनका लागि संवादको विकल्प नभएकोले सरोकारवाला सबै पक्ष संवादमा आउनुपर्ने उल्लेख गरे ।

बुधवार न्यूज एजेन्सी नेपालसँगको कुराकानीमा उनले संसदको गरिमा बढाउन सबैको भूमिका बराबर रहेको उल्लेख गर्दै आफू प्रतिपक्ष दल नेकपा एमालेसँग छलफलका लागि तयार रहेको बताएका हुन् । सभामुख सापकोटाले आफूले सकेसम्म तटस्थ बसेर निर्णय लिएको बताउँदै सबैले आफूले गरेको कामको समिक्षा गरेर संवादमा आउनुपर्ने बताए ।

‘म अझै के भन्छु भने पहिला हाम्रो संवाद भइरहेको थियो, अहिले विवाद भइरहेको छ,अन्तिममा फेरि वादविवाद, संवादको विकल्प छैन, ढिलो चाँडो संवादमा उहाँहरू आउनुहुन्छ भन्ने छ’ सभामुख सापकोटाले भने । उनले संसदको गरिमा बढाउनका लागि हामी सबैको दायित्व उत्तिकै रहेको उल्लेख गरे । ‘के पक्ष, के विपक्ष, सबैभन्दा बढी भूमिका त सदनको हिसावले सभामुखको नै हो, के गर्नुपर्छ त्यसको लागि म तयार छु, तर सरकार, सभामुख, विपक्षी दलको नेताको र समस्त सांसदहरुको सबै दायित्व हुन्छ’ उनले भने ।

उनले सभामुखको जिम्मेवारी प्राप्त भइसकेपछि आफूले पनि तटस्थ, निष्पक्ष र स्वतन्त्र भूमिका खेलेको बताए । ‘मैले संविधान र खासगरी प्रतिनिधिसभाको नियमावलीमा टेकेरै आफ्ना कार्य सम्पादन गर्नुपर्छ, मैले फेरि फर्केर सबै कामको समिक्षा गर्ने कुरा हुन्छ, उहाँहरूले पनि समिक्षा गर्नुहुन्छ भन्ने आशा छ, हामी सबैले समिक्षा गरौं र सकारात्मक सोचका साथ संवाद थालौं, जतिसुकै ठूलो समस्या भएपनि संवादको विकल्प छैन, समन्वय, सहकार्य र समझदारी नै हो’ सभामुख सापकोटाले भने । संसदमा अहिलेका समस्या समाधान गर्नका लागि १५ दिनको समय रहेकाले त्यतिन्जेल सम्म सकारात्मक वातावरण बन्नेमा आफू आशावादी रहेको उनले बताए ।

प्रकाशित : आश्विन २७, २०७८ १४:००
पूरा पढ्नुहोस्
प्रतिक्रिया
पठाउनुहोस्
×