बेन्जेमाको ह्याट्रिकमा रियल विजयी

म्याड्रिड — करिम बेन्जेमाको ह्याट्रिकमा रियल म्याड्रिडले स्पेनी ला लिगामा आइतबार सेल्टा भिगोलाई ५–२ ले हराएको छ । रियलले ५ सय ६० दिनपछि पहिलोपल्ट आफ्नो घरेलु मैदान बर्नाबाउमा खेलेको हो ।

खेलमा भने रियल दुई पल्ट पछाडि रहेर पनि शानदार जित निकाल्न सफल भएको हो । बेन्जेमाले २४ र ४६ मिनेटमा दुई गोल गरेपछि ८७ औं मिनेटमा पेनाल्टीबाट गोल गर्दै ह्याट्रिक पूरा गरे ।

रियलले सन् २०२० को मार्च १ मा अन्तिम पटक बर्नाबाउमा खेलेको थियो र त्यति बेला उसले बार्सिलोनालाई हराएको थियो । आइतबारको खेल हेर्न ३० हजार दर्शक उपस्थिति थिए र रंगशाला पुनर्निर्माण कार्य अझै सकिएको छैन ।

तस्बिरहरू : रोयटर्स