चितवनमा ट्यालेन्ट हन्टबाट ५ खेलाडी- खेलकुद - कान्तिपुर समाचार

चितवनमा ट्यालेन्ट हन्टबाट ५ खेलाडी

कान्तिपुर संवाददाता

चितवन — चितवन टाइगर्सले चौथो संस्करणको बजाज पल्सर एभरेस्ट प्रिमियर लिग (ईपीएल) ट्वान्टी–२० क्रिकेटका लागि मंगलबार भरतपुरमा ट्यालेन्ट हन्टबाट ५ खेलाडी लिएको छ । त्यसमध्ये दुई खेलाडीले टिममा रहेर प्रतिस्पर्धा गर्ने अवसर पाउनेछन् । 

काठमाडौंको कीर्तिपुरस्थित त्रिवि क्रिकेट मैदानमा असोज ९ देखि हुनेछ । चितवन टाइगर्सका प्रमुख किशोर भट्टराईले ५ खेलाडीमध्ये गौतम केसी टिममा छनोट भइसकेको जानकारी दिए । उनका अनुसार बाँकी चार खेलाडी कृजन गुरुङ, संघर्ष पौडेल, राजेश ढकाल र आकाश थापामध्ये एकजना छनोट हुनेछन् । उनीहरू शुक्रबार काठमाडौं जानेछन् । टिमसँगै बन्द प्रशिक्षणमा रहनेछन् । उनीहरूको प्रदर्शनका आधारमा असोज २ देखि थप एकलाई टिममा सहभागी गराइने छ ।

टाइगर्समा कप्तान सोमपाल कामी छन् । कमलसिंह ऐरी, शाहब आलम, इशान पाण्डे, ललितसिंह भण्डारी, दीलिप नाथ, सागर ढकाल, राजेश पुलामी मगर, हसिम अन्सारी, भीम सार्की, खडकबहादुर बोहरा, आदिल खान, सन्दीप सुनार, देवराज खनाल सामेल छन् । श्रीलंकाका सोकुगे प्रसन्न, अफगानिस्तानका मोहम्मद शाहजाद र करिम जन्नत टाइगर्समा छन् ।

चितवन टाइगर्सका विदेशी खेलाडीमा पाकिस्तानका डानिस अजिज र मलेसियाका वीरनदीप सिंह पनि छन् । देश विदेशका खेलाडीहरू सामेल ‘सशक्त टिम’ बाट खेल्ने अवसर पाउन लागेकामा गौरव अनुभव भएको गौतम केसीले बताए । १८ वर्षे गौतम नारायणगढ लायन्सचोकमा हुन् । उनी २०७५ सालमा यू–१९ क्रिकेटमा मध्यमाञ्चल कप्तान थिए ।

उनले प्रधानमन्त्री कप क्रिकेटमा वाग्मती प्रदेशबाट खेलेका थिए । ईपीएलमा तेस्रो प्रयासमा टिममा परेको उनले सुनाए । ‘चितवनमा सम्भावना बोकेका धेरै खेलाडी छन् । ट्यालेन्ट हन्टले उनीहरूलाई खुल्न मदत गर्दछ,’ चितवन जिल्ला क्रिकेट संघका अध्यक्ष कैलाश प्रधानले भने ।

प्रकाशित : भाद्र २३, २०७८ ०८:०५
प्रतिक्रिया
पठाउनुहोस्

फ्रेन्चाइज लिग भलिबल हुने

कान्तिपुर संवाददाता

काठमाडौँ — फुटबल र क्रिकेटपछि भलिबलमा पनि व्यावसायिक फ्रेन्चाइज प्रतियोगिताको सुरुआत हुने भएको छ । पुरुष र महिलाको नेपाल सुपर लिग (एनएसएल) फ्रेन्चाइज भलिबल प्रतियोगिता आयोजना गर्न नेपाल स्पोर्ट्स एन्ड इभेन्ट म्यानेजमेन्ट कम्पनी र नेपाल भलिबल संघबीच १० वर्षे सम्झौता भएको छ । 

मंगलबार सम्झौतापत्रमा हस्ताक्षर गर्दै दुवै पक्षले यो कदमलाई नेपाली भलिबल विकासको कोसेढुंगा मानेका छन् । फ्रेन्चाइज भलिबलले अन्तर्राष्ट्रियस्तरमा नेपालको स्तर वृद्धि हुने, राष्ट्रिय खेलको प्रचारमा सहयोग पुग्ने र नयाँ खेलाडी उत्पादन गर्ने उद्देश्य उनीहरूको छ । यसअघि फुटबलको फ्रेन्चाइज प्रतियोगिता आयोजना गरिसकेको नेपाल स्पोर्टस एन्ड इभेन्ट म्यानजमेन्ट (एनएसईएम) ले मंसिर महिनामा यो प्रतियोगिता गर्ने लक्ष्य राखेको छ । नोभेम्बर १७ देखि डिसेम्बर १७ सम्मको मिति तय गरेको छ । सम्झौताअनुसार प्रतियोगिताको प्राविधिक जनशक्ति, कभर्डहल, विदेशी र स्वदेशी खेलाडीको व्यवस्थापन जिम्मा नेपाल भलिबल संघको छ । प्रतियोगिता सम्पन्न गर्न आवश्यक आर्थिक र व्यवस्थापकीय काम एनएसईएमले गर्नेछ ।

महिलातर्फ ७ र पुरुषतर्फ ७ टिमको सहभागिता रहने बताइएको छ । सम्झौतामा प्रतियोगिताको नाफाबाट ३० प्रतिशत रकम एनएसईएमले नेपाल भलिबल संघलाई दिनुपर्नेछ । त्यसबाहेक भलिबल संघको वार्षिक कार्यक्रमका रुपमा रहेको एनभीए क्लब च्याम्पियनसिपको आयोजनाका लागि नेपाल स्पोर्ट्स एन्ड इभेन्टले ३० लाख रुपैयाँ बराबरको प्रायोजन गर्नेछ । यसअघि क्रिकेट र फुटबलमा मात्र व्यावसायिक फ्रेन्चाइज प्रतियोगिता आयोजना हुँदै आएकोमा भलिबलमा पहिलो प्रयोग गर्न लागिएको हो । फ्रेन्चाइज टिम मालिकले महिला र पुरुष दुवै टिमको स्वामित्व लिन चाहेको अवस्थामा पनि पाउने व्यवस्था गरिएको एनएसईएमका निर्देशक सुदीप शर्माले जानकारी दिए ।

पहिलो संस्करणको प्रतियोगिता काठमाडौंमा गर्ने तयारी भए पनि आगामी वर्षदेखि फ्रेन्चाइज नाम भएका सहरमा होम एन्ड अवेका आधारमा गर्ने तयारी एनएसईएमको छ । प्रतियोगिता आयोजक कम्पनीकी प्रबन्ध निर्देशक आश्रेयता कार्की चौधरीले नेपाली राष्ट्रिय टोलीलाई अन्तर्राष्ट्रियस्तरमा अझै प्रतिस्पर्धात्मक र क्षमतावान बनाउन यो प्रतियोगिताले सहयोग गर्ने अपेक्षा गरिन् । ‘एनएसएल फुटबलको सफलताले हामीलाई खेलकुदमा अझै धेरै प्रतियोगिता आयोजना गर्नुपर्छ भन्ने आवश्यक महसुस गरायो,’ उनले भनिन् ।

राष्ट्रिय खेलकुद परिषदका सदस्य–सचिव रमेशकुमार सिलवालले फ्रेन्चाइज प्रतियोगिताले घरेलु भलिबललाई व्यावसायिक बनाउनुका अलावा खेलाडी र प्रशिक्षकले नियमित अभ्यासमार्फत क्षमता देखाउने अवसर पाउने र त्यसले घरेलु भलिबल प्रतिस्पर्धात्मक हुने बताए ।

प्रकाशित : भाद्र २३, २०७८ ०८:०४
पूरा पढ्नुहोस्
प्रतिक्रिया
पठाउनुहोस्
×