म्यानचेस्टरको जित- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

म्यानचेस्टरको जित

एएफपी

लन्डन — म्यानचेस्टर युनाइटेडले इंग्लिस प्रिमियर लिग फुटबलमा आइतबार एस्टन भिल्लालाई ३–१ ले हराएको छ । यो जितपछि म्यानचेस्टर शीर्षस्थानको म्यानचेस्टर सिटीसँग १० अंकको दूरीमा रहन सफल भयो ।

एस्टन भिल्लाविरुद्ध गोल गरेपछि म्यानचेस्टर युनाइटेडका एडिसन काभानी । तस्बिर : एपी

त्यसमा म्यानचेस्टरका लागि ब्रुनो फर्नान्डेज, मेसन ग्रिनउड र वैकल्पिक खेलाडी एडिसन काभानीले निर्णायक गोल गरे । भिल्लाका लागि अन्तिम समयमा ओली वाटकिन्सले एक गोल फर्काएका थिए ।

अर्को खेलमा उल्भसले एक गोलले पछाडि रहेको स्थिति उल्टाएर १० खेलाडीमा समेटिएको ब्राइटनलाई २–१ ले हरायो । यसअघि लिग उपाधि जित्न ३ अंकमात्र चाहिने म्यानचेस्टर सिटी शनिबार चेल्सीको हातबाट घरमा २–१ ले पराजित भएको थियो । यो नतिजापछि सिटीले उपाधिका लागि अझै कुर्नुपर्ने भएको छ ।

रहिम स्टर्लिङको गोलले अग्रता लिए पनि सिटीले त्यसलाई जोगाउन सकेन । चेल्सीका लागि हाकिम जिएच र मार्कोस अलोन्सोले गोल गरेका थिए । सिटीका लागि सर्जियो अगुइरो पेनाल्टीमा पनि गोल गर्न चुके । यो नतिजापछि सिटी ८० अंकमै कायम रह्यो । चेल्सीको भने ६४ अंक भएको छ । टोली तेस्रो स्थानमा उक्लेको छ । शनिबारकै अर्को खेलमा लिभरपुलले साउथह्याम्पटनलाई २–० ले हराएको थियो ।


प्रकाशित : वैशाख २७, २०७८ ०७:३०
प्रतिक्रिया
पठाउनुहोस्

क्षितिजलाई चेस उपाधि

कान्तिपुर संवाददाता

काठमाडौँ — मोरङ जिल्ला बुद्धिचाल संघका पूर्व अध्यक्ष तथा फिडे आर्बिटर विजयकुमार थापाको स्मृतिमा भएको अनलाइन बुद्धिचाल प्रतियोगिताको उपाधि फिडे मास्टर क्षितिज भण्डारीले जितेका छन् । उनले नवौं चरणमा सुनसरीका तीर्थ सुब्बालाई पराजित गरेर साढे ८ अंकसहित उपाधि जितेका हुन् ।

अस्ट्रेलियामा रहेका हिमालले साढे ७ अंक हात पार्दै दोस्रो स्थानमा रहे । उनले अन्तिम चरणमा पूर्व नेपाल च्याम्पियन केशव श्रेष्ठलाई हराएका थिए भने काठमाडौका सुदीप तामाङले नवौं चरणमा फिडे मास्टर मनीष हमालमाथि सफलता पाए । समान ७ अंक नै जोडेका हेराकाजी महर्जनलाई प्रोग्रेसिभ अंकमा पछि पार्दै सुदीपले तेस्रो स्थान ओगटे ।

ललितपुर स्पोर्ट्स क्लबको आयोजनामा भएको प्रतियोगितामा चौंथौदेखि दसौं स्थानसम्म क्रमशः हेराकाजी, थापाथली चेस पार्कका रन्जित राई, मकवानपुरका कृष्ण थापा, सुनसरीका तीर्थ सुब्बा, कैलालीका दीर्घराज जोशी र काठमाडौका पुरुषोत्तम सिलवाल रहे ।

महिलातर्फको उपाधि वर्तमान नेपाल च्याम्पियन सुजना लोहनीले जितिन् भने दोस्रो र तेस्रो झापाका कृपा अधिकारी र सिन्दिरा जोशी भए । १८०० मुनि रेटेडमा रोशन श्रेष्ठ र १६०० मुनि सुशील गुरुङ उत्कृष्ट ठहरिए । कोरोना संक्रमणबाट कारणले जीवन गुमाएका थापाको स्मृतिमा भएको प्रतियोगितामा १ सय ३६ खेलाडीको सहभागिता थियो । उत्कृष्ट १९ खेलाडीलाई नगद पुरस्कार प्रदान गर्न नेपाल बुद्धिचाल संघका सहकोषाध्यक्ष ज्ञानेन्द्र पराजुली र दुबईमा रहेका चेस खेलाडी दिल पुनले आर्थिक सहयोग गरेको क्लबले जनाएको छ ।

प्रकाशित : वैशाख २७, २०७८ ०७:२७
पूरा पढ्नुहोस्
प्रतिक्रिया
पठाउनुहोस्
×