नेपाल सुपर लिग : धनगढीलाई हराएर बुटवल लुम्बिनी प्ले अफमा

दशरथ रंगशालामा भएको खेलका सुमन लामाले ८० औं मिनेटमा निर्णायक गोल गरे र यससँगै टिम १–० को संघर्षपूर्ण जितले शीर्ष चारमा उक्लिन सफल रह्यो ।

यससँगै प्रतियोगिताको शीर्ष चारमा रहने टिम पनि निश्चित भएको छ र यी धनगढी, काठमाडौं रेजर्स, ललितपुर सिटी एफसी र बुटवल लुम्बिनी रहेका छन् । बुटवल लुम्बिनी आफू अनुकुल नतिजा निकाल्न सफल रहेपछि पोखरा थन्डर्सको सम्भावना समाप्त भएको हो । लिग चरणको अन्तिम आइतबार काठमाडौं र चितवनबीच हुनेछ ।

यो खेलको नतिजाले शीर्ष दुई स्थानमा कुन कुन टिम रहने हो, त्यो निश्चित गर्नेछ । अन्तिम खेलमा प्राप्त जितपछि बुटवल लुम्बिनीको ८ अंक भएको छ । पोखराको पनि समान ८ अंक छ । प्रतियोगिता नियम अनुसार बुटवल लुम्बिनी हेड टु हेडको आधारमा अगाडि रहेको छ । लिग चरणको अर्को खेलमा बुटवल लुम्बिनीले पोखरालाई २–० ले हराएको थियो । धनगढी भने १० अंकमा अझै शीर्ष स्थानमा छ ।