विराट गोल्डकप : संकटा सेमिफाइनलमा- खेलकुद - कान्तिपुर समाचार

विराट गोल्डकप : संकटा सेमिफाइनलमा

विनोद भण्डारी

विराटनगर — आहा–रारा गोल्डकप विजेता संकटा क्लब मंगलबार छैटौं विराट गोल्डकप फुटबल प्रतियोगिताको सेमिफाइनल पुगेको छ ।

विराट गोल्डकपमा मंगलबार संकटा क्लबका तीर्थ बस्नेतको प्रहार नियन्त्रणमा लिँदै अफ्रिकन रुट्सका गोलकिपर । तस्बिर : देवनारायण साह/कान्तिपुर

अफ्रिकन रुट्स युनाइटेडविरुद्ध १–० गोलको कठिन जित निकाल्दै संकटाले अन्तिम चारको यात्रा गरेको हो । संकटाले फाइनल पुग्नका लागि बिहीबार पन्जाब पुलिस क्लब भारतको सामना गर्नेछ । १९ औं आहा–रारा गोल्डकपको फाइनलमा संकटाले अफ्रिकन युनाइटेडलाई टाइब्रेकरमा ४–२ ले हराउँदै उपाधि जितेको थियो ।

अफ्रिकनविरुद्ध मंगलबार दबेर खेलेको संकटाका लागि ६१ औं मिनेटमा बुनेको पहिलो मुभमा नै गणेश हमालले गोल गर्दा निणायक बन्यो । गणेशले ओडेज ग्लोरीको पास सदुपयोग गर्दै अफ्रिकनका गोलकिपर दा स्यालभिओलाई बिट गर्दै आकर्षक गोल गरेका थिए ।

खेलको पूरै समय संकटालाई दबाबमा राखेको अफ्रिकनले दर्जन बढी अवसर सदुपयोग गर्न नसक्दा आहा–रारा गोल्डकपमा बेहोरेको हारको बदला लिन असफल रह्यो । खेलको २४ औं मिनेटमा कुटेको कार्नर भलीमा बास्सेकले संकटाका गोलकिपर राजुबाबु थापा बिट भएको अवस्थामा गरेको हेड पोस्टमाथिबाट बाहिरिँदा अग्रता लिनबाट चुकेको थियो ।

संकटाको जितमा गोलकिपर राजुबाबु नायक बने । उनले दर्जन बढी अफ्रिकन आक्रामणलाई निस्तेज बनाउँदै टिमको हार टारेका थिए । खेलको ४७ औं मिनेटमा एमरोमोले प्रहार उनले पञ्च गरेर फर्काएको बललाई बास्सेकले पुनः प्रहार गरे । तर त्यसमा उत्कृष्ट बचाउ गर्दै अफ्रिकनलाई निराश तुल्याएका थिए ।

एक गोलले पछि परेपछि अझ आक्रामक देखिएको अफ्रिकनका एमरोमोले ६२ औं र बास्सेकले ६४ औं मिनेटमा गरेको कडा प्रहार संकटाका गोलकिपर राजुबाबुले नियन्त्रणमा लिएका थिए । खेलको ७९ औं मिनेटमा एवाकोपको कर्नरमा बास्सेकको उत्कृष्ट हेड गोलकिपर राजुबाबुले बचाउ गर्दै अफ्रिकनलाई खेलमा फर्कने अवसर दिएनन् । ८९ औं मिनेटमा अफ्रिकनका एनजीमीले गरेको प्रहार बारमा लागेर फर्किएपछि टिमको सम्भावनाको अन्त्य भएको थियो ।

लगातार दबाब खेपेको संकटाले ७८ औं मिनेटमा दोस्रो उत्कृष्ट मुभ निकाल्दै गोल थप्ने अवसर सिर्जना गर्दा अफ्रिकन डिफेन्स बाधक बन्यो । अफ्रिकाका गोलकिपर स्याभियो बिट भएको अवस्थामा गणेश हमालले गरेको प्रहार एनजीभेमोले गोललाइनबाट फर्काएका थिए । संकटाका गोलकिपर राजुबाबु थापा म्यान अफ द म्याच भए । उनले १० हजार रुपैयाँ थापे । बुधबार घरेलु टिम विराटनगर–११ र एपीएफबीच पहिलो सेमिफाइनल खेल हुनेछ । विराटनगरले सिक्किम र सिलिगुढी तथा एपीएफले नेपाल पुलिस क्लबलाई हराउँदै अन्तिम चारको यात्रा गरेका थिए ।

प्रकाशित : वैशाख १, २०७८ ०९:००
प्रतिक्रिया
पठाउनुहोस्

विराट गोल्डकप : एपीएफ सेमिफाइनलमा

विनोद भण्डारी

विराटनगर — विभागीय टोली एपीएफ क्लब छैटौ विराट गोल्डकप फुटबल प्रतियोगिताको सेमिफाइनल पुगेको छ । सोमबार एपीएफले अर्को विभागीय टोली नेपाल पुलिस क्लबलाई २–० ले हराएको हो । पुलिसले बुधबार घरेलु टोली विराटनगर–११ सँग फाइनल पुग्नका लागि प्रतिस्पर्धा गर्नेछ ।

सहिद रंगशालामा जारी विराट गोल्डकपमा सोमबार एयर बलका लागि प्रयास गर्दै एपीएफ र पुलिसका खेलाडी । तस्बिर : देवनारायण साह/कान्तिपुर

दुवै टोलीको यो सिजन पहिलो भेट हो । यसअघि पोखरामा सम्पन्न आहा–रारा गोल्डकपमा एपीएफ क्लब संकटासँग र पुलिस क्लब अफ्रिकन रुट्ससँग सेमिफाइनलमा समान २–० गोलले पराजित भएका थिए ।

पहिलो हाफमा पुलिसलाई दबाबमा राखेको एपीएफले सिर्जना गरेका अवसर सदुपयोग गर्न नसक्दा गोल खाता खोल्न दोस्रो हाफ कुर्नुपर्‍यो । खेलको ४६ औं मिनेटमा एपीएफका मणि लामाले गोल गरे । उनले पुलिसका डिफेन्सले क्लियर गरेको बल खोसेर पोस्टको दिशा दिएका थिए ।

यसअघि चौथो मिनेटमा एपीएफका कप्तान सुदीपले वान भर्सेस वानमा प्रहार गरेको बल पोस्ट माथिबाट बाहिरिँदा सुरुआती अग्रता लिने अवसर गुमेको थियो । एपीएफका आशिष लामाले इन्ज्युरी समयको अन्तिम क्षणमा काउन्टर एट्याकमा दोस्रो गोल गर्दै टिमको जित निश्चित गरे । पुलिसका अञ्जन राईको प्रहारलाई एपीएफका गोलकिपर राजु नगरकोटीले पन्चको बललाई आशिषले पुलिसका गोलकिपर रोशन खड्का मैदानको मध्यभागमा आइपुगेको अवस्थामा एक्लै बल लगेर गोल गरेका थिए ।

एक गोलले पछि परेपछि दोस्रो हाफमा उत्कृष्ट खेल पस्किएको पुलिसले तीन उत्कृष्ट अवसर सदुपयोग गर्न नसक्दा खेलमा फर्कन सकेन । ७६ औं मिनेटमा अन्जन राई र ७८ औं मिनेटमा नीरकुमार राईको प्रहार पोस्टमाथिवाट बाहिरिँदा पुलिसले खेलमा फर्कने अवसर गुमाएको थियो ।

इन्ज्युरी समयको पहिलो मिनेटमा पुलिसका सुमन लामाले गोलकिपर राजु नगरकोटीलाई बिट गरेर गरेको प्रहार बारमा लागेर फर्कनु दुर्भाग्य बन्यो । एपीएफका मणि लामा म्यान अफ द म्याच भए । उनले१० हजार रुपैयाँ पाए । मंगलबार संकटा र अफ्रिकन रुट्सबीच अन्तिम क्वाटरफाइनल हुनेछ । विजेताले फाइनल पुग्नका लागि बिहीबार पन्जाव पुलिस क्लबसँग प्रतिस्पर्धा गर्नेछ ।

प्रकाशित : चैत्र ३१, २०७७ ०९:०२
पूरा पढ्नुहोस्
प्रतिक्रिया
पठाउनुहोस्
×