आर्मीको अग्निपरीक्षा

नेपाली सेनाको यो क्लबले एएफसी कप २०२१ प्रारम्भिक छनोटको दोस्रो चरणमा बुधबार इन्डियन सुपर लिग (आईएसएल) क्लब बेंग्लुरु एफसीविरुद्ध गोवामा प्रतिस्पर्धा गर्दै छ ।

‘ए’ डिभिजन लिग च्याम्पियन मछिन्द्र क्लबले एएफसी क्लब लाइसेन्सको मापदण्ड पूरा गर्न नसकेपछि त्रिभुवन आर्मीले पहिलोपल्ट महादेशीय क्लब फुटबलको औपचारिक प्रतियोगिता खेल्ने अवसर पाएको हो । आर्मीले गत साता दशरथ रंगशालामा श्रीलंका पुलिसलाई ५–१ ले पन्छाउँदै प्रारम्भिक छनोटको दोस्रो चरणमा बेंग्लुरुविरुद्धको भेट पक्का गरेको थियो । भारतका कीर्तिमानी गोलकर्ता सुनील क्षेत्रीको कप्तानीमा रहेको बेंग्लुरुविरुद्ध सफलता हात पार्नसके आर्मी प्लेअफमा पुग्नेछ, जहाँ माल्दिभ्सको इगल्स वा बंगलादेशको अबहानी लिमिटेड ढाकाविरुद्ध खेल्नुपर्नेछ । प्लेअफ विजेताले एएफसी कपको दक्षिण एसियाली क्षेत्रको समूह चरणमा प्रतिस्पर्धा गर्ने मौका पाउने छ ।

तर, आर्मीलाई बेंग्लुरुको चुनौती पन्छाउन सजिलो छैन । ‘ए’ डिभिजन लिगको उपविजेता आर्मी व्यावसायिक फुटबलको बाटोमा पाइला टेक्न खोजेको क्लब हो । सन् २०१३ मा स्थापित बेंग्लुरुले दुईपल्ट आई लिग र फेडेरेसन कप विजेता भएपछि चार वर्षअघि आईएसएल खेल्न थालेको हो । एएफसी कप २०१६ को उपविजेता नै भयो । आईएसएल च्याम्पियन पनि भइसकेको बेंग्लुरु छोटो समयमै भारतको लोकप्रिय क्लब भइसकेको छ । भारु ३४ करोड बढी बजार मूल्य रहेको बेंग्लुरुले पछिल्लो सिजन भने आईएसएलमा गतिलो प्रदर्शन गर्न सकेन, सातौं स्थानमा रह्यो ।

एएफसी क्लब लाइसेन्स प्राप्त गर्ने देशकै एक्लो क्लब भएपछि नै आर्मीले एएफसी कपका लागि तयारी गरेको थियो । मंसिरमै ट्रेनिङ थालेको आर्मीले गोवामा दुई दिन अभ्यास गर्ने मौका पायो । मंगलबार खेलस्थल जीएमसी रंगशालामै प्रशिक्षण गर्‍यो । आईएसएल २०१९–२० मा तेस्रो भएकाले बेंग्लुरुले यसपालि एएफसी कपमा अवसर पाएको हो । बेंग्लुरुले दुई महिनाअघि जर्मन प्रशिक्षक मार्को पेजाउओलीलाई भित्र्याएको थियो । उनको नेतृत्वमा बेंग्लुरुको पहिलो खेल नै आर्मीविरुद्ध हुन लागेको हो । गत सिजन बेंग्लुरु एफसी कपको प्लेअफमै रोकिएको थियो । उसलाई माल्दिभ्सको माजियाले सिकार बनाएको थियो । त्यसैले बलियो भए पनि बेंग्लुरु बाम्बोलिमस्थित जीएमसी रंगशालामा आर्मीविरुद्ध सचेत हुनेछ । पछिल्लो सिजन खराब भएकाले पनि आफ्नो पहिलो खेलमा सफलता चाहेको प्रशिक्षक पेजाउओलीले बताएका छन् ।

‘आर्मी उत्साही’

‘आईएसएल टिमविरुद्ध खेल्न पाउँदा हामी एकदमै उत्साही छौं र तयार पनि,’ आर्मीका प्रशिक्षक नवीन न्यौपानेले गोवाबाट कान्तिपुरसँग भने, ‘हामीले श्रीलंका पुलिसविरुद्ध आक्रामक खेलेका थियौं । निकै दबाब दिएर खेलेका थियौं । बेंग्लुरुविरुद्ध त्यस्तो प्रदर्शन नहोला । अलि डिफेन्सिभ देखिनेछ । हामी डिफेन्सलाई चुस्त र बलियो बनाएर काउन्टर अट्याकमा अगाडि बढ्ने छौं । यस्तो खेलमा एक–दुई वटा अवसर पाइन्छ, त्यसमा गोल गर्न सक्यौं भने हाम्रो जित्ने अवसर हुन्छ ।’

_{प्रशिक्षक नवीन न्यौपाने}

आर्मीले एक गोलले पछाडि परेको स्थिति उल्टाएर श्रीलंका पुलिसलाई ५–१ ले हराएको थियो । पूरा खेलमै आक्रामक प्रदर्शन गरेको आर्मीले मिडफिल्डर सन्तोष तामाङको लोभलाग्दो गोलमा बराबरी गरेको थियो । त्यसपछि नवयुग श्रेष्ठले दुई तथा टंक बस्नेत र सुदील राईले एक–एक गोल गरेका थिए । कोभिड–१९ संक्रमण भएपछि पहिलो रोजाइका गोलकिपर विकेश कुथु र फरवार्ड जर्जप्रिन्स कार्कीसँगै फिजियो आविष्कार पुडासैनीले दशरथ रंगशालाको खेल गुमाएका थिए । तेस्रो परीक्षणमा पनि पोजेटिभ देखिएपछि उनीहरूले गोवाको खेल पनि गुमाउँदै छन् ।

श्रीलंका पुलिसविरुद्ध खेलेका कप्तान भरत खवाससहित विंगर टेकबहादुर बुढाथोकी र म्यानेजर विकास मल्ल पनि कोभिड–१९ पोजिटिभ भएपछि गोवा उड्न पाएनन् । त्यसैले आर्मीलाई फरवार्ड लाइनमा अनुभवी भरतको अभाव खड्किन सक्छ । जर्जप्रिन्सको स्थान टंकले लिएका थिए भने विकेशको स्थानमा विवश चौधरीले आर्मीको पोस्ट सम्हालेका थिए । यसबारे प्रशिक्षक न्यौपानेले भने, ‘हामी उत्कृष्ट टिमविरुद्ध खेल्दैछौं । यस्तो खेलमा अनुभवले पनि काम गर्ने भएकाले विकेशको अभाव अलि देखिन्छ । किनभने उनी अनुभवी खेलाडी हुन् । तर, विवशले पनि राम्रो प्रदर्शन गर्ने आशा छ ।’ विकेश राष्ट्रिय टिमको प्रशिक्षणमा रहँदा आर्मीको पोस्ट विवशले नै सम्हाल्दै आएका थिए ।

एसियाली फुटब महासंघ (एएफसी) को प्रतियोगितामा पहिलोपल्ट सहभागी भएको त्रिभुवन आर्मी नेपाली खेलाडीले भरिएको छ । एएफसी कपमा एक एसियालीसहित चार विदेशी खेलाडीले खेल्न पाउँछन् । त्यसैले, विदेशी खेलाडी राख्न नसक्नु पनि बेंग्लुरुविरुद्ध आर्मीको कमजोरी हुनसक्छ । बेंग्लुरुका विदेशी खेलाडीबारे प्रशिक्षक न्यौपानेले भने, ‘प्रतियोगितामा अरू क्लबको हतियार नै विदेशी खेलाडी हुन् । आईएसएलको प्रदर्शन हेर्दा उनीहरूको (बेंग्लुरुका विदेशी खेलाडी) स्तर धेरै माथि छ ।’

बलियो प्रतिद्वन्द्वी

उमेर समूहका जर्मन टिमहरू हेरिसकेका प्रशिक्षक मार्को पेजाउओलीले गेबोनका डिफेन्डर यरोन्दु मुसाभु–किङलाई स्पेनी सेन्टर–ब्याक जुनान गोन्जालेजसँगै आर्मीविरुद्ध खेलाउन सक्छन् । उनले अस्ट्रेलियन मिडफिल्डर एरिक पार्तलु र ब्राजिलियन फरवार्ड क्लेटन सिल्भालाई पनि उपयोग गर्नेछन् । उनले कोभिडमुक्त भएर फर्किएका कप्तान सुनील क्षेत्रीसहितको बलियो टिम आर्मीविरुद्ध उतार्ने घोषणा गरेका छन् ।

‘पहिलो खेलको व्यग्र प्रतीक्षामा छु, जसको तयारी धेरै राम्रो गरेका छौं,’ प्रि–म्याच प्रेस कन्फ्रेन्समा प्रशिक्षक पेजाउओलीले भनेका छन्, ‘हाम्रा लागि गत वर्ष प्रतियोगिताको छनोटबाटै बाहिरिएयताको महत्त्वपूर्ण खेल हो यो । हामी समूह चरणमा प्रवेश गर्न चाहन्छौं । त्यो बाटोको पहिलो खेलमा नेपालको बलियो टिमविरुद्ध प्रतिस्पर्धा गर्दैछौं । हाम्रो हातमा कठिन खेल छ । तर, मेरो विचारमा हामी उसलाई पराजित गर्नेछौं र अर्को चरणमा पुग्नेछौं ।’

नेपाली टिमबारे बेंग्लुरुका कप्तान क्षेत्रीले भनेका छन्, ‘त्रिभुवन आर्मीले श्रीलंकाली टिमलाई पराजित गरेको हामीले देखेका छौं । उसले राम्रो खेलेको थियो । त्यसमा एकता र कसरी ट्रेनिङ गराइएको थियो भन्ने देख्न सकिन्थ्यो । उनीहरूले टिममा सँगै समय बिताएको हुनुपर्छ । त्यसैले यो (आर्मीविरुद्धको खेल) सजिलो हुने छैन ।’ बेंग्लुरुले रिजर्भ टिमका ५ खेलाडीलाई पनि एएफसी कपको टिममा समावेश गरेको छ । नेपाली क्लबले आईएसएल टिमविरुद्ध दोस्रोपल्ट खेल्न लागेको हो ।