एनभीए क्लब लिग : न्यु डायमन्ड च्याम्पियन- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

एनभीए क्लब लिग : न्यु डायमन्ड च्याम्पियन

चोटबाट फर्केको पहिलो आधिकारिक प्रतियोगितामै प्रतिभा माली सर्वोत्कृष्टसमेत भइन्
कुशल तिमल्सिना

काठमाडौँ — अघिल्लो वर्षको माघमा आरबीबी–एनभीए क्लब च्याम्पियनसिप भलिबलको फाइनलमा घुँडामा चोट बोकेपछि न्यु डायमन्ड स्पोर्ट्स क्लब तथा राष्ट्रिय टोलीकी मुख्य स्पाइकर प्रतिभा माली एक वर्ष कोर्टबाहिर रहिन् । कोरोना महामारीका कारण राष्ट्रिय तथा अन्तर्राष्ट्रिय खेल गतिविधि बन्द भएको समयलाई उनले चोटबाट तंग्रिन खर्चिइन् । 

एनभीए क्लब लिगको महिला च्याम्पियन न्यु डायमन्ड क्लब तस्बिर : केशव थापा/कान्तिपुर

कोरोनापछि खेल गतिविधि सुरु हुँदा प्रतिभा खेल्न सक्ने भइसकेकी थिइन् । पोखरा टाइगर कप र नेपालगन्जको प्रधानमन्त्री कपपछि एनभीए लिग भलिबलमा त उनले कमालै गरिन् । कोर्टभित्र प्रतिभाको चातुर्यता र प्रेरणादायी प्रदर्शनकै कारण न्यु डायमन्डले प्रतियोगिताको उपाधि जितेको छ । चोटबाट फर्केको पहिलो आधिकारिक प्रतियोगितामै उनी सर्वोत्कृष्टसमेत भइन् ।

न्यु डायमन्डले पुलिसलाई लिग चरणमै सोझो सेटमा हराएको थियो । आर्मीसँग पहिलोपल्ट हारे पनि एपीएफलाई हराएर टोली फाइनल पुगेको हो । युवास्टार उषा भण्डारी, कामना विष्ट र अनुभवी खेलाडी कोपिला उप्रेतीप्रेरित पुलिस क्लबलाई न्यु डायमन्डले ५ सेटको रोमान्चक प्रतिस्पर्धामा हराएको हो ।

रिसिभमा कमजोरी दोहोर्‍याउनुको असरले न्यु डायमन्ड पहिलो सेटमा हार्‍यो । दोस्रो र तेस्रो सेटमा पुनरागमन गरे पनि चौथो सेट गुमायो । निर्णायक सेटमा उनै प्रतिभाले आफूलाई सशक्त साबित गरिन् । अघिल्लो वर्ष फाइनलमा चोट बोकेपछि उपाधि जित्न नसकेको सपना यसपल्ट पूरा गरिन् ।

२२–२५, २५–११, २५–१९, २१–२५, १५–११ को सेट जितेको न्यु डायमन्डले खेलमा १ सय ८ अंक जोड्यो । त्यसमध्ये ४४ अंक प्रतिभा एक्लैले बटुलिन् । पावर स्पाइक, सर्भ र चलाखीपूर्ण प्लेसिङ, सबै जिम्मेवारीमा उनी पोख्त देखिइन् । जबकि उनी अझै पूर्ण फिट भइसकेकी छैनन् । ‘प्रतिभा हाम्रो मुख्य खेलाडी हुन् । उनले आज आफ्नो जिम्मेवारी पूर्ण रूपमा निभाइन् । तर अझै राम्रोसँग फिट भइसकेकी छैनन्,’ २०६९ सालमा आयोजित यही प्रतियोगिताको पहिलो संस्करण विजेता न्यु डायमन्डका प्रशिक्षक कुमार राईले भने, ‘उनलाई लगभग निको भइसकेको छ । इन्ज्युरीपछि शतप्रतिशत रिकभरी चाहिँ नेपाली खेलकुदमै दुर्लभ उदाहरण हो । हामी यसमा खुसी छौं ।’

महिलातर्फको मोस्ट भ्यालुएबल प्लेयरको अवार्डसहित प्रतिभा माली

विभागीय टोलीलाई चुनौती दिने एकमात्र टिम हो न्यु डायमन्ड । पहिलो संस्करण जिते पनि उपाधिका लागि करिब ८ वर्ष प्रतीक्षा गर्नुपर्‍यो । न्यु डायमन्ड २०७५ वैशाखमा सम्पन्न चौथो संस्करणमा फाइनलमा एपीएफसँग पराजित थियो । ‘यो सफलता गर्व गर्न लायक किन छ भने मेरा खेलाडीको पढाइबाट बचेको समयमा दिनको ५/६ घण्टा प्रशिक्षण गराएर तयार टोलीलाई हराउँदा स्वर्ग पुगेजस्तो हुँदोरहेछ,’ प्रशिक्षक राईले ठट्टा गरे ।

पहिलो सेटमा पुलिसका स्पाइकर उषा र कोपिलाले ४–४ र कामनाले ३ स्कोर गरेका थिए । प्रतिभाले १२ स्कोर गर्दा पनि सेट गुमायो । दोस्रो र तेस्रो सेटमा न्यु डायमन्डको आक्रमण हेर्दा खेल ५ सेटमा पुग्ने अनुमान थिएन । यो दुवै सेटमा प्रतिभाले ७–७ अंक जोडेकी थिइन् । न्यु डायमन्डको आक्रमणभन्दा पुलिस आफ्नै कमजोरीले पछि परेको थियो । दुवै सेटमा पुलिसले १३–१३ नकारात्मक अंक दियो । चौथो सेटमा पुलिसका मिडिल ब्लकरले लोभलाग्दो प्रदर्शन गरे । यो सेटमा मनीषा चौधरीले ६ र कोपिला रानाले ४ स्कोर गरेका थिए । स्पाइकर उषा र कामनाले पनि ४–४ स्कोर गरे ।

पाँचौं सेटमा कुनै समय पुलिसले ६–५ को अग्रता बनाएको थियो । कप्तान अरुणा शाहीको सर्भमा पुलिसका खेलाडीको रोटेसन बिग्रिएपछि अंक न्यु डायमन्डलाई आयो । लगत्तै अर्को सर्भमा उनले अंक लिएपछि न्यु डायमन्ड ७–६ को अग्रतामा पुग्यो । त्यसयता उसले अग्रता गुमाउनुपरेन । ‘आज प्रतिभा र मेरो छोरी (पनामिका) ले राम्रो खेले । हामीलाई दोस्रो एट्याकरको अभाव खड्कियो । आजलाई लागि झरना (श्रेष्ठ) लाई जसरी तयार पारेको थिएँ, उनले त्यसरी खेल्न सकिनन् । उनको खेल राम्रो भइदिएको भए यो खेल पाँच सेटमा जाँदैनथ्यो,’ प्रशिक्षक राईले भने ।

फाइनलमा पुलिस मुख्य गरी उषामा निहित थियो । पहिलो सेटमा उनको आक्रमण सफल भइरहेको थियो । त्यसैले सेटर कमला पुनले उनै लक्षित बल मिलाइदिएकी थिइन् । दोस्रो सेटपछि उषालाई रोक्ने न्यु डायमन्डको रणनीति सफल हुन थाल्यो । उनको प्रहार कोर्टबाहिर पुग्ने या ब्लक भएर आफ्नै कोर्टमा खस्ने हुन थाल्यो ।

‘सुरुमा राम्रो भइरहेको थियो । दोस्रो र तेस्रो सेटमा हाम्रो बीचको एट्याकर चल्न सकेन । त्यसबाहेक रेफ्रीको निर्णयप्रति पनि म आज धेरै नै असन्तुष्ट छु,’ पुलिसका प्रशिक्षक रुपेश विष्टले भने । उनले उषा चोटग्रस्त रहेको खुलाए, ‘उषाले घुँडा र गोलीगाँठाको चोटकै बीचमा खेलेकी हुन् । विपक्षीले उनीलक्षित गरी रणनीति बनाए । त्यसैले हार्नुपर्‍यो ।’ यसअघि पोखरा र नेपालगन्जमा भएको प्रतियोगितामा पुलिसले न्यु डायमन्डलाई हराएको थियो ।

पुरुषतर्फ हेल्प नेपाल च्याम्पियन

आफैंले रोजेको फाइनल प्रतिद्वन्द्वी एपीएफमाथि हेल्प नेपाल स्पोर्ट्स क्लबको जित अपेक्षित थियो । लिग चरणको अन्तिम खेलमा दोस्रो रोजाइको टिम खेलाएर हेल्प नेपालले एपीएफलाई फाइनलमा पुर्‍याएको थियो । भारतीय राष्ट्रिय टोलीका कप्तान विनित कुमारसहित रोहित कुमार र विकास तमाकको जादुयी प्रदर्शनमा हेल्प नेपालले २५–१४, २५–२०, २५–२२ को सहज सेटमा जित पाएको हो ।

लिग चरणमा हेल्प नेपालले एपीएफसँग जानीजानी हारेको भन्दै सामाजिक सञ्जालमा समर्थकले विरोध गरे पनि उपाधि जितेपछि प्रशिक्षक रमेश केसीले भने आफ्नो रणनीति सफल भएकोमा खुसी व्यक्त गरे ।

पुरुषतर्फको उपाधिसहित हेल्प नेपाल

उपाधिसँगै न्यु डायमन्ड र हेल्प नेपालले ३–३ लाख रुपैयाँ नगद पुरस्कार पाए । महिलातर्फ उपविजेता पुलिस र पुरुषतर्फ एपीएफले १ लाख १५ हजार पुरस्कार पाए । महिलातर्फ तेस्रो र चौथो हुने क्रमशः एपीएफ र त्रिभुवन आर्मीले ७५ हजार र ३७ हजार ५ सय पुरस्कार पाए । पुरुषतर्फ तेस्रो बुलबुले रारा भलिबल क्लबले ७५ हजार र चौथो पुलिसले ३७ हजार ५ सय पुरस्कार पाए । पुरुषतर्फ साबिक विजेता त्रिभुवन आर्मी यसपल्ट शीर्ष चारभित्र पर्न सकेन ।

पुरुषतर्फको मोस्ट भ्यालुएबल प्लेयरको अवार्डसहित विनित कुमार

विधागत पुरस्कारमा महिलातर्फ पुलिसकी उषा भण्डारी (स्पाइकर), पुलिसकै मनीषा राई (ब्लकर), पुलिसकै कमला पुन (सेटर), न्यु डायमन्डकी सलिना श्रेष्ठ (लिबेरो), न्यु डायमन्डकी ललिता नाथ (सर्भर) र न्यु डायमन्डका कुमार राई (प्रशिक्षक) मा उत्कृष्ट चुनिए ।

पुरुषतर्फ विधागतमा बुलबुले राराका पाकिस्तानी खेलाडी मुराद जियान (स्पाइकर), पुलिसका दीपकराज जोशी (ब्लकर), हेल्प नेपालका भारतीय खेलाडी विकास कुमार तमाक (सेटर), बुलबुलेका धनश्याम चौधरी (सर्भर), एपीएफका विनोद चन्द (लिबेरो) र हेल्प नेपालका रमेश केसी (प्रशिक्षक) उत्कृष्ट चुनिए । विधागतमा महिला र पुरुषतर्फ विजेताले जनही १० हजार रुपैयाँ पुरस्कार पाए । उत्कृष्ट खेलाडी न्यु डायमन्डकी प्रतिभा र हेल्प नेपालका विनित कुमारले जनही २५ हजार पुरस्कार पाए ।

प्रकाशित : चैत्र २७, २०७७ ०९:०३
प्रतिक्रिया
पठाउनुहोस्

बर्दियाका ३८ वर्षीय कोरोना संक्रमितको उपचारका क्रममा मृत्यु

कान्तिपुर संवाददाता

बर्दिया — बर्दियामा कोरोना संक्रमणबाट एक जनाको मृत्यु भएको छ । जिल्ला स्वास्थ्य कार्यालयका सूचना अधिकारी नरेश श्रेष्ठका अनुसार मधुवन नगरपालिका—८ का ३८ वर्षीय पुरुषको मृत्यु भएको हो ।


चैत २३ गते उनी कोरोना संक्रमित भई उपचारका लागि कोहलपुरस्थित शिक्षण अस्पतालमा भर्ना भएका थिए । स्वास्थ्य कार्यालयका सूचना अधिकारी श्रेष्ठले उपचारको क्रममा बिहीबार राति ८ बजे उनको मृत्यु भएको हो । जिल्लामा १५ जना कोरोना संक्रमित पालिका र होम क्वारेन्टाइनमा बसेका छन् ।


प्रकाशित : चैत्र २७, २०७७ ०८:५३
पूरा पढ्नुहोस्
प्रतिक्रिया
पठाउनुहोस्
×