आरसीटीको महत्त्वाकांक्षी योजना

क्लब अहिले ‘बी’ डिभिजनमा छ । आरसीटीले ‘ए’ डिभिजनमा उक्लनु अगाडि आर्थिक र भौतिक रूपमा आफूलाई अझ बलियो बनाउने भएको छ ।

‘ए’ डिभिजनमा प्रवेश पाउनुअघि अन्नपूर्ण आरसीटीको नयाँ कार्यसमितिले आफ्नै मैदान मैदान, एकेडेमी र होस्टेलका लागि प्रयास गर्नेछ । क्लबले शनिबार नयाँ कार्यसमिति पाएको हो र त्यसको नेतृत्वमा सुरेशकाजी शाक्यले फेरि निरन्तरता पाएका छन् ।

अध्यक्षमा शाक्यको यो तेस्रो कार्यकाल हुनेछ । कार्यसमिति उपाध्यक्षमा राजेश श्रेष्ठ र कुमार राजभण्डारी, सचिवमा राजु शाही, सहसचिवमा रविन महर्जन र कोषाध्यक्षमा सन्जीव तुलाधर छन् । सदस्यमा यज्ञरत्न तुलाधर, नरेश वैद्य, अमूल्य मानन्धर, चंगेजलाल श्रेष्ठ, रघुवरमान सिंह प्रधान र नरेन्द्र श्रेष्ठ छन् । कार्यसमिति पहिलो बैठकले मनोनीत दुई सदस्यमा अशोक मानन्धर र रामचन्द्र श्रेष्ठ छन् ।

क्लबले आफ्नै मैदानका लागि तयारी गरिरहेको छ र यो अन्तिम चरणमा पुगिसकेको छ । अध्यक्ष शाक्यले भने, ‘अहिले हाम्रो प्रमुख उद्देश्य आरसीटीलाई आर्थिक रूपमा बलियो बनाउनु हो र एएफसीले तोकेको क्लब मापदण्डसरह सक्षम बनाउनु हो ।’