युरोपेली च्याम्पियन्स लिग : रोनाल्डो र मेसीबिना क्वार्टरफाइनल- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

युरोपेली च्याम्पियन्स लिग : रोनाल्डो र मेसीबिना क्वार्टरफाइनल

एएफपी

पेरिस — लिभरपुलले आरबी लाइप्जिगको चुनौती समाप्त पार्दै बुधबार युरोपेली च्याम्पियन्स लिग फुटबलको क्वाटरफाइनल यात्रा तय गरेको छ । बुडापेस्टमा भएका दोस्रो लेग २–० ले जितेको लिभरपुल समग्रमा ४–० ले अगाडि रह्यो । पहिलो लेगको नतिजा दोहोर्‍याउन लिभरपुलबाट मोहम्मद सलाह र साडियो मानेले चार मिनेट अन्तरमा दुई गोल गरे ।

फाइल तस्बिर : रोयटर्स

जितपछि लिभरपुल युरोपेली सफलताको सम्भावना कायम राख्न सफल रह्यो । आफ्नो घरेलु मैदानमा लगातार ६ खेलको हार बेहोरेर खराब स्थितिमा रहेको योर्गन क्लोपको टिमले घरबाहिर भने सकारात्मक नतिजा निकालिरहेको छ ।

कोभिड–१९ कारण यातायात प्रतिबन्धका कारण लाइप्जिगले आफ्नो घरको खेल हंगेरीको बुडापेस्टस्थित पुस्कास एरिनामा खेलेको थियो । खेलपछि क्लोपले प्रतिक्रिया दिएका छन्, ‘यो प्रदर्शन उत्कृष्ट रह्यो र यत्तिको प्रदर्शन आवश्यक थियो । वास्तवमै हामीले उत्कृष्ट प्रदर्शन गरेका छौं । सम्भवतः यो खेल अझ धेरै अन्तरले जित्नुपर्ने थियो तर हामीले विशेषगरी दोस्रो हाफमा केही राम्रा अवसर गुमायौं ।’ टिमका लागि उत्कृष्ट खेलेका फाबिन्होको पनि क्लोपले खुलेर प्रशंसा गरे ।

ब्राजिली २७ वर्षीय फाबिन्होले चोटग्रस्त भर्जिल भान डाइक र जोए गोमेजको अनुपस्थितिमा सेन्ट्रल ब्याकको भूमिका निभाइरहेका छन् । आफू स्वयं पूर्णतः फिट नभएर पनि उनल टिमका लागि डिफेन्समा मुख्य भूमिका निभाइरहेका छन् । त्यसैले क्लोपले फाबिन्हो नम्बर ६ खेलाडीका रूपमा विश्व फुटबलकै सबैभन्दा उत्कृष्ट रहेको दाबी गरे ।

पीएसजी–बार्सिलोना

स्पेनी महारथी बार्सिलोना भने प्रतियोगिताबाट बाहिरिएको छ । क्याटलन क्लबलाई फ्रान्सको पेरिस सेन्ट जर्मेन (पीएसजी) ले स्तब्ध पार्दै अन्तिम आठको यात्रा तय गरेको छ । दोस्रो लेगमा १–१ को बराबरीमा टुंगिएपछि बार्सिलोनाको चुनौती समाप्त भएको हो । पेरिसमा भएको खेलमा पीएसजीले केलियन एमबाप्पेको गोलमा अग्रता लिएपछि बार्सिलोनाको तर्फबाट लियोनल मेसीले एक गोल फर्काएका थिए ।

मेसी पेनाल्टीमा अर्को गोल गर्न भने चुके । उनको पेनाल्टी छपल्टका गोल्डेन बल विजेता गोलकिपर केलर नाभासले रोकेका थिए । यो नतिजापछि पीएसजी समग्रमा ५–२ ले अगाडि रह्यो । बार्सिलोना पहिलो लेगमा आफ्नै भूमिमा ४–१ ले पराजित रहनु नै टिमका लागि प्रतियोगिताबाट बाहिरिनुको मुख्य कारण रह्यो । खेलपछि बार्सिलोनाका प्रशिक्षक रोनाल्ड कोम्यानले मेसीको बार्सिलोनामा अझै पनि पर्याप्त सम्भावना भएको बताए । उनले भनेका छन्, ‘मेसी हाम्रा लागि अझै उत्तिकै महत्त्वपूर्ण खेलाडी हुन् ।’

सन् २००५ पछि पहिलोपल्ट च्याम्पियन्स लिग क्वाटरफाइनलमा मेसी र उनका निकट प्रतिद्वन्द्वी क्रिस्टियानो रोनाल्डो हुने छैनन् । रोनाल्डोको टिम युभेन्ट्स पनि मंगलबार प्रतियोगिताबाट बाहिरिइसकेको छ ।

प्रकाशित : फाल्गुन २८, २०७७ ०८:४०
प्रतिक्रिया
पठाउनुहोस्

बाघ आक्रमण बढेपछि घाँसदाउरा र चरिचरनमा रोक

८ वटा क्यामेरा जडान गरी बाघको पहिचान गरिँदै
कमल पन्थी

बर्दिया — बाघको आक्रमणबाट स्थानीय मारिन थालेपछि मधुवन नगरपालिकाले खाता जैविक मार्ग र सामुदायिक वनमा घाँसदाउरा गर्न र बस्तुभाउ चराउन रोक लगाएको छ । बुधबार दिउँसो पाटेबाघको आक्रमणबाट मधुवन–३ को सम्झना सामुदायिक वनमा घाँस काट्न गएकी स्थानीय रीना भनिने रेनुका सुनारको ज्यान गएको थियो ।

फाइल तस्बिर : सञ्जीव पुन

नेपाल र भारतको सीमामा घना जंगल भएका कारण यस क्षेत्रमा बाघको बिगबिगी बढेको छ । गत साउनयता यस सामुदायिक वन क्षेत्रमा मात्रै बाघको आक्रमणबाट ५ जनाको ज्यान गइसकेको छ । नगर प्रमुख गणेश केसीले बर्दिया निकुञ्जमा बाघको संख्या यकिन गरी सामुदायिक वन क्षेत्रमा कति छन् भन्ने सार्वजनिक हुनुपर्ने बताए । ‘अहिले वन्यजन्तुबाट जोगिन सचेतना कार्यक्रम अघि सारेका छौं,’ उनले भने, ‘वन र निकुञ्जले मानिसको ज्यान बचाउन आवश्यक पहल गर्नुपर्छ ।’

बाघले सुनारको ज्यान लिएपछि यस क्षेत्रका विभिन्न ठाउँमा क्यामेरा ट्र्यापिङ जडान गरिएको छ । प्रमुख जिल्ला अधिकारी सन्तबहादुर सुनारले ८ वटा क्यामेरा जडान गरी बाघको पहिचान गर्न थालिएको बताए । ‘मानिस र बाघ दुवैको ज्यान बचाउनुपर्ने अवस्था छ,’ उनले भने, ‘मानिस आफैं सचेत हुनुपर्छ ।’ करिब चार महिनाअघि बर्दिया सिमानामा राखिएको क्यामेराप्रति भारतले आपत्ति जनाएपछि वन कार्यालयले त्यहाँबाट हटाएको थियो । गत साउनयता बर्दियामा बाघको आक्रमणबाट ८ जनाको ज्यान गइसकेको छ ।

बर्दिया राष्ट्रिय निकुञ्जका प्रमुख विष्णु श्रेष्ठले वन्यजन्तुको आक्रमणबाट मृत्यु भएका परिवारलाई राहत दिने गरिएको बताए । ‘मध्यवर्ती क्षेत्रभित्र वन्यजन्तुबाट मारिएका परिवारलाई साढे १० लाख राहत दिने गरेका छौं,’ उनले भने, ‘यसबाहेक एकल महिलालाई मासिक १ हजार ५ सय र मृतक परिवारका छोराछोरीलाई अध्ययनका लागि छात्रवृत्तिको व्यवस्था गरेका छौं ।’ सन् २०१८ को गणनाअनुसार बर्दिया निकुञ्जमा ८७ वटा बाघ छन् ।

बाघको आतंककै कारण प्रत्येक दिन साँझ ५ बजेपछि मधुवन–३ भगरैया गाउँ सुनसान देखिन थालेको छ । कर्फ्यु लागेजस्तै मानिसको चहलपहल बन्द छ । मानिसहरू घरबाहिर निस्कन पर्‍यो भने एक्लैदुक्लै होइन, समूहमा लट्ठी लिएर आउजाउ गर्छन् । केटाकेटीलाई घरपरिवारले जंगल आसपास क्षेत्रमा आउजाउ गर्न दिँदैनन् । खाता जैविक मार्ग र भारतीय सीमा बहराइच जिल्लाको कतरनियाघाट वन्यजन्तु आरक्ष परेकाले यहाँ वन्यजन्तुको आउजाउ बढी छ । हुलाकीमार्गको करिब २ किमि सडक खण्डमा साँझ ६ बजेपछि दुईपांग्रे र मानिसको आउजाउमा कडाइ गरिएको छ । यहाँ राति १० देखि बिहान ६ बजेसम्म आउजाउ गर्न पाइँदैन ।

मधुवन–३ की सरस्वती साहले यस वर्ष बाघको आक्रमणले त्रास बढाएको बताइन् । ‘गत वर्ष हात्तीले बालीनालीमा क्षति पुर्‍याउनुका साथै दर्जनभन्दा बढी घर भत्काएको थियो,’ उनले भनिन्, ‘अहिले बाघले गाउँमा कुन बेला आक्रमण गर्ने हो भन्ने त्रास फैलिएको छ ।’ धनौरा, कोठियाघाट, खाता र भगरैया क्षेत्रका बासिन्दा साँझ पर्नासाथ झ्यालढोका बन्द गरी घरभित्र बस्ने गरेको मधुवन–३ विपतपुरका बडघर फूलाराम थारूले बताए । अहिले दिउँसै एक्लै मानिस हिँड्न छाडे,’ उनले भने, ‘बाघ दिउँसै गाउँ आसपासमा हिँडडुल गर्छ, जसले गर्दा सिंगो गाउँ त्रसित छ ।’

तीन महिनाअघि यहाँ सशस्त्र प्रहरी बलको बीओपी स्थापना भएको थियो । बीओपीका सशस्त्र प्रहरी निरीक्षक अस्मित चौहान मगरले जतिबेला पनि बाघको आउजाउ बढेको बताए । कहिलेकाहीँ सशस्त्रको बीओपी नजिक आउने गरेको उनले सुनाए  ।

प्रकाशित : फाल्गुन २८, २०७७ ०८:३९
पूरा पढ्नुहोस्
प्रतिक्रिया
पठाउनुहोस्
×