प्रधानमन्त्री कप महिला क्रिकेट : एपीएफ र प्रदेश १ भिड्ने- खेलकुद - कान्तिपुर समाचार
कान्तिपुर वेबसाईट
AdvertisementAdvertisement

प्रधानमन्त्री कप महिला क्रिकेट : एपीएफ र प्रदेश १ भिड्ने

दुर्गालाल केसी

दाङ — लमहीमा जारी प्रधानमन्त्री कप राष्ट्रिय महिला क्रिकेट प्रतियोगितामा विभागीय टोली एपीएफ क्लब र प्रदेश १ फाइनलमा पुगेका छन् । शनिबार सेमिफाइनल खेलमा सुदूरपश्चिम प्रदेशलाई हराउँदै एपीएफ र लुम्बिनीलाई हराउँदै प्रदेश १ उपाधि भिडन्त तय गरेका हुन् ।

राष्ट्रिय महिला क्रिकेटमा शनिबार लुम्बिनीको विकेट लिएपछि प्रदेश १ का खेलाडी । तस्बिर : कान्तिपुर

पहिलो सेमिफाइनलमा एपीएफले सुदूरपश्चिमलाई ९ विकेटले पराजित गरेको हो । सुदूरपश्चिमले दिएको ६१ रनको लक्ष्यलाई एपीएफले १५ ओभरमा १ विकेट गुमाएर पूरा गर्‍यो । ओपनर ज्योति पाण्डेले अविजित २६ रनको योगदान गर्दा सरिता मगरले अविजित १९ रन बनाइन् । ४.४ ओभरमा टिमको स्कोर १४ रन हुँदा कविता कुँवरको बलमा क्याचआउट भएकी कप्तान सीता रानामगरले ७ रन जोड्न भ्याइन् ।

खराब मौसमका कारण १६ ओभरमा छोट्याइएको खेलमा टस जितेको सुदूरपश्चिमले निर्धारित २० ओभरमा ७ विकेट गुमाएर ६० रन बनाएको थियो । मध्यक्रममा ब्याटिङ गरेकी कविता जोशीले अविजित २२ रनको योगदान गरिन् । ओपनर रेवती धामीले १२ र कविता कुँवरले ९ रन बनाए । एपीएफबाट करुणा भण्डारीले सर्वाधिक ३ विकेट हात पारिन् । ४ ओभर बलिङ गरेकी उनले ११ रन खर्चिएकी थिइन् । कप्तान सीता रानामगरले १ विकेट लिइन् । एपीएफकी करुणा भण्डारी प्लेयर अफ द म्याच भइन् ।

नटआउट रहेका एपीएफका ज्योति पाण्डे र सरिता मगर क्रिजबाट बाहिरिँदै ।

दोस्रो सेमिफाइनलमा घरेलु टोली लुम्बिनी प्रदेशलाई १० विकेटले पराजित गर्दै प्रदेश १ फाइनल पुगेको हो । लुम्बिनीले दिएको ५३ रनको विजय लक्ष्यलाई प्रदेश १ ले ८.५ ओभरमा बिना विकेट पूरा गर्‍यो । प्रदेश १ बाट काजल श्रेष्ठले २२ र कप्तान रुबिना क्षत्रीले २६ रनको योगदान गरे ।

टस जितेर ब्याटिङ गरेको लुम्बिनी १४.१ ओभरमा ५२ रनमा अलआउट भएको थियो । लुम्बिनीका नितु भण्डारीले सर्वाधिक २१ रन बनाउनुबाहेक अन्य खेलाडीले दोहोरो अंक जोड्न सकेनन् । ३० बल खेलेकी नितुले १ चौकासमेत प्रहार गरिन् । प्रदेश १ का संगीता राई र निग्मा तामाङले २–२ विकेट हात पार्दा कप्तान रुबिनाले १ विकेट लिइन् । प्रदेश १ की संगीता राई प्लेयर अफ द म्याच भइन् । अब उपाधिका लागि आइतबार प्रतिस्पर्धा हुनेछ । विजेताले ५ लाख र उपविजेताले ३ लाख रुपैयाँ प्राप्त गर्नेछन् ।

प्रकाशित : पुस १९, २०७७ ०९:००
प्रतिक्रिया
पठाउनुहोस्

स्वस्थ सहरका लागि साइकल अभियान

कान्तिपुर संवाददाता

काठमाडौँ — साइकल र अन्य वातावरण मैत्री अभ्यास प्रवर्द्धनका लागि एउटा नयाँ अभियान सुरु हुने भएको छ । भौतिक पूर्वाधार तथा यातायात मन्त्रालय, संयुक्त राष्ट्रसंघीय विकास कार्यक्रम (यूएनडीपी), ललितपुर महानगरपालिका, कान्तिपुर मिडिया ग्रुप र साइकल सिटी नेटवर्क नेपालले संयुक्त रूपमा अभियान अघि बढाउने भएका हुन् । 

आगामी जनवरी ९ मा ललितपुरमा साइकल र्‍याली सुरु गरी उक्त अभियान थालनी गरिँदै छ । अभियानलाई कोभिड–१९ महामारीका बेला सहरी गतिशीलता र वातावरण मैत्री जीवनशैलीको विकल्पका रूपमा लिइएको छ । साइकल यात्रा सफा, स्वस्थ र सस्तो यातायातको एक वैकल्पिक माध्यमका रूपमा प्रचार गर्ने लक्ष्य अभियानको छ । यो अभियान कम्तीमा दुइटा महानगरपालिकाबाट सुरु गरिने र त्योमध्ये एक ललितपुर महानगर हुने जनाइएको छ ।

‘साइकल दुई शताब्दीदेखि प्रयोगमा छ र यो सामान्य, सस्तो, भरपर्दो, सफा, वातावरणमैत्री एवं दीर्घकालीन यातायातको विकल्प हुनेछ,’ यूएनडीपीका क्षेत्रीय प्रतिनिधि एसहानी मेडागंगोडा लेबले भनिन्, ‘यस्तो अभियान सफलता र सुरक्षाका लागि मोटर चालक, नीति निर्माताको पनि भूमिका महत्त्वपूर्ण हुनेछ ।’ ललितपुर महानगरपालिकाले यातायातको वैकल्पिक प्रयोगका लागि साइकल अभियानमा जोडिन पाउँदा खुसी लागेको जनाएको छ । मेयर चिरीबाबु महर्जनले ललितपुरले साइकल लेन बनाउन पहिलो पहल गरेको स्मरण गर्दै आफूहरू अन्य स्वस्थ सहर बनाउने कार्यमा सहकार्य गर्न तयार रहेको बताएका छन् । स्वस्थ सहर निर्माणका लागि सहकार्य गर्न आफूहरू तयार रहेको उनको भनाइ छ ।

भौतिक पूर्वाधार तथा यातायात मन्त्रालयका सहसचिव गोपालप्रसाद सिग्देलले नेपाल सरकारले सन् २०५० भित्र ५० प्रतिशत फोसिल इन्धन प्रयोग कटौती गरी वायु प्रदूषण न्यूनीकरण गर्ने लक्ष्यमा साइकल अभियानले सहयोग पुर्‍याउने बताए ।

कान्तिपुर मिडिया ग्रुपका नायब महाप्रबन्धक महेश स्वाँरले अभियानअन्तर्गत यातायातको वैकल्पिक माध्यम साइकल प्रयोगका लागि आम मानिसलाई प्रेरित गर्न पाएकोमा गर्व लागेको बताए । ‘हामीलाई विश्वास छ यो अभियानले असल वातावरण र जनस्वास्थ्यका क्षेत्रमा रूपान्तरणका लागि टेवा पुग्नेछ,’ उनले भने ।

साइकल सिटी नेटवर्क नेपाल (सीसीएनएन) का अध्यक्ष शैलेन्द्र डंगोलले ‘आफूहरू यस अभियानमा जोडिन पाएकोमा निकै अनुग्रहित रहेको’ बताए । उनका अनुसार यो अभियानले निजी क्षेत्रका कम्पनीलाई यसमा सहकार्य गर्ने अवसर प्रदान गर्नेछ ।

अभियानमा यति एयरलाइन्स, सानो पाइला, जीडी ल्याब्स् एन्ड रिसर्च, साइक्लिङ सिटिज इन्डियालगायत साझेदारहरूको सहयोग रहेको छ । अभियानले यस कार्यका लागि आगामी दिनमा अझ धेरै स्थानीय सरकार र निजी क्षेत्रको सहभागिता हुने अपेक्षा गरेको छ ।


प्रकाशित : पुस १९, २०७७ ०८:५६
पूरा पढ्नुहोस्
प्रतिक्रिया
पठाउनुहोस्
×