जीवनभर भारतमै रोजगारी : घर फर्किंदा कुटपिट र लुटपाट
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
कञ्चनपुर — थाकेको ज्यान । सुन्निएका खुट्टा । अलिकति हिड्दा पनि श्वासप्रश्वासले गाह्रो हुने । रसुवाको उत्तरगया गाउँपालिकाका ६५ वर्षीय राम प्रसाद आचार्य बुधबार दिउँसो गड्डाचौकी नाकामा यस्तै अवस्थामा भेटिए ।भारतमा ज्याला मजदुरी गरेर कमाएको पैसा लुटियो । लुटेराहरुसँगको तनावमाथि उनीमाथि कुटपिट समेत भयो । उनी श्वासप्रश्वासका बिरामी समेत हुन् ।
![](https://assets-cdn.ekantipur.com/uploads/source/ads/ekantipur-1-1282024082932.gif)
![जीवनभर भारतमै रोजगारी : घर फर्किंदा कुटपिट र लुटपाट](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2024/miscellaneous/untitled-2-0342024030829-1000x0.jpg&w=1001&h=0)
![](https://assets-cdn.ekantipur.com/uploads/source/ads/comp-900x100-1672024010950.gif)
गत कार्तिकमा तिहारका लागि घर फर्किने बेला सिमला नजिकै चार/पाँच जना युवाले कुटपिट गरेर उनीसँग भएको नगद र लुगाकपडा तथा मोबाइल लुटेर लगे । शरीरमा भएको एकजोर लुगा मात्रै बांकी रहेको उनले बताए । त्यसबेला आफूसँग भएको ३५ हजार भारु, लुगा कपडा र मोबाइल फोन सबै लुटेर लगेको उनले बताए ।
‘ती चिनेकै केटाहरु थिए, मैले काम गर्ने ठाउँमा आइरहन्थे,’ बुधबार घर फर्किदै गर्दा गड्डाचौकी नाकामा भेटिएका आचार्यले भने, ‘कुटपिटका कारण शरीरको धेरै ठाउँमा चोट छ, ४/५ दिन त भोकै बसे ।’
उनी हिमाञ्चलको सिमला नजिकै ‘रि’ गाउँमा कामदारहरुका लागि खाना पकाउने काम गर्थे । घर नआएको ५ वर्ष भइसकेको थियो । कार्तिकमा तिहारका लागि उनी घर आउँदै थिए । ‘रि’ गाउँबाट सिमला बसपार्क पुग्नु अगावै उनलाई बसले बाटोमै छाड्यो । बसबाट झर्ने बितिक्कै ४/५ जना युवाको हुल आयो । उनीहरुले एक्कासी कुटपिट गर्न थाले । ‘भएको नगद र सामान सबै देउ नत्र मारिदिन्छौ’ भनेर धम्की दिए । त्यसपछि आफुसंग भएका सबैथोक दिएको उनले बताए ।
लुटिएर अलपत्र परेका उनलाई सिमलामै रहेका नेपालीले सहयोग गरेपछि उनी चन्दीगढ पुगे । कुटपिटबाट घाइते भएका कारण उपचारका लागि समेत उनले चन्दीगढमै होटलमा काम गरे । मासिक १० हजार भारु पाउँथे । उपचारका लागि ठिक्क हुन्थ्यो ।
‘श्वासप्रश्वासका बिरामी, त्यसले झन् झन् च्याप्न थाल्यो,’ आचार्यले भने, ‘घर पुग्न पैंसा थिएन, फेरी मालिकसंगै पैसा मागेर आएँ ।’ त्यो पैसाले बनबासासम्म पुगे । गड्डाचौकीमा उनलाई सुदूरपश्चिम प्रदेश सरकारले स्थापना गरेको नागरिक सहायता कक्षले घरसम्म पुग्ने खर्च सहयोग गरेको छ । आचार्यलाई घर पुग्ने भाडा, बाटोमा खाना र खाजा खर्च गरेर ३ हजार सहयोग गरेको नागरिक सहायता कक्षका कर्मचारी दानसिंह बोहोराले बताए ।
आचार्य २०७२ को भूकम्पका बेला पनि हिमाञ्चलमै थिए । भूकम्पले उनको पनि घर भत्कायो । त्यहि घर बनाउदा ७ लाख ऋण लाग्यो । भूकम्पपछि घर निर्माणका लागि आएका उनी तीन वर्षपछि फेरी हिमाञ्चल हिडे । सबै ठिकै चलिरहेको थियो । मालिकले हरेक महिना घरमा खर्च पठाइदिन्थे । उनलाई खाना र बस्न दिएका थिए । लामो समयपछि घर फर्किदा ज्याला मजदुरी गरेर कमाएका रकम मात्रै लुटिएन, कुटपिटले शरीरमा गम्भिर चोट लागेर उनी बिरामी अचेल बिरामी समेत हुन थालेका छन् ।
![](https://assets-cdn.ekantipur.com/uploads/source/ads/900-x-100-1-0282024055738.gif)