अछाममा सडकसँगै विद्युत् र टेलिफोन सेवा ठप्प

प्रमुख जिल्ला अधिकारी रुद्रबहादुर मल्लका अनुसार अवरुद्ध भएको मध्यपहाडी राजमार्ग खुलाउन नेपाली सेना र नेपाल प्रहरीको टोलीले प्रयास जारी राखेको छ । 'बुधबारदेखि नेपाली सेना र नेपाल प्रहरीले सडक सफा गर्न थालेका छन् । केही मात्रामा भए पनि सडकमा गाडी आवतजावत गर्न सहज भएको छ,' उनले भने । चौखुट्टेमा अवरुद्ध सडक पनि तत्कालका लागि सञ्चालनमा ल्याइएको उनले बताए ।

लगातारको वर्षाले डोटी, अछाम र डडेल्धुराका केही ठाउँमा पोल ढल्दा ४ दिनदेखि विद्युत् अवरुद्ध भएको उनले बताए । 'विद्युत्‌को टोली पोल ढलेको स्थानमा गइरहेको छ । थप सहयोगका लागि डोटी प्रशासनलाई अनुरोध गरेका छौं,' मल्लले भने । ठाउँठाउँमा अप्टिकल फाइबर काटिएकाले नेपाल टेलिकमको सेवा अवरुद्ध भएको उनले जानकारी दिए । विद्युत् र टेलिफोन सेवा तत्काल सञ्चालन हुन नसक्ने मल्लको भनाइ छ ।