कान्तिपुर वेबसाईट
AdvertisementAdvertisement
२१.१२°C काठमाडौं
काठमाडौंमा वायुको गुणस्तर: १९६

नेपाल-भारत जोड्ने दुई झोलुंगे पुल सञ्चालनमा

मनोज बडू

दार्चुला — महाकालीमा नेपाल–भारत जोड्ने दुई झोलुंगे पुल सञ्चालनमा आएका छन् । व्यास गाउँपालिका–६ बडूगाउँ र मालिकार्जुन गाउँपालिका–६ बाकुमा निर्माण सम्पन्न भएका दुई पुल बिहीबार उद्घाटन गरिएको हो ।

नेपाल-भारत जोड्ने दुई झोलुंगे पुल सञ्चालनमा

सरकारको तुइन विस्थापन कार्यक्रम अन्तर्गत महाकाली नदीमा निर्माण गरिएका दुई वटा झोलुंगे पुल सञ्चालनमा आएसँगै स्थानीयको वारिपारिको यात्रा सहज हुने अपेक्षा गरिएको छ ।

नागरिकको सहजताका लागि निर्माण सम्पन्न दुवै पुलहरू नेपाल र भारतका अधिकारीहरुको उपस्थितिमा उद्घाटन गरिएको हो । एकै योजनामा निर्माण सम्पन्न सीमा पुल सञ्चालनमा ल्याउन यसअघि नै निर्णय भइसकेको हुनाले त्यसै कार्यक्रम अनुसार पुलहरु सञ्चालनमा ल्याइएको प्रमुख जिल्ला अधिकारी दिर्घराज उपाध्यायले बताए ।

महाकाली नदीमाथि तुइन र ट्युब विस्थापन गर्ने भनेर स्थानीय पूर्वाधार विकास तथा कृषि सडक विभागअन्तर्गत सस्पेन्सन ब्रीज डिभिजनले चार स्थानमा झोलुंगे पुल निर्माणको ठेक्का पाएको थियो ।

जसअन्तर्गत बडूगाउँ र बाकुमा गत फागुनमै झोलुंगे पुल निर्माण सम्पन्न भएका थिए । बाकुमा पुल बाहेक अन्य संरचना निर्माणमा लामो समय लागेको हुनाले संचालनमा ढिलाइ भएको जनाइएको छ ।

त्यस्तै व्यास गाउँपालिका–४ मडगाउँमा पनि नेपाल–भारत जोड्ने झोलुंगे पुल माघ तेस्रो साता निर्माण सम्पन्न भइसकेको छ । तर अन्य भौतिक संरचना निर्माण कार्य भइरहेका छन् । यस्तै व्यास गाउँपालिका–२ मालमा पुल निर्माणाधीन छ ।

दार्चुलाका प्रमुख जिल्ला अधिकारी दीर्घराज उपाध्याय, भारतको पिथौरागढ जिल्ला अधिकारी आशिष चौहान, महाकाली नगरपालिकाका प्रमुख नरसिंह चैसीर, मालिकार्जुन गाउँपालिका अध्यक्ष हिरासिंह धामी, व्यास गाउँपालिका अध्यक्ष मंगलसिंह धामी, सुरक्षाकर्मी अधिकारीको उपस्थितिमा पुल सञ्चालनमा ल्याएको छ ।

प्रकाशित : जेष्ठ १२, २०७९ १८:२१
प्रतिक्रिया
पठाउनुहोस्
जनताको राय

सुदूरपश्चिममा नेकपा एकीकृत समाजवादी (एस) संघीय सत्ता गठबन्धनभन्दा फरक स्थानमा उभिनुको संकेत के हो ?