यातना पाएकी महिलालाई ५५ हजार रुपैयाँ सहयोग- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

यातना पाएकी महिलालाई ५५ हजार रुपैयाँ सहयोग

वसन्तप्रताप सिंह

बझाङ — श्रीमान्ले निर्घात कुटपिटपछि कान काटिदिएको जयपृथ्वी नगरपालिका–१ भण्डारगाउँकी २१ वर्षीया जानकी नेपालीलाई सर्वोच्च अदालतका पूर्वन्यायाधीश बलराम केसीले र काठमाडौंको धुम्बाराही निवासी महेश पाण्डेले आर्थिक सहयोग गरेका छन् ।

पूर्वन्यायाधीश केसीले ३० हजार र पाण्डेले २५ हजार गरी नगद ५५ हजार रकम जानकीलाई सहयोग गरेका हुन् । आइतबार कान्तिपुर दैनिकमा ‘श्रीमतीलाई निर्घात कुट्दै कान काटे’ शीर्षकमा प्रकाशित समाचार पढेपछि पीडितलाई उपचारमा सहयोग होस् भन्ने उद्देश्यले नगद सहयोग गरेको सहयोगीहरूले बताएका छन् ।

केसीले हिंसारहित समाज बनाउन यस्ता प्रवृत्तिविरुद्ध समाजमा शून्य सहनशीलता अपनाउनुपर्ने र घटनामा परेकाको जीवन सहज बनाउन सबैले सहयोग गर्नुपर्ने बताए । पाण्डेले पीडित महिलाको पुनःस्थापना र जीवन निर्वाहका लागि सहयोग होस् भनेर आफूले अरू सहयोगीको पनि खोजी गरिरहेको बताए । ‘दुःखमा परेको मान्छेलाई सहयोग गर्न पाउँदा खुसी लागेको छ । उहाँलाई थप सहयोगका लागि साथीहरूसँग पनि पहल गरिरहेको छु,’ पाण्डेले भने ।

सहयोगीहरूले दिएको नगद रकम इन्सेकका प्रतिनिधि रमेश केसी, पत्रकार महासंघका पूर्वजिल्ला अध्यक्ष जगदीश रोकायाको रोहबरमा अल्पकालीन महिला सुरक्षा आवास गृहकी इन्चार्ज गीता शाहीले पीडित नेपालीलाई सोमबार हस्तान्तरण गरेकी छन् । विवाह भएको केही दिनबाट लगातार हिंसा खेपिरहेकी नेपालीले केसीलाई फोन गरेर धन्यवाद दिँदै कानुनी उपचार र पुनःस्थापनामा सहयोग गर्न अनुरोध गरेकी थिइन् । आफू पतिको घरमा बस्न नसक्ने अवस्था भएको बताउँदै उनले आफ्नो जीवन रक्षा र तीन छोराछोरीको शिक्षादीक्षाका लागि प्रबन्ध मिलाउनका लागि पहल गरिदिन पत्रकार र मानवअधिकारकर्मीसँग अनुरोध समेत गरेकी छन् । ‘अब म त्यसको घरमा गएर बस्न सक्ने अवस्था छैन । छोराछोरीको र मेरो जीवन धान्ने व्यवस्था गरिदिनुपर्‍यो । उसलाई कडाभन्दा कडा सजाय हुनुपर्‍यो,’ उनले भनिन् ।

निर्घात कुटपिटपछि कान काटेर फरार रहेका जानकीका पति मनोज नेपालीलाई प्रहरीले आइतबार नै पक्राउ गरेर ज्यान मार्ने उद्योगसम्बन्धी मुद्दा दर्ता गरेर घटनाको थप अनुसन्धान भइरहेको छ । फरार रहेका मनोजलाई बझाङको जयपृथ्वी नगरपालिका–७ सुवेडास्थित एक आफन्तको घरमा लुकेर बसेको अवस्थामा पक्राउ गरिएको जिल्ला प्रहरी कार्यालय बझाङका प्रमुख डीएसपी रूपक खड्काले बताए ।

कान्तिपुरमा घटनाका बारेमा समाचार प्रकाशित भएपछि प्रहरी प्रधान कार्यालयले पनि यो विषयमा चासो व्यक्त गर्दै पीडितलाई छिटो कानुनी दायरामा ल्याउन जिल्ला प्रहरी कार्यालयलाई निर्देशन दिएको डीएसपी खड्काले बताए । मनोजले गत बुधबार दिउँसो एक जना आफन्तसँग किन हाँसेको भन्दै साँझ जानकीलाई निर्घात कुटपिट गरेका थिए । मदिराको मातले लट्ठिएका उनले कुटपिटका क्रममा जानकीको बायाँ कान काटिदिएका थिए । कुटपिटबाट गम्भीर घाइते भएकी जानकी अल्पकालीन महिला सुरक्षा गृहको संरक्षणमा उपचार गराइरहेकी छन् । लगातारको हिंसाका कारण मानसिक समस्यामा रहेकी उनलाई परामर्श दिने काम भइरहेको र पूर्ण रूपमा स्वस्थ भएपछि पुनःस्थापनाका लागि पहल गरिने अल्पकालीन महिला सुरक्षा गृहकी इन्चार्ज गीता शाहीले बताइन् ।

प्रकाशित : श्रावण ६, २०७८ ०९:१९
प्रतिक्रिया
पठाउनुहोस्

सदरमुकाममै बसे पालिकाका कर्मचारी

रकम भुक्तानी नहुँदा मजदुरले ज्याला पाएका छैनन्
हरि गौतम

रुकुम पश्चिम — डोल्पाका डोल्पोबुद्ध गाउँपालिकामा गत आर्थिक वर्षमा झन्डै ४ करोड रुपैयाँ फ्रिज भयो । समयमै कर्मचारी गाउँपालिकामा नपुगेका कारण सम्पन्न भइसकेका योजनामा पनि झन्डै १ करोड रुपैयाँ भुक्तानी हुन सकेन । रकम भुक्तानी नहुँदा विभिन्न योजनामा काम गरेका मजदुरले ज्याला पाउन सकेका छैनन् ।

कर्मचारी नहुँदा सुनसान बनेको माथिल्लो डोल्पाको धोस्थित डोल्पोबुद्ध गाउँपालिका कार्यालय । तस्बिर : कान्तिपुर

सधैंजसो जिल्ला सदरमुकाम दुनै बस्ने कर्मचारी असार १० गतेपछि नै गाउँपालिका कार्यालय उक्लेका थिए । केही दिन कार्यालयको काम गरेका उनीहरू फेरि सदरमुकाम फर्किसकेका छन् । समयमै काम नगर्दा र हतारमा काम गर्दा प्रदेश सरकारबाट आएको ठूलो रकम फ्रिज गएको स्थानीय क्यामेर लामाले बताए । ‘बर्सेनि ठूलो रकम फ्रिज जान्छ,’ उनले भने, ‘कर्मचारी गाउँमा नबस्दा हामीले विकासको अनुभूति गर्न पाएका छैनौं ।’ उनले केही जनप्रतिनिधि गाउँ बसे पनि कर्मचारी नबस्दा समस्या भएको बताए ।

अहिले प्रमुख प्रशासकीय अधिकृतसहितका कर्मचारी सदरमुकाम फर्किसकेका छन् । ‘कार्यालय बन्द छ, वडा कार्यालय पनि खाली छन्,’ एक उपभोक्ता समितिका अध्यक्ष थिन्ले पाल्जोरले भने, ‘गाउँमा केही जनप्रतिनिधि मात्रै छन्, कर्मचारीको मुख त कहिले कहिले मात्र देख्ने हो ।’ उनका अनुसार गाउँ बसेका जनप्रतिनिधिले भुक्तानी हुन नसकेको बजेट भुक्तानी गर्ने उपायबारे छलफल गरिरहेका छन् ।

काम गरेकालाई ज्याला दिन नसकेपछि आफूहरू समस्यामा परेको अर्को एक उपभोक्ता समितिका अध्यक्ष फुर्वा सनमले बताए । उनका अनुसार एक साताअघि कर्मचारी सदरमुकाममा सञ्चालन गरिएको सम्पर्क कार्यालयमा फर्किसकेका छन् । ‘कति कर्मचारी त बिदामा घर गइसके,’ उनले भने, ‘कर्मचारी नहुँदा सानो कामका लागि सदरमुकाम पुग्नुपर्ने बाध्यता छ ।’

माथिल्लो डोल्पाका छार्काताङसोङ र शेफोक्सुन्डो गाउँपालिकाको अवस्था पनि उस्तै हो । सबैले जिल्ला सदरमुकाममा सम्पर्क कार्यालय खोलेका छन् । ३ वटै स्थानीय तहले अधिकांश समय दुनैबाटै कार्यालय चलाउँछन् । केही समय मात्रै गाउँपालिका पुगेका कर्मचारीले सेवा प्रवाह सञ्चालन गर्ने गरेको स्थानीयको गुनासो छ । ‘हाम्रा गाउँका सिंहदरबारहरू जिल्लाबाटै चल्छन्,’ छार्काताङसोङ गाउँपालिकाका ग्याल्जेन लामाले भने, ‘हल्ला गाउँमा सिंहदरबार भन्ने छ, तर वास्तविक रूपमा सिंहदरबार सदरमुकामै छ ।’

कर्मचारी गाउँ नबस्दा अधिकांश विकास निर्माणका कामको अनुगमनसमेत नहुने उनले बताए । ‘सबैले गाउँमा सिंहदरबार आयो भन्छन्,’ लामाले भने, ‘हाम्रा दुःख भने अझै उस्तै छन् ।’ जनप्रतिनिधिले नै कर्मचारीलाई सदरमुकाम बस्न छुट दिँदा मनपरी बढेको उनको भनाइ छ । उनका अनुसार कर्मचारी अभावमा गाउँमा बसेका जनप्रतिनिधि पनि कामविहीन बनेका छन् ।

हिउँदमा अत्यधिक हिमपात हुने गरेकाले चिसोका कारण सदरमुकाम बस्नुपरेको कर्मचारीको दाबी छ । स्थानीय तह कार्यान्वयनमा गएदेखि नै कर्मचारी उपल्लो डोल्पामा लामो समय बसेका छैनन् । डोल्पोबुद्ध गाउँपालिकाका प्रमुख प्रशासकीय अधिकृत गौतम पंज्ञानीले भौगोलिक विकटताका कारण गाउँमा बस्न समस्या भएको बताए । उनका अनुसार खाता प्रणाली बन्द भएपछि गत आर्थिक वर्षका केही योजनामा भुक्तानी हुन नसकेको हो । उनले मुख्यमन्त्री रोजगार कार्यक्रम र ठेक्कातर्फको रुपैयाँ भुक्तानी हुन नसकेको जानकारी दिए ।

गाउँपालिकामा भरपर्दो इन्टरनेट सेवा नहुँदा पनि कर्मचारी बस्न समस्या भएको पंज्ञानीको भनाइ छ । ‘असार ३१ गतेसम्म म्याद छ भन्ने सोचियो, तर ३० गते नै खाता प्रणाली बन्द भयो,’ उनले भने, ‘नेटकै कारण भएको कामको पनि भुक्तानी दिन सकिएन ।’ गत वर्ष भुक्तानी हुन नसकेको रकम चालु आर्थिक वर्षमा भुक्तानी हुने उनको भनाइ छ । त्यसका लागि आवश्यक प्रक्रिया पूरा गर्न केही कर्मचारीलाई प्रदेश राजधानी सुर्खेत पठाउन थालिएको उनले जानकारी दिए ।

छार्काताङसोङ गाउँपालिकाका प्रमुख प्रशासकीय अधिकृत मोहनप्रकाश गिरीले भने आफूहरू गाउँपालिकामै रहेको बताए । उनका अनुसार काम नभएको एउटा योजनाबाहेक सबै योजनाको रकम भुक्तानी भइसकेको छ ।

डोल्पोबुद्ध गाउँपालिकाले भने बजेट कार्यान्वयनका लागि चालु आवदेखि कर्मचारीलाई गाउँमै बस्न निर्देशन दिइएको जनाएको छ । कार्यपालिका बैठकबाटै उक्त निर्णय पारित गरिएको अध्यक्ष तेम्बा गुरुङले बताए । ‘कर्मचारी गाउँमा नबस्ने समस्याले हामी पनि पीडित छौं,’ उनले भने, ‘कार्यपालिका बैठकबाटै निर्देशन दिइएपछि केहीबाहेक अन्य कर्मचारी गाउँकै कार्यालयमा छन् ।

प्रकाशित : श्रावण ६, २०७८ ०९:१५
पूरा पढ्नुहोस्
प्रतिक्रिया
पठाउनुहोस्
×