सुदूरपश्चिमका ओली समूहका सांसदले भने : प्रदेश सरकार बाेझ भयाे- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

सुदूरपश्चिमका ओली समूहका सांसदले भने : प्रदेश सरकार बाेझ भयाे

अर्जुन शाह

धनगढी — सुदूरपश्चिम प्रदेशसभामा बोल्दै सत्तारुढ दल नेकपा एमाले ओली समूहका सांसद रतनबहादुर थापाले शुक्रबार नीति तथा कार्यक्रमको आलोचना गर्ने क्रममा प्रदेश सरकार बोझ भएको टिप्पणी गरेका छन् ।

सांसद लिलाधर भट्ट र रतनबहादुर थापा

‘संघीयतामा प्रदेश सरकार बोझ भएको भन्ने सबैको गुनासो छ,’ सांसद रतनबहादुर थापाले भने, ‘त्यसमा पनि सुदूरपशिचम प्रदेश सरकार एक नम्बर बोझ भएको छ ।’ उनले वर्तमान सरकाबाट कुनै पनि राम्रो काम नभएको टिप्पणी गरे ।

सुदूरपश्चिम प्रदेशसभामा आगामी वर्षका लागि प्रस्तुत नीति तथा कार्यक्रममाथि शुक्रबारदेखि सुरु भएको छलफलका क्रममा प्रमुख प्रतिपक्ष दल नेपाली कांग्रेका सांसदहरु लचक देखिएपनि सत्ता साझेदार दल नेकपा एमालेमा अध्यक्ष केपी ओली निकट सांसदहरुले नीति तथा कार्यक्रमको चर्को आलोचना गरेका हुन्।

एमालेकै ओली निकट अर्का सांसद लिलाधर भट्टले पनि सरकारद्वारा प्रस्तुत नीति तथा कार्यक्रमको उपहास गरेका छन् । उनले हरेक निर्वाचन क्षेत्रमा २५ शय्याको अस्पताल निर्माण गर्ने कुरा हास्यास्पद भएको बताए । ‘संकट पर्दा त दुई वर्षसम्म १० शय्याको अस्पताल बनाउन नसक्ने सरकारले २५ बेडको अस्पताल बनाउने भन्दा गजब लागेको छ,’ उनले भने ।

‘यसअघि प्रस्तुत बजेटको प्राथमिकता र सिद्धान्तसँग नीति तथा कार्यक्रम ५० प्रतिशत मेल खाँदैन,’ सांसद भट्टले भने, ‘अब बजेट आउने बेला प्राथमिकता, सिद्धान्त र नीति तथा कार्यक्रममा उल्लेख भएको कार्यक्रमभन्दा एक सय प्रतिशत फरक बजेट आउने होला ।’ प्रतिपक्षी दलका सांसद भरतबहादुर खड्काले सरकारसँग समन्वय र सहकार्य गर्न तयार रहेको बताएर लचकदार टिप्पणी गरेका थिए ।

यतिबेला सुदूरपश्चिममा एमाले आपसी किचलोमा फसेर दुई धारमा विभाजित एमालेभित्र माधव नेपाल पक्षधर संसदीय दलका १७ जना सांसदहरु माओवादी नेतृत्वमा रहेको मुख्यमन्त्री त्रिलोचन भट्टको सरकालाई विश्वासको मत दिएका थिए भने ७ जना एमाले सांसदहरुले विश्वासको मतको विपक्षमा मतदान गरेका थिए । त्यसलगत्तै आएको सरकारले बिहीबार प्रदेशसभामा पेश गरेको नीति तथा कार्यक्रममाथि छलफल सुरु भएको छ ।

प्रकाशित : जेष्ठ २८, २०७८ १८:२०
प्रतिक्रिया
पठाउनुहोस्

हङकङको फिल्ममा प्रमुख भूमिकामा नेपाली युवक 

रीना मोक्तान

काठमाडौँ — १७ औं हङकङ एसिया फिल्म फेस्टिभलको ओपनिङ फिल्म हो, 'ह्यान्ड रोल्ड सिगरेट'। छन किङ लङ निर्देशित यो फिल्म 'गोल्डेन हर्स फिल्म फेस्टिभल'को क्लोजिङ फिल्म पनि हो ।

'ह्यान्ड रोल्ड सिगरेट' को एक दृश्यमा विपिन कर्मा ।

हङकङ, ताइवान र सिंगापुरमा फिल्मको प्रिमियर भएसँगै एक नेपाली युवा यतिखेर चर्चामा छन् । उनी हुन्- विपिन कर्मा । हङकङ निवासी नेपालीबीच मात्रै होइन त्यहाँका दर्शकबाट आफ्नो अभिनयको प्रतिक्रिया बटुल्दैछन् विपिन ।

हङकङका चर्चित कलाकार गोर्डेन ल्यामसँगै विपिनले 'ह्यान्ड रोल्ड सिगरेट'मा प्रभुख भूमिकामा अभिनय गरेका छन् । फिल्ममा दक्षिण एसियाली पात्र म्यानीको चरित्रमा उनी देखिएका छन् । म्यानीको पहिचान संकटमा हुन्छ । उनको काँधमा भाइको जिम्मेवारी छ । काम नपाएपछि उनी ड्रग्स व्यापारमा संलग्न हुन्छन् । त्यहीक्रममा एकदिन ब्रिटिस औपनिवेशिक सेनामा सेवा पुर्‍याएका सेवानिवृत्त सैनिक क्वानसँग उनको भेट हुन्छ । दुवैले मिलेर अगाडिको यात्रा तय गर्छन् ।

८ वर्ष पोखरामा हुर्केका विपिन आफ्नो यो डेब्यु फिल्मले अवसरहरुका ढोका खोलिनेमा आसावादी छन् । 'यो फिल्मले अन्य ढोकाहरु खोलिँदै जानेछ भन्ने आशा छ,' उनले भने ।

हङकङका फिल्ममा 'नन-चाइनिज' कलाकारले प्रमुख पात्रको भूमिका कमै पाउँछन् । आफू फरक पृष्ठभूमिको हुँदाहुँदै फिल्ममा प्रमुख भुमिका पाउँदा उनी खुसी छन् । 'प्रमुख भूमिकाका हिसाबले यो मेरो पहिलो सुरुवात हो । म भाग्यमानी नै छु,' विपिनले भने ।

बाल्यकाल नेपालमा बिताए पनि विपिन हङकङमा हुर्के, उतै पढे । हाइस्कूल पढ्दै गर्दा फिल्म बनाउने एक क्याम्पेनमा उनी सरिक भएका थिए । विशेष त नन-चाइनिजहरुलाई लघु फिल्म बनाउन दिने क्याम्पेन थियो त्यो । विपिनले लघु फिल्म बनाए । त्यसपछि उनलाई फिल्मप्रति चासो बढ्यो, 'मलाई मनपर्ने क्षेत्र यो पो हो ।'

उनी पार्कर भिडियोहरु बनाएर इन्टरनेटमा राख्थे । १५ वर्षको हुँदा हङकङको पहिलो डान्स फिल्म 'द वे वीइ डान्स'मा स्टन्ट गर्ने मौका पाएका थिए । रमाइलोका लागि साथीहरुसँग मिलेर पार्करको भिडियो इन्टरनेटमा राख्ने विपिनले पार्करकै केही विज्ञापनमा पनि काम गरेका छन् ।

एक विश्वविद्यालयको ५५ औं वार्षिकोत्सवमा आयोजना गरिएको फिल्म फेस्टिभलका बनाइएको फिल्ममा गरेको अभिनय देखेर 'ह्यान्ड रोल्ड सिगरेट'का निर्देशकले सम्पर्क गरेको विपिन बताउँछन् । २४ वर्षिय विपनिले सुनाए, 'अभिनय गर्ने कहिल्यै सोचेको थिइनँ । तर यो भाग्यमै लेखेको रहेछ । 'कर्मा' भनौं न ।'

यो फिल्म क्यान्टोनिज भाषामा बनाइएको छ । उनले आफूले न्याय गर्न सक्नेमा दुविधा भएकाले फिल्ममा अभिनय नगर्ने निर्णय गरेको तर निर्देशक छनले भेटेरे कुराकानी गरेपछि आफू तयार भएको पनि बताए ।

जुन १७ मा उनको यो फिल्म हङकङमा प्रदर्शनमा आउँदैछ । फिल्मले हङकङमा रहेका नन-चाइनिजलाई प्रभाव पार्नेमा उनी ढुक्क छन् । 'हङकङमा ज-जसले प्रिमियरमा फिल्म हेर्नु भएको छ उहाँहरुले राम्रो प्रतिक्रिया दिनुभयो,' उनले भने, 'यहाँ रहेका ८ प्रतिशत नन-चाइनिजलाई यो फिल्मले प्रभाव पार्छ होला ।'

प्रकाशित : जेष्ठ २८, २०७८ १८:०५
पूरा पढ्नुहोस्
प्रतिक्रिया
पठाउनुहोस्
×