राहत माग्दै बादी परिवार
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
अछाम — स्थानीय मंगलसेन नगरपालिका–५ मा बस्दै आएका बादी समुदाय निषेधाज्ञाका कारण समस्यामा परेका छन् । उनीहरू दिनहुँजसो गाउँघरमा पुगेर मागेको खाद्यान्नले गुजारा चलाउँदै आएका थिए । कोरोना संक्रमणसँगै भएको निषेधाज्ञाले उनीहरूलाई साँझबिहानको छाक टार्नै समस्या भएको हो । मागेर र बजारमा मजदुरी गरेर जीविकोपार्जन गरिरहेका बादी समुदाय यतिखेर नगरपालिका र अन्य निकायमा राहतका लागि गुहारिरहेका छन् ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![राहत माग्दै बादी परिवार](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/miscellaneous/badiphotoachham2105422ka-2252021095214-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
वैशाख १९ गतेदेखि अछाममा निषेधाज्ञा भएपछि उनीहरूको दिनचर्या कठिन बनेको छ । यतिखेर उनीहरू राहत सहयोग माग्दै जिल्ला प्रशासन कार्यालय, मंगलेसन नगरपालिकामा धाइरहेका छन् । राहत भने पाएका छैनन् ।
बिहीबार नगरपालिका कार्यालय गएकी बादी समुदायकी अध्यक्ष टंकी बादीले कार्यालयले अहिले दिन नसकिने भनेको सुनाइन् । ‘खेतीपाती गर्नलाई जग्गा जमिन छैन । अहिले गाउँमा माग्न जाने अवस्था छैन, बजारमा भारी बोकेर गुजारा गर्थ्यौं तर अहिले बजार पनि बन्द छ,’ उनले भनिन्, ‘हामीले कसरी गुजारा चलाउने ? पोहोर साल सबैले अलिअलि सहयोग गरे । यो पटक कोही वास्तै गर्दैनन् ।’
मंगलसेनमा बसोबास गर्ने बादी समुदायका ९ परिवार भोकमरीको चपेटामा परेको उनको गुनासो छ । ‘अघिल्लो वर्ष सरकारले हामीलाई जग्गा पनि दियो, लालपुर्जा पनि दियो । नगरपालिकाले राहत समेत दियो,’ उनले भनिन्, ‘लालपुर्जाले छाक टार्न सकिँदैन । अहिले हामीलाई धेरै समस्या छ ।’ कांग्रेस पार्टीबाट पूर्वजिल्ला सदस्यसमेत भएकी सीता बादी यतिबेला राहत माग्दै हिँडेकी छन् । ‘पार्टीको सदस्य हुँदा पनि नेताले भनेको मान्नेबाहेक केही गर्न सकिएन । हामी अल्पमतमा परेकालाई आमन्त्रित जिल्ला सदस्य बनाएर भुल्याए जस्तो महसुस भएको छ,’ उनले भनिन् ।
प्रकाशित : जेष्ठ ८, २०७८ ०८:२४