१६.१२°C काठमाडौं
सेती प्रादेशिक अस्पतालमा उपचाररत ४ जना कोरोना संक्रमितको मृत्यु
धनगढी — धनगढीस्थित सेती प्रादेशिक अस्पतालमा पछिल्लो २४ घन्टामा उपचार गराइरहेका ४ जना कोरोना संक्रमितको मृत्यु भएको छ । अस्पतालमा ५८ जना संक्रमितको उपचार भइरहेको छ ।
अस्पतालका सूचना अधिकारी दिलीप श्रेष्ठका अनुसार बिहीबार दिउँसोसम्म मृत्यु हुनेमा कैलालीको धनगढी उपमहानगरपालिका– ६ की ५८ वर्षीया महिला, बझाङको दुर्गाथली गाउँपालिका– १ की ८२ वर्षीया महिला, कैलाली जोशीपुरका ६० वर्षीय पुरुष र कैलालीको धनगढी उपमहानगरपालिका– ४ का ८१ वर्षीय पुरुष रहेका छन् ।
उपचाररत ५८ जनामध्ये ३ जनाको भेन्टिलेटरमा, आईसीयूका २० जना र अक्सिजनको सपोर्टमा २८ जना तथा अन्य ७ जना रहेको श्रेष्ठले जानकारी दिए । पछिल्लो २४ घण्टामा कोरोनाबाट निको भएर ६ जना डिस्चार्ज भएका छन । १४ जना अस्पतालमा नयाँ संक्रमित भर्ना भएको श्रेष्ठले जानकारी दिएका हुन् ।
यसैगरी पछिल्लो २४ घण्टामा सेती प्रादेशिक अस्पतालको पीसीआर प्रयोगशालामा ६ सय ५० जनाको परीक्षण गर्दा ३ सय ६९ जनामा कोरोना पोजिटिभ पुष्टि भएको छ ।
प्रकाशित : वैशाख २३, २०७८ १७:२०
