जनप्रतिनिधिलाई प्रश्नै प्रश्न- सुदूरपश्चिम - कान्तिपुर समाचार
कान्तिपुर वेबसाईट
AdvertisementAdvertisement

जनप्रतिनिधिलाई प्रश्नै प्रश्न

‘पाइप हालेर खानेपानी घरमा पुग्यो तर केही दिनमै पाइप काटियो । यसको रेखदेख वडाले किन गर्न सकेन ?’
कान्तिपुर संवाददाता

अछाम — स्थानीय तहको निर्वाचन भएको झन्डै चार वर्ष हुन लाग्दा पनि जनप्रतिनिधिले घोषणापत्रअनुसार काम गर्न सकेनन् । काम नभएपछि नागरिकको गुनासो प्रतिदिन बढेको छ ।

राजनीतिक आस्थाका आधारमा कार्यसम्पादन गरेको आरोप जनप्रतिनिधिलाई छ । बिहीबार अछामको मंगलसेन नगरपालिका–३ मा आयोजित सार्वजनिक सुनुवाइमा यस्तै देखियो । वडामा छुट्याइएका योजनामा सन्तोष हुने भन्दा गुनासो गर्ने धेरै देखिए । वडा कार्यालयमा एक पसलबाट चिया लैजानेदेखि ठूलो रकम भएको उपभोक्ता समिति गठनमा आफ्ना मान्छे नसमेटिएको गुनासो स्थानीयले गरे ।

‘अध्यक्षज्यूलाई मेरो सुझाव, वडा कार्यालयमा चिया नास्ता एकै पसलबाट मात्रै लैजाने गरेको मलाई ठीक लागेको छैन । कहिलेकाहीँ हाम्रो दोकानबाट पनि लैजाने गर्नुहोस्,’ मंगलसेन नगरपालिका–३ की भजन विष्टले वडाध्यक्ष पदमसिंह भाटलाई प्रश्न गर्दै भनिन्, ‘ व्यापार एकै जनाले गरेर सबैको गुजारा चल्दैन । सबैलाई समान व्यवहार गरियोस् ।’ वडाध्यक्ष भाटले यस्ता प्रश्नको भने अपेक्षा गरेका थिएनन् । तर उनलाई स–साना प्रश्नको जवाफ फर्काउनै सकस भयो । उमेरले ६० वर्षमाथि पुगेका अध्यक्ष भाट साइनोअनुसार सहभागीलाई सम्बोधन गर्दै वातावरण शान्त बनाउन थाले ।

मंगलसेन–३ का रमेश साउँदले पनि भजनले जस्तै प्रश्न गरे । ‘मेरो प्रश्न वडाध्यक्षलाई छ । खानेपानीको योजना सम्पन्न भयो । पाइप हालेर घरमा पानी पुग्यो । तर केही दिनमै पाइप काटियो । यसको रेखदेख वडाले किन गर्न सकेन ?’ उनले थप प्रश्न गर्दै भने, ‘योजना सम्पन्न भएपछि त्यसको अवस्थाबारे पनि अनुगमन गरिदिन पर्‍यो, अहिले बाँसको टुक्रा हालेर गुजारा चलाएका छौं ।’

सार्वजनिक चासोका विषयभन्दा व्यक्तिगत योजना र चासोमा बढी केन्द्रित भएकाले काम गर्न असहज भएको वडाध्यक्ष भाट बताउँछन् । ‘उपभोक्ता समिति गठन केका लागि हुन्छ ? वडाले योजनाका लागि बजेटको व्यवस्था गर्ने हो । आफ्नो जिम्मेवारी के हो भन्ने पनि नबिर्सनुस्,’ वडाध्यक्ष भाटले जवाफ फर्काउँदै भने, ‘हामीलाई खबरदारी गर्ने झकझकाउने सचेत नागरिक पनि आफ्नै कुरा मात्रै राख्छन् । दोष जति जनप्रतिनिधिलाई मात्रै दिन्छन् ।’

मंगलसेन नगरपालिका–३ की लक्ष्मी बोगटीले आफूलाई खानेपानी निर्माण उपभोक्ता समितिमा नराखेको गुनासो व्यक्त गर्दै वडाध्यक्षलाई भनिन्, ‘मैले उपभोक्ता समितिको उपाध्यक्षमा बस्न खोजेकी थिएँ । राजनीतिक आस्था फरक भएका कारण मलाई हटाइयो । के म समितिमा बस्न योग्य छैन ?’ अध्यक्ष भाटले सबैको चित्त बुझाउन नसकेको बताए ।

मंगलसेन नगरपालिकाको केन्द्रसम्म पुगेर गुनासो गर्न नसक्ने नागरिकका लागि वडावडामा सार्वजनिक सुनुवाइ गरिएको नगर प्रमुख पदमबहादुर बोहराले बताए । ‘स्थानीयको आवश्यकताका आधारमा योजना विनियोजन गरिएका छन् ।

गाउँ ठाउँको विकास के कसरी हुन्छ भन्ने चिन्ता कसैलाई देखिँदैन, मेराले पाएनन् भन्ने गुनासा बढी आउन थाले,’ नगर प्रमुख बोहराले भने, ‘मैले, वडाध्यक्षले, हाकिमले घरजग्गा बेचेर बजेट विनियोजन गर्ने होइन । आएको बजेटलाई सही ढंगले सही ठाउँमा लगानी लगाउने हो ।’

प्रकाशित : वैशाख ११, २०७८ ०९:१२
प्रतिक्रिया
पठाउनुहोस्

पहिलो उपाधि अवसर

नेपालले ट्वान्टी–२० संरचनामा अहिलेसम्म उपाधि जितेको छैन
विनोद पाण्डे

काठमाडौँ — नेदरल्यान्ड्ससँग शनिबार पल्सर त्रिकोणात्मक ट्वान्टी–२० अन्तर्राष्ट्रिय शृंखलाको फाइनलमा उत्रँदा नेपालसामु पहिलोपल्ट यो संरचनामा उपाधि जित्ने अवसर हुनेछ । पछिल्लो एक दशकमा राम्रो प्रभाव पार्दै नेपालले ट्वान्टी–२० विश्वकप नै खेलेको छ । तर अझै नेपालले ट्वान्टी–२० को कुनै उपाधि जितेको छैन ।

त्रिकोणात्मक ट्वान्टी-२० अन्तर्राष्ट्रिय शृंखलाको ट्रफीसाथ कप्तानद्वय नेपालका ज्ञानेन्द्र मल्ल र नेदरल्यान्ड्सका पिटर सिलार

मलेसियासम्मिलित प्रतियोगितामा नेपाल र नेदरल्यान्ड्स शीर्ष दुई स्थानमा रहेर उपाधि भिडन्तलाई तयार भएका हुन् । नेपालले ४ मध्ये ३ खेल जितेको थियो ।

नेदरल्यान्ड्सले राउन्ड रोबिनमा २ मा जित पायो भने एकमा हार सामना गर्‍यो । मलेसियासँग टोलीको अन्तिम खेल ऐतिहासिक रूपमा ‘टाइ’ भएको थियो । सन् २००७ देखि ट्वान्टी–२० क्रिकेट खेल्न लागेको नेपाल २०१३ मा घरेलु मैदानमै सम्पन्न एसीसी ट्वान्टी–२० कपको फाइनल पुग्नुबाहेक उपाधि प्रतिस्पर्धामा उत्रन सकेको छैन । २०१३ मै यूएईमा भएको विश्व ट्वान्टी–२० छनोटमा तेस्रो स्थान हात पार्दै नेपालले त्यसको अर्को वर्ष ट्वान्टी–२० विश्वकप नै खेलेको थियो । दोस्रो पटक फाइनल पुग्दै नेपालसामु ट्वान्टी–२० मा उपाधि जित्ने अर्को अवसर आएको हो ।

नेदरल्यान्ड्सले विश्व ट्वान्टी–२० छनोट नै तीनपल्ट जितेको छ । २००८ मा आयरल्यान्डसँग र २०१५ मा स्कटल्यान्डसँग संयुक्त विजेता बनेको डच दुई वर्षअघि यूएईमा सम्पन्न विश्वकप छनोटको यो प्रतियोगितामा एक्लो विजेता बनेको थियो । त्रिकोणात्मक ट्वान्टी–२० शृंखलामा खेलिरहेको नेदरल्यान्ड्स पूर्ण टोली होइन । आठ प्रमुख खेलाडीबिना टोली काठमाडौंमा खेलिरहेको छ ।

अस्ट्रेलियाली डेव ह्वाटमोरको प्रशिक्षणमा नेपालले जुन ब्याटिङ प्रदर्शन गरिरहेको छ, त्यसले डच क्रिकेटलाई नै प्रभावित बनाएको छ । पहिलो खेलमा नेपालसँग ९ विकेटको हार नेदरल्यान्ड्सको ट्वान्टी–२० मा सबैभन्दा ठूलो दुई हारमध्ये पर्दछ । लगत्तै नेदरल्यान्ड्सका कप्तान पिटर सिलारले भनिहाले, ‘हामीले नेपालबाट क्रिकेटको ठूलो शिक्षा पाएका छौं । उनीहरूले विगतमा खेल्ने शैलीभन्दा अहिले फरक खेलिरहेका छन् ।’

श्रीलंकालाई १९९६ को एकदिवसीय विश्वकप दिलाएका ह्वाटमोरले जनवरीमा नेपाली टोली सम्हालेका थिए । नेपालको प्रशिक्षकका रूपमा उनले पहिलो पटक टिम उतारेका हुन् । ‘ब्याटिङ संघर्ष’ ट्वान्टी–२० मा नेपालसँग जोडिँदै आएको शब्द हो । यो प्रतियोगिताले त्यो पर्यायलाई नै ओझेलमा पारिदिएको छ । नेपालले पहिलो दुई खेलमा नेदरल्यान्ड्स र मलेसियामाथि समान ९ विकेटको जित हात पार्दा क्रमशः १ सय ३७ रनको लक्ष्य १५ ओभर १ सय १० रनको लक्ष्य १३ औं ओभरमा पूरा गरेको थियो ।

पछिल्ला दुई खेलमा नेपालको ब्याटिङ अझै उच्च विन्दुमा पुगेको थियो । नेदरल्यान्ड्ससँग २ सय ६ र मलेसियासँग २ सय १७ रन बनाएर नेपालले ब्याटिङबाटै उपाधि दाबेदारिता प्रस्तुत गरेको थियो । ओपनिङ जोडीबाट सुरु हुने नेपालको रन संघर्षलाई कुशल भुर्तेल र आसिफ शेखको प्रारम्भिक साझेदारीले नयाँ उर्जा दिएको छ । दुवैले यसै शृंखलाबाट ट्वान्टी–२० अन्तर्राष्ट्रियमा ‘डेब्यु’ गरेका हुन् । कुशलले पहिलो तीन खेलमै अर्धशतक बनाएर विश्व कीर्तिमान रचे । कुशललाई राम्रो साथ दिँदै आसिफले पहिलो खेलमा अविजित अर्धशतक बनाएका थिए अन्य २ खेलमा समान ४२ रनको स्कोर हाने ।

विनोद भण्डारीबाहेक अन्य सबै नेपाली ब्याट्सम्यानको प्रतियोगितामा स्ट्राइक रेट १ सय ३० भन्दा माथि छ, त्यसमा कुशल मल्लको स्ट्राइक रेट २१७.६४ र करण केसीको ३०६.६६ छ । करणले मलेसियासँग बिहीबार १३ बलमा ४५ रन बनाउनेक्रममा ७ छक्का प्रहार गरेका थिए । कुशलले दुई खेलमा ब्याटिङ गरेर ३७ रन बनाउँदा ५ छक्का प्रहार गरिसकेका छन् । दीपेन्द्रले १९८ को स्ट्राइक रेटमा ३ खेलमा ब्याटिङ गर्दै ९९ रन बनाएका छन् । कुशल भुर्तेलले २ सय १ र आसिफले १ सय ३८ रन बनाइसकेका छन् ।

नेपाली ब्याट्सम्यानले पछिल्ला दुई खेलमा नेदरल्यान्ड्सविरुद्ध ११ र मलेसियाविरुद्ध १९ छक्का प्रहार गरेका थिए । नेपालका कप्तान ज्ञानेन्द्र मल्लले उत्साहपूर्ण ब्याटिङलाई लिएर फाइनलमा आत्मविश्वास जगाएको बताएका थिए । ‘विकेट राम्रो छ, यो विकेटमा जसरी रन बनिरहेको छ, त्यसले बाउन्ड्री पनि सानो भएजस्तो लागिरहेको छ । ब्याटिङमा जतिसक्दो रन बनाउने र बलिङमा जतिसक्दो डट बल फाल्ने लक्ष्य बनाउनुपर्छ,’ फाइनलबारे ज्ञानेन्द्रले भनेका थिए, ‘रन मजाले बनिरहे पनि बेलाबेलामा हाम्रो लगातार विकेट गइरहेको छ, डट बललाई कम गर्नुपर्छ र अन्तिम ओभरहरूमा अझ बढी रन बनाउनुपर्छ ।’

त्यसविपरीत नेपालको बलिङ र फिल्डिङ भने खासै उत्साहजनक छैन । विगतमा बलिङ र फिल्डिङबाटै खेल्ने जित्ने गरेको नेपाल यसपालि यो दुई क्षेत्रमा कमजोर देखिएको छ । नेदरल्यान्ड्ससँग पहिलो खेलमा नेपाली खेलाडीले धेरै मिसफिल्ड गरे । दोस्रो खेलमा नेदरल्यान्ड्सले २ सय ७ रन बनाउँदै ट्वान्टी–२० अन्तर्राष्ट्रियमै सबैभन्दा ठूलो लक्ष्य पछ्याएको थियो ।

लेग स्पिनर सन्दीप लामिछाने प्रतियोगितामा ११ विकेट लिइसके पनि केही खर्चिलो बनेका छन् । चोटबाट फर्किएकाले करण केसीले पुरानो लय समात्न सकेका छैनन् । ट्वान्टी–२० मा मुख्य आस गरिएका अविनाश बोहराले ३ खेलमा १ विकेट लिनमात्र सकेका छन् भने झन्डै प्रतिओभर ९ रन खर्चेका छन् । मलेसियासँग अन्तिम खेलमा उनको स्थानमा कमलसिंह ऐरीलाई खेलाइएको थियो । कमलले आफ्नो ट्वान्टी–२० अन्तर्राष्ट्रिय ‘डेब्यु’ लाई स्मरणीय बनाउनेक्रममा ३ विकेट लिए ।

प्रशिक्षक ह्वाटमोरले शुक्रबार इन्स्टाग्राममा अविनाशसँगको फोटो पोस्ट गर्दै भनेका छन्, ‘मेरा लागि म्यान अफ द म्याच अविनाश हुन् । आफूलाई आराममा राखेर कमलसिंह ऐरीलाई डेब्यु गर्न दिएकामा धेरै धन्यवाद दिन चाहन्छु ।’ उनको यो पोस्टले अविनाशलाई फाइनलमा फुर्तिलो बनाएर राख्न खोजेको देखिन्छ । सोमपाल कामी र करणको तीव्र गतिको बलिङ प्रतिस्पर्धामा अविनाशले योर्कर विशेषज्ञका रूपमा आफूलाई स्थापित गरेका छन् ।

नेदरल्यान्ड्सले राउन्ड रोबिनमा नेपालसँग दोस्रो खेलमा जुन प्रदर्शन देखाएको छ, त्यसले टोलीको विगत देखाउँछ । २००९ को विश्व ट्वान्टी–२० मा टोलीले १ सय ६३ रनको विजय लक्ष्य पछ्याउँदै इंग्ल्यान्डलाई लर्ड्समा हराएको थियो । २०१४ मा बंगलादेशमा आयरल्यान्डविरुद्ध नेदरल्यान्ड्सले १४ ओभरभित्र बनाएको १ सय ९४ रनको लक्ष्य ट्वान्टी–२० अन्तर्राष्ट्रियकै एक उत्कृष्ट खेलमा पर्छ । नेपाल र नेदरल्यान्ड्सको पछिल्लो खेल पनि कम सनसनी थिएन । फाइनल यस्तै रोमाञ्चक हुने अपेक्षा गरिएको छ ।

नेदरल्यान्ड्सलाई पराजित गरेमा नेपालले ११ वर्षपछि घरेलु मैदानमा उपाधि जित्नेछ । २०१० मा नेपालले विश्व क्रिकेट लिग संरचनाको डिभिजन ५ को उपाधि त्रिवि क्रिकेट मैदान कीर्तिपुरमा उचाल्दा त्यसको अघिल्लो वर्ष नेदरल्यान्ड्सले इंग्ल्यान्डलाई पराजित गरिसकेको थियो । २०१४ मा मलेसियामा डिभिजन ४ जितेयता पहिलो उपाधि उचाल्ने आसमा नेपाल छ ।

नेदरल्यान्ड्सका कप्तान पिटर सिलार अलराउन्ड प्रदर्शनबाट आफैं उदाहरणीय बनेका छन् । उनले ९१ रन बनाउनुका साथै ३ विकेट लिएका छन् । म्याक्स ओ’डाड यसै शृंखलाबाट नेदरल्यान्ड्सका लागि ट्वान्टी–२० अन्तर्राष्ट्रियमा शतक बनाउने पहिलो खेलाडी बनेका छन् । उनले ३ खेलमा १ सय ५२ रन बनाइसके । बेन कुपरले १ सय २९ र बास डे लिडले १ सय २२ रन बनाइसकेका छन् ।

ट्वान्टी–२० अन्तर्राष्ट्रिय वरीयतामा नेपाल १५ औं र नेदरल्यान्ड्स १७ औं स्थानमा छन् । प्रमुख खेलाडीहरूबिनै आए पनि नेदरल्यान्ड्सले नेपालविरुद्ध जुन प्रदर्शन देखाएको थियो, त्यसले डच क्रिकेट कस्तो पद्धतिबाट चलिरहेको छ भन्ने देखाएको छ । कोभिड–१९ का कारण १७ महिनापछि पहिलोपल्ट अन्तर्राष्ट्रिय खेल खेल्दा डच क्रिकेटको ब्याटिङ र बलिङको एउटै धार देखिएको छ । नेदरल्यान्ड्ससँग फाइनल खेलिरहँदा नेपालले डच क्रिकेटको व्यवस्थापन सिको गर्न पछि पर्नु हुँदैन ।

प्रकाशित : वैशाख ११, २०७८ ०८:३९
पूरा पढ्नुहोस्
प्रतिक्रिया
पठाउनुहोस्
×