मुगुमा एक सातादेखि हवाई सेवा अवरुद्ध
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
मुगु — जिल्लामा एक सातादेखि हवाई सेवा अवरुद्ध हुँदा सर्वसाधारण यात्रुदेखि बिरामीलाई सास्ती भएको छ । बिहान खराब मौसम र दिउँसो साढे १२ बजेपछि नागरिक उड्डयन प्राधिकरणको प्रतिबन्धले गर्दा मुगुमा एक सातादेखि हवाई उडान हुन नसकेको हो ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![मुगुमा एक सातादेखि हवाई सेवा अवरुद्ध](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/miscellaneous/mugu-airport-photo-1382023030924-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
हवाई उडान नहुँदा मुगुदेखि नेपालगन्ज जाने यात्रु र नेपालगन्ज-सुर्खेतदेखि मुगुतर्फ आउने यात्रु विमानस्थलमै अलपत्र परेका छन् ।
'जहाज कुर्दै एक साता बितिसक्यो,' तेजबहादुर मल्लले भने, 'वर्षाले सडक यातायात जोखिम छ। बिहान एयरमा कुहिरो लाग्छ । दिउँसो प्राधिकरणको नियम लाग्छ । कसरी हामी गन्तव्यमा पुग्ने ।' जहाज उड्ने आसले यात्रुहरु झोवा बोकेर एयरमा जाने १२ बजेसम्म जहाज नआएपछि फेरि घर फर्किने गरेका छन् । वर्षात्ले गमगढी नाग्मा सडक जोखिम भएकोले नेपालगन्ज जाने यात्रुदेखि मुगु आउने यात्रु जहाज प्रतिक्षामै दिन बित्ने गरेको छ ।
नेपालगन्जदेखि दैनिक तीन/चार वटा उडान हुने रारा विमानस्थल एक सातादेखि सुनसान छ । जिल्ला अस्पताल मुगुले रिफर गरेका बिरामीहरु जहाज कुर्दै एयरपोर्टमा बस्न बाध्य छन् । एक सातादेखि हवाई उडान नहुँदा यात्रु मारमा परेको प्रमुख जिल्ला अधिकारी मोहनबहादुर थापाले जानकारी दिए ।
'मुगु रारा विमानस्थलमा दिउँसो १२ बजेपछि मौसम खुल्छ, प्राधिकरणको नियमले उडान हुन सक्दैन,' विमानस्थल प्रमुख रुमन भट्टराईले भने । बर्खाको बेला खराब मौसम र प्राधिकरणको नियमले मुगुमा हवाई उडान गर्न मुस्किल हुने उनले जनाए ।
कर्णाली पर्यटन उद्यमी समाजले प्राधिकरणको नियमप्रति सांकेतिक विरोध गर्न कर्णालीवासीलाई आग्रह गरेको छ । 'प्राधिकरणको गलत निर्णयले कर्णालीवासीलाई सास्ती भयो, बिरामीको ज्यान जान थाल्यो,' समाजका अध्यक्ष देवीकृष्ण रोकायाले भने, 'प्राधिकरणले यो नियम खारेज गर्नु पर्छ ।'
![](https://assets-cdn.ekantipur.com/uploads/source/ads/900-x-100-0172024023126.gif)