काठमाडौँ — नेपालका लागि अमेरिकी राजदूत डिन थम्पसन र यूएसएआईडी–नेपालकी प्रमुख सेपिडे केभान्शाडले सोमबार मधेशप्रदेशका मुख्यमन्त्री सरोजकुमार यादवसँग संयुक्त रूपमा यूएसएआईडी सार्वजनिक वित्तीय व्यवस्थापन क्रियाकलापको सुरु गरेका छन् ।

दुई करोड अमेरिकी डलर (करिब २ अर्ब ६२ करोड रुपैयाँ) बजेटसहितको उक्त पाँच–वर्षे कार्यक्रमले नेपालका मधेश र लुम्बिनी प्रदेशहरूमा संघीय, प्रादेशिक र स्थानीय तहका सरकारको सार्वजनिक वित्तीय व्यवस्थापनलाई सुदृढ बनाउने दूतावासले विज्ञप्तिमार्फत जनाएको छ ।

यस क्रियाकलापमार्फत यूएसएआईडी र नेपाल सरकारले राष्ट्रिय सार्वजनिक वित्तीय व्यवस्थापनसँग सम्बन्धित संस्था र प्रणालीहरूलाई सुदृढ र उन्नत बनाउन साझेदारी गर्ने उल्लेख छ । उक्त कार्यक्रममा स्थानीय सरकारका मेयर र उपमेयरहरूसहित मधेसप्रदेश सरकारका मन्त्री तथा सचिवहरूको उपस्थिति थियो ।

कार्यक्रममा अमेरिकी राजदूत डिन थम्पसनले भने,‘लोकतन्त्र तब फस्टाउँछ जब नेताहरू नागरिकप्रति उत्तरदायी हुन्छन् र नागरिकले आफ्ना नेताहरूको ध्येय र सीमा बुझ्छन् । पारदर्शिता र समुदायको पैसाको संकलन, लगानी र खर्च कसरी हुन्छ भन्ने बुझाइ लोकतान्त्रिक समाजको दुरुस्त सञ्चालनमा महत्त्वपूर्ण छ ।’

यूएसएआईडी–नेपालकी प्रमुख सेपिडे केभान्शाडले भनिन्,‘हामी पालिकाहरूले आफ्ना बजेटमा महिलाका आवश्यकताहरूलाई प्राथमिकतामा राखुन् भन्ने चाहन्छौं । यसमा महिलाहरूको सीपमूलक तालिम, व्यवसायका अवसरहरू र किशोरी तथा आमाहरूका निम्ति शिक्षा र स्वास्थ्य कार्यक्रमहरू पर्दछन् ।’