पञ्चकोशी चिनाउन तीर्थयात्रा
काठमाडौँ — पञ्चकोशी तीर्थस्थलको प्रचारप्रसारका लागि तीर्थयात्रा सुरु गरिएको छ । धार्मिक तथा ऐतिहासिक महत्त्व बोकेको पञ्चकोशी क्षेत्रलाई संघीय राजधानीसम्म चिनाउन पशुपतिदेखि पञ्चकोशी यात्रा सुरु गरिएको हो ।
यात्राको आयोजना मनघरी फाउन्डेसनले गरेको हो भने दैलेखी सेवा समाज, दुल्लु नगरपालिका, भैरवी गाउँपालिका र नेपाल उद्योग वाणिज्य महांसघको सहकार्य छ । पञ्चकोशी क्षेत्रमा पानीमाथि निरन्तर बल्ने ज्वाला, सिञ्जा राज्यको सभ्यता बोकेको दैलेखको दरबार, भाषाको शिलालेख, २२ देवललगायत विभिन्न पर्यटकीय क्षेत्रको अवलोकन गर्न तीर्थयात्रा सुरु गरिएको आयोजकले जनाएको छ । ‘दैलेखका विभिन्न पर्यटकीय क्षेत्रको प्रचारप्रसार हुन सकेको छैन,’ कर्णाली प्रदेशसभा सदस्य घनश्याम भण्डारीले भने, ‘पर्यटकीय गतिविधि बढाउन तीर्थयात्रा सुरु गरिएको हो ।’
उद्योग वाणिज्य महांसघ कर्णाली प्रदेशका अध्यक्ष पदम शाहीले कर्णालीमा पर्यटकीय क्षेत्रको अथाह सम्भावना भएको बताए । ‘कर्णाली प्रदेश सरकारले पनि कर्णालीमा पर्यटकीय क्षेत्रको हब बनाउन सकिन्छ भन्ने हेक्का राखेको छैन, कर्णाली आर्थिक रूपमा गरिब होला तर पर्यटकीय क्षेत्रमा कर्णाली निकै धनी छ,’ उनले भने, ‘कर्णाली चिनौं र चिनाऔं भन्ने अभियान पनि सुरु गर्न आवश्यक छ ।’ उद्योग वाणिज्य महासंघ कर्णाली प्रदेशका पर्यटनदूत भरतबन्धु थापाले पर्यटकीय क्षेत्रको सम्भावना धेरै भए पनि प्रचारप्रसार कम भएकाले यो अभियान थालिएको बताए । तीर्थयात्रामा सहभागी प्रतिनिधिसभा सदस्य सीता राणाले दैलेखका पर्यटकीय क्षेत्रहरूमा संरक्षण र पूर्वाधार विकास आवश्यक रहेको बताइन् ।
प्रकाशित : चैत्र १३, २०७९ ०९:५४