२५.१२°C काठमाडौं
काठमाडौंमा वायुको गुणस्तर: १५४

असिनाले स्याउ र तरकारी नष्ट

जाजरकोट — आइतबार र सोमबार परेको असिनापानीले जाजरकोटका पहाडी भूभागमा अन्नबाली, तरकारी र फुलेका स्याउबारी नष्ट गरेको छ । चैतको सुरुवातसँगै झन्डै ६ महिनापछि माटो भिज्ने गरी वर्षा हुँदा खुसी भएका जाजरकोटका किसान आइतबार परेको असिनापानीले अन्नबाली र फलफूल नष्ट गरिदिँदा चिन्तित भएका छन् ।

लामो समयसम्म खडेरी परेका कारण हिउँदे खेतीबाली नसप्रेको अवस्थामा पाक्नै लागेको गहुँ र जौं हिउँदेबालीसमेत असिनाले नाश गरिदिएपछि किसान चिन्तित छन् । जाजरकोटका पश्चिम कुशे, छेडागाड र उत्तरी भेक बारेकोट गाउँपालिकामा असिना परेको थियो । कुशेको ढिमे र दम्दाला, बारेकोटका ९ वडा असिना प्रभावित भएको प्रदेशसभा सदस्य वेदराज सिंहले बताए ।

हिउँदे खडेरीमा दुःखले हुर्काएको बाली असिनाले चुटेर नष्ट गरिदिएको बारेकोट सिर्पाचौरका किसान तिलबहादुर थापा बताउँछन् । आइतबार र सोमबार अपराह्न हिउँजस्तै जम्ने गरी असिना परेको र खेतबारीमा पाक्नै लागेको बाली सबै नष्ट गरिदिएको थापाको भनाइ छ । खेतबारीमा लगाएको गहुँ, तोरी, केराउ, जौं, उवालगायत भित्र्याउने समय भइसकेका हिउँदेबालीमा असिनाले क्षति गरेको छ । भर्खरै उम्रँदै गरेको बेमौसमी तरकारी सिमी, आलु, काँक्रो, घिरौलालगायतका तरकारी र अन्न बालीका बिरुवासमेत क्षति पुगेको दम्दालाका किसान कृष्णबहादुर मल्लले बताए ।

त्यसैगरी सुन्तला जातका फलफूल र केरा खेतीमा पनि असिनाले क्षति पुर्‍याएको छ । असिनाले गरेको क्षतिको विवरण संकलन भइरहेको छेडागाड नगरपालिकाका प्रमुख प्रशासकीय अधिकृत गंगबहादुर रोकायले बताए । कुशे गाउँपालिका प्रमुख हरिश्चन्द्र बस्नेतले जिल्लाको पश्चिम भेकमा अलिअलि भएको बालीसमेत असिनाले नष्ट गरिदिँदा किसान मारमा परेको बताए ।

प्रकाशित : चैत्र ७, २०७९ ०८:१७
प्रतिक्रिया
पठाउनुहोस्
जनताको राय

पार्टी स्थापनाकालदेखि निरन्तर अध्यक्ष रहेका जसपा नेपालका उपेन्द्र यादव महाधिवेशनबाट फेरि आफैं नेतृत्वमा आएका छन् । पटक-पटक एउटै व्यक्ति नेतृत्वमा रहिरहनुलाई के भन्नुहुन्छ ?