४ दिनदेखि एक वृद्ध बेपत्ता
रुकुम पश्चिम — मुसीकोट नगरपालिका ३ का ६१ वर्षीय लोकबहादुर खत्री हराएको ४ दिनसम्म पनि कुनै पत्ता लाग्न नसकेको उनका आफन्तले बताएका छन् । बुहारी पार्वती केसीका अनुसार गत चैत १ गते बुधबार बिहान साढे ७ बजेतिर घाँस काट्न भनेर वनतिर गएका खत्री घरमा नफर्किएका हुन् ।
बोल्न नसक्ने खत्री त्यस दिन सधैं झैं घाँस काट्न गएको तर दिउँसो १ बजेसम्म पनि घर नआएपछि खोजी गर्दा अहिलेसम्म नभेटिएको बुहारी केसीको भनाइ छ । उनको खोजीका लागि आफन्तले जिल्ला प्रहरी कार्यालयमा समेत खबर गरेका छन् ।
रुकुमका प्रहरी प्रमुख प्रहरी नायव उपरीक्षक नमराज भट्टराईले खोजीकार्य जारी रहेको बताउँदै प्रहरी निरीक्षकको नेतृत्वमा अनुसन्धान गरिरहेको बताए । उनले भने, ‘बेपत्ता व्यक्तिको खोजीका लागि हामी लागिपरेका छौं । शंका लागेका सबै ठाउामा खोजी जारी छ । तर, अहिलेसम्म कुनै प्रगति हुन सकेको छैन ।’
बेपत्ता खत्रीको परिवारमा उनकी श्रीमती, एक छोरा, एक छोरी, बुहारी र २ नातीनातिनी रहेका छन् ।
