हेलिकोप्टरबाट नुन ढुवानी
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
हुम्ला — साल्ट ट्रेडिङ कर्पोरेसनले जिल्लाका गाउँगाउँमा हेलिकोप्टरमार्फत नुन ढुवानी गर्न थालेको छ । कर्णाली करिडोरअन्तर्गत दुल्लीकुनादेखि लालीबगर खण्डमा सडक निर्माणको काम भइरहेकाले स्थलमार्गबाट ढुवानी गर्न समस्या भएपछि सर्केगार्ड गाउँपालिका–६ को ग्युसीबाट हेलिकोप्टरमा नुन ढुवानी गर्न थालिएको हो ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![हेलिकोप्टरबाट नुन ढुवानी](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/miscellaneous/helibat-nun-5-0832023033538-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
नुन सुर्खेतबाट पैदल मार्गबाट सलीसल्ला हुँदै ग्युसीसम्म गाडीमा ल्याइएको हो । ग्युसीबाट खार्पुनाथका ५ वटा वडा र सदरमुकाम सिमकोटसम्म कैलाश एयरको हेलिकोप्टरबाट ढुवानी भइरहेको छ । सरकारले ढुवानी अनुदानमा हुम्लामा नुन बिक्रीवितरण गरिरहेको छ । साल्ट ट्रेडिङका शाखा प्रमुख राजबहादुर लामाले माथिल्लो हुम्लाका ३ वटा नाम्खा, सिमकोट र खार्पुनाथ गाउँपालिकाका लागि चालु आर्थिक वर्षका लागि आएको २ हजार २ सय क्विन्टल नुन हेलिकोप्टरमार्फत ढुवानी भइरहेको बताए । उनका अनुसार अहिलेसम्म १ हजार ५ सय १२ क्विन्टल नुन ढुवानी भएको छ । ५ वटा वडा रहेको खार्पुनाथ गाउँपालिकाका सबै वडामा हेलिकोप्टरबाटै ढुवानी गरि १ हजार १ सय ९७ क्विन्टल नुन वितरण गरिएको उनले बताए । उनका अनुसार पालिकाका २१ वटै बस्तीमा नुन वितरण गरिएको छ ।
गाउँमै नुन पुगेपछि सिमकोटस्थित शाखाको गोदामबाट नुन खरिद गर्नुपर्ने बाध्यताबाट स्थानीयले मुक्ति पाएको स्थानीय अगुवा भीमबहादुर रावलले बताए । हेलिकोप्टरले दैनिक २० भन्दा बढी उडान भरेर नुन ढुवानी गरिरहेको छ । सिटमा भन्दा झुन्ड्याएर बढी नुन ढुवानी गर्न सकिने भएकाले हेलिकोप्टरमा झुन्ड्याएर नुन ओसार्ने काम भइरहेको शाखा प्रमुख लामाले बताए । ‘भित्र राख्नुभन्दा झुन्ड्याएर ल्याउादा ५० केजी बढी ढुवानी हुने रहेछ,’ उनले भने, ‘सरकारले नै ढुवानी भाडा तिर्ने भएकाले प्रतिकेजी ९ रुपियाामा नुन बिक्री गरिरहेका छौं ।’
![](https://assets-cdn.ekantipur.com/uploads/source/ads/900-x-100-0172024023126.gif)