हुम्लामा ब्लड बैंक नहुँदा रक्तदानमा सेना-प्रहरीको भर
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
हुम्ला — जिल्ला अस्पताल हुम्लामा ब्लड बैंक नहुँदा उपचारार्थ भर्ना भएका बिरामीलाई रगत चाहिएको अवस्थामा सेना र प्रहरीको भर पर्नुपर्ने भएको छ ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![हुम्लामा ब्लड बैंक नहुँदा रक्तदानमा सेना-प्रहरीको भर](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/third-party/blooddonation-0832023032412-1000x0.gif&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
हुम्ला जिल्ला अस्पतालमा ब्लड बैंकको व्यवस्था नहुनु र रगत आवश्यक परे सुरक्षाकर्मीलाई खबर गर्नुपर्ने अवस्था रहेको छ । स्वास्थ्य सेवा कार्यालयका प्रमुख प्रेम बहादुर सिंहका अनुसार बिरामीलाई रगत चाहिएको अवस्थामा नेपाली सेना, नेपाल प्रहरी र सशस्त्र प्रहरीको रगतको भर पर्नुपर्ने बाध्यता छ ।
पछिल्लो साता मात्रै सिमकोट गाउँपालिका–२ स्थित ठेहे गाउँकी ४८ वर्षीया ल्वारनी रावललाई आकस्मिक रगत चडाउनु पर्ने भएपछि रक्त समूह मिल्ने उनको गाउँवासी र सिमकोटवासीलाई आग्रह गरियो । तर रक्तदानका लागि कोही पनि तयार नभएपछि अन्तिम अवस्थामा प्रहरी जवानबाट रगत पूर्ति गर्नुपरेको बिरामीका श्रीमान डबले रावल बताउँछन् ।
रावलका अनुसार रगत आवश्यक पर्नेबित्तिकै कोही तयार नभएपछि अस्पतालका स्वास्थ्यकर्मीहरुले नेपाल प्रहरीलाई खबर गर्दा बिरामीसँग रक्त समूह मिल्ने प्रहरी आएर रगत दिएका थिए ।
हुम्लामा यसपटक मात्रै हैन, वर्षेनि अस्पतालमा आवश्यक रगत जिल्लाकै सुरक्षाकर्मीहरूले उपलब्ध गराउँदै आएका छन् । अस्पतालमा यस वर्ष हालसम्म तीन जना बिरामीलाई रगत आवश्यक परेकोमा सबै जिल्लामा कार्यरत सुरक्षाकर्मीहरूबाटै उपलब्ध गराइएको प्रमुख सिंहले बताए । हुम्ला जिल्ला अस्पतालको रगत व्यवस्थापनको भरपर्दो माध्यम नेपाली सेना, नेपाल प्रहरी र सशस्त्र प्रहरी भएको उनको भनाइ छ ।
अस्पतालमा ब्लड बैंक नभएका कारण रगत संकलन गर्न नसकिने भएकाले अस्पतालमा उपचारका लागि भर्ना भएका बिरामीलाई रगत आवश्यक परेमा तत्कालै नेपाली सेना, नेपाल प्रहरी र सशस्त्र प्रहरीलाई खबर गरी आवश्यक रगत पूर्ति गर्नुपर्ने अवस्था रहेको सिंह बताउँछन् ।
अस्पतालका मेसु डा. कैलाश लामा भन्छन्, 'बिरामीलाई रगत अभाव हुँदा अस्पतालले सेना र प्रहरीलाई ब्लड बैंकको रुपमा लिनु हाम्रो बाध्यता छ । बिरामीलाई आवश्यक पर्ने रगत पूर्तिको एक मात्र उपाय जिल्लामा कार्यरत सुरक्षाकर्मी मात्रै बनेका छन् ।'
![](https://assets-cdn.ekantipur.com/uploads/source/ads/900-x-100-0172024023126.gif)