![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
रुकुम पश्चिम — बजार नपाउँदा त्रिवेणी गाउँपालिकाका किसानहरूको अदुवा गाउँगाउँमा थन्किएको छ । अदुवा बिक्री नभएपछि किसान निराश छन् । त्रिवेणी गाउँपालिकालाई सरकारले अदुवा ब्लक घोषणा गरेको छ । सबैभन्दा बढी अदुवा १ नम्बर वडाका किसानको घरघरमा थुप्रिएको हो ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![घरघरमा थन्कियो अदुवा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2021/miscellaneous/2212kaaduwa-23122021035349-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
कतिले गाउँनजिकको बजार पुर्याएका छन् कतिले घरमै थुपारेका छन् । तर अदुवा बिक्री भइरहेको छैन । गत वर्ष कृषि विकास कार्यालयको २० लाख र किसानको २० लाख गरी ४० लाख रुपैयाँ बजेटबाट १ नम्बर वडामा अदुवा लगाइएको थियो । अदुवा ब्लकअन्तर्गत उत्पादन भएको अधिकांश अदुवा घरमै थन्किएको स्थानीय किसान प्रेमबहादुर ओलीले बताए । ‘घाटामा कसरी अदुवा बेच्ने ?’ उनले भने, ‘व्यापारीले १२ देखि १५ रुपैयाँमा अदुवा किन्न खोजेका छन् । तर लागतभन्दा कम मूल्यमा अदुवा बिक्री गर्न सकिएन ।’ उनका अनुसार १ नम्बर वडामा मात्रै करिब २५ सय क्विन्टल अदुवा उत्पादन भएको छ । तर यसबाट एक किलो अदुवा पनि बिक्री हुन सकेको छैन ।
विगतका वर्षमा घरघरै आएर अदुवा किन्ने व्यापारी यो वर्ष न्यून मूल्य सुनाएरै पन्छिने गरेको किसानहरूले बताएका छन् । सरकारको सहयोगपछि अदुवा उत्पादन र उत्पादन गर्ने क्षेत्र बढाएका किसान अब डराउनुपर्ने अवस्था आएको किसान रामबहादुर सुनारले बताए । ‘आफैं पनि अदुवा खेती गर्थ्यौं, यो पटक सरकारले समेत ५० प्रतिशत सहयोग गरेपछि खेती गर्ने क्षेत्र र उत्पादन दुवै बढायौं,’ उनले भने, ‘यसै वर्ष यो हालत व्यहोर्नुपर्ने भयो ।’
उत्पादन भएको अदुवाको व्यवस्थापन सरकारले गर्नुपर्ने स्थानीय मनकुमारी सुनारले बताइन् । ‘लागत मात्रै बेहोरेर भए पनि अदुवाको व्यवस्थापन भए हुन्थ्यो,’ उनले भनिन्, ‘तेत्रो दुःख गरेर फलाएको अदुवा कुहाउन चाहन्नौं ।’ गाउँपालिका अध्यक्ष झक्कुप्रसाद घर्तीमगरले अदुवाका लागि बजारको अभाव भएको बताए । उनका अनुसार केही व्यापारीले बजारमा एकाधिकार जमाएर भाउ घटाएका हुन् । उनले अदुवाको बजारीकरणका लागि विभिन्न निकायसँग सहजीकरण गरिरहेको जानकारी दिए ।
![](https://assets-cdn.ekantipur.com/uploads/source/ads/900-x-100-0172024023126.gif)