सीमा क्षेत्रका प्रहरी चौकी विस्थापित- कर्णाली - कान्तिपुर समाचार

सीमा क्षेत्रका प्रहरी चौकी विस्थापित

हिमपातको मौसम सुरू भएपछि चौकीमा कार्यरत प्रहरीलाई हुम्ला सदरमुकाम सिमकोट र मुगु सदरमुकाम गमगढी बोलाइएको छ ।
राजबहादुर शाही

मुगु — अत्यधिक जाडो बढेपछि नेपाल र चीन सीमास्थित हुम्लाको लिमी, डोल्पाको थार्का र मुगुको मुगुगाउँस्थित प्रहरी चौकी विस्थापित भएका छन् । हिमपातको मौसम सुरु भएपछि चौकीमा कार्यरत प्रहरीलाई हुम्ला सदरमुकाम सिमकोट र मुगु सदरमुकाम गमगढी बोलाइएको हो ।

चिसोका कारण आसपासका गाउँहरू सुनसान बनेपछि प्रहरी चौकी विस्थापित भएका हुन् । जाडो कटाउन सीमावर्ती गाउँका बासिन्दा बेंसीतिर झरेका छन् । सदरमुकाम आएका प्रहरीहरू गर्मी सुरु भएपछि चैत महिनामा मात्र चौकीमा फर्किने मुगुका डीएसपी सुवास हमालले बताए । उनका अनुसार चिसो बढेपछि चौकीमा कार्यरत ११ प्रहरी सदरमुकाम आएका हुन् । ‘गाउँमा जताततै बरफ जमेको छ,’ उनले भने, ‘स्थानीयवासी पनि नभएपछि प्रहरीहरूलाई सदरमुकाम बोलाएका हौं ।’

छिमेकी जिल्ला हुम्लाको लिमीमा रहेको प्रहरी चौकी पनि चिसो बढेपछि दुई साताअघि सदरमुकाम सिमकोट सारिएको जिल्ला प्रहरी कार्यालयले जनाएको छ । प्रहरी सहायक निरीक्षक (असई) को नेतृत्वमा २५ जनाको दरबन्दी रहेको लिमी प्रहरी चौकी चिसोका कारण करिब ५ महिनासम्म बन्द हुने गरेको छ । डोल्पाको तिब्बत सीमा क्षेत्रमा राखिएको थार्का प्रहरी चौकी पनि चिसो बढेपछि डेढ साताअघि सदरमुकाम दुनै सारिएको डोल्पाका डीएसपी निरञ्जन थापाले बताए ।

चीन सीमा क्षेत्रमा अवैध गतिविधि नियन्त्रण गर्न र राजस्व संकलन गर्न सरकारले स्थापना गरेका प्रहरी चौकीहरू चिसोका कारण बेमौसमी बनेका हुन् । गर्मी सुरु भएपछि प्रहरीलाई फेरि गाउँमा पठाइने मुगुका प्रमुख जिल्ला अधिकारी रोमबहादुर महत बताए । ‘मानिस नभएपछि प्रहरी पनि यता आए,’ उनले भने, ‘चैतपछि गाउँमा हिउँ पग्लन्छ, स्थानीय गाउँ फर्किएपछि प्रहरी पनि सँगसँगै त्यहाँ जानेछन् ।’ उनले सीमा क्षेत्रमा स्थापना गरिएका भन्सार, स्वास्थ्यचौकी र सामुदायिक विद्यालयलाई पनि बेंसीमा झारिएको जानकारी दिए । झन्डै ६ महिना सदरमुकाम र ६ महिना गाउँमा हुँदा सुरक्षा व्यवस्था भरपर्दो बन्न नसकेको स्थानीयको गुनासो छ ।


प्रकाशित : मंसिर १६, २०७८ ०९:२४
प्रतिक्रिया
पठाउनुहोस्

अस्तायो विदेश पुग्ने सपना

मेनुका ढुंगाना

अछाम — अछामको मंगलसेनबाट मंगलवार धनगढी जादै गरेको बस् मंगलसेन नगरपालिका— ४ कैलाशखोलानजिकै दुर्घटना हुँदा २ जनाको ज्यान गयो । ज्यान गुमाउने दुवै जना मंगलसेन नगरपालिका— १ का २२ वर्षीय एकेन्द्र थापा रोमानिया कामको खोजीमा जान घरबाट बिदाइ भएर गएका थिए ।

मंगलसेन नगरपालिका— १४ का ५३ वर्षीय टंक भण्डारी कामको खोजीका लागि भारत जान घरबाट निस्किएका थिए । तर २२ वर्षीय एकेन्द्र र ५३ वर्षीय टंक गन्तव्यमा नपुग्दै बस दुर्घटनामा परेर कैलाशखोलामा अस्ताए । उनीहरूको भौतिक शरिर मात्रै नभइ परिवारका सपनासमेत सेलाए ।

कोरोना संक्रमणको कारण भारतमा रोजगारी गुमेपछि कालागाउँका टंक भण्डारी एक वर्षअघि घर आएका थिए । जीविकोपार्जनको माध्यम नै भारत गएर पैसा कमाउनु थियो । ‘घरको मुख्य कमााउने मान्छे नै दुर्घटनामा परेर मृत्यु भएपछि परिवारलाई असह्य पीडा भएको छ । अब के गर्ने भनेर सोच्नै सकिएको छैन’ मृतक टंकका भतिजा जीवन भण्डारीले भने, ‘मंगलसेनबाट गाडी चढेको १५ मिनेट नपुग्दै दुर्घटना भएको छ । त्यो ठाउँमा घुम्ती पनि छैन । कुनै अप्ठ्यारो पनि छैन । चालकले जबरर्जस्ती फालेर मारेको देखिन्छ ।’

मंगलसेन —१ कुन्तिका एकेन्द्र पनि मंसिर २२ गते रोमानिया जानको लागि घरबा बिदावारी गरेर निस्केका थिए । घरको आर्थिक अवस्था कमजोर भएका कारण उनले आफ्नो पढाइ अगाडी बढाउन सकेनन् । तर भाइबहिनीको पढाइ र घरको आर्थिक अवस्था सुधार्नको लागि उनी वैदेशिक रोजगारीमा जान तयार भएका थिए ।

‘घरबाट अनेक सपना बोकेर निस्किेको जवान छोरो गाडी चढेको १५ मिनेटमै अस्ताएपछि आमाबुवा र आफन्त सम्हालिउन पनि कसरी’ उनका आफन्त टेक बहादु थापाले भने, ‘विदेशबाट फर्केर बिहे गर्नको लागि केटि समेत हेरेर गएका थिए । लाखौं खर्च गरेर विदेश जानलाई घरबाट पठाएको सन्तानलाई आफ्नै अगाडि गुमाउँदा गाउँ नै शोकमा छ ।’

३८जना बसमा सवारमध्ये ३६ जना घाइते भएका छन् । जिल्ला अस्पताल मंगलसेनमा उपचाररत घाइते मंगलसेन नगरपालिका—३ की २४ वर्षीया सिर्जना साउदले ड्राइभरले एक हातले फोन समातेको र अर्को हातले गाडी चलाएको सुनाइन् । सुरुमा पनि साघुँरो बाटोमा अन्य गाडीलाई ओभरटेक गर्दै धेरै स्पिडमा गाडी कुदाएको उनको भनाइ छ । ‘घटनास्थल भन्दा अलि पर सिर्जना चोकनजिक पनि बसको पांग्रा नालीमा जान लागेको थियो । त्यतिखेर पनि हामी डरले चिच्याएका हौं । अलि अगाडी नपुग्दै गाडी रोड तल खस्यो’ घाइते सिर्जनाले भनिन, ‘घाइते भएकाहरूलाई उद्दार गर्नुभन्दा पनि चालकलाई भाग्नै हतारजस्तो देखिन्थ्यो ।’ सिर्जनासहित उनका बुवा, आमादाइ र भाइ कामको खोजीमा भारत जान लागेका थिए ।

मंगलसेनबाट धनगढी जाँदै गरेको ना ६ ख ८२९ नम्बरको बस मंगलसेन नगरपालिका—४ मा दुर्घटना भएपछि बुधबार मृतक र घाइतेका आफन्तले मंगलसेन नगरपालिका र सडक बन्द गरे । चालकको लापरबाहीले गाडी दुर्घटना भएको भन्दै उनीहरूले उचित क्षतिपूर्तिको माग गर्दै सडक बन्द गरेका हुन् ।

प्रकाशित : मंसिर १६, २०७८ ०९:२०
पूरा पढ्नुहोस्
प्रतिक्रिया
पठाउनुहोस्
×