वीरेन्द्रनगर — नेपाली कांग्रेस सुर्खेत क्षेत्र नम्बर १ र २ को निर्वाचनमा देउवा पक्षले वर्चश्व कायम गरेको छ । क्षेत्र नम्बर १ मा देउवा समूहका झकबहादुर डाँगीको प्यानल विजय भएको छ । डाँगीले ७१९ मत लिई विजय भएका छन् भने उनका प्रतिद्वन्द्वी बलबहादुर वलीले एक सय ३ मत प्राप्त गरेका छन् । जम्मा ९ सय १७ क्षेत्रीय प्रतिनिधिहरूमध्ये मंगलबार भएको निर्वाचनमा ८ सय ७४ मत खसेको थियो ।
क्षेत्रीय सचिवमा मोहन रानाले सात सय २० र पदम बहादुर खत्रीले ७१७ मत प्राप्त गरे । सह–सचिवमा प्रेम सिंह ठकुरीले ६ सय ८४ र यामलाल पंगालीले ६ सय ८७ मत प्राप्त गरी विजयी भएका छन् ।
प्रत्यक्ष तर्फको महिला सदस्यमा भद्राकुमारी योगी, प्रत्यक्षतर्फको पुरुष सदस्यमा पूर्णप्रसाद जैसी, भीमबहादुर बुढा र विनयकुमार सिंह निर्वाचित भएका छन् । खस आर्य पुरुष सदस्यमा प्रेमबहादुर बुढा र भीमबहादुर खत्री निर्वाचित भएका छन् ।
यस्तै, क्षेत्र नम्बर १ बाट महाधिवेशन प्रतिनिधिमा कांग्रेस महामन्त्री पूर्णबहादुर खड्का विजयी भएका छन् । उनले ७ सय ३६ मत प्राप्त गरे । केन्द्रीय समितिमा रहेका पदाधिकारी स्वत: महाधिवेशन प्रतिनिधि हुने विधानत: व्यवस्था भएपनि महामन्त्री खड्काले आफ्नो क्षेत्रका प्रतिनिधिद्वारा अनुमोदित भएर जाने भन्दै उम्मेद्वारी दिएका थिए ।
महाधिवेशन प्रतिनिधिमा खड्कासहित उदय गिरी, ऋषिप्रसाद शर्मा, खड्गबहादुर पोखरेल, खिमानन्द ढकाल, देवबहादुर चन्द, नरहरि भट्टराई, लक्ष्मी पौडेल, हरिप्रसाद शर्मा, हिरामणि सुनार, अमृता शाही, खगिसरा आचार्य, धनकुमारी बुढा योगी, मैना विक, यामकुमारी वैगार र उदे कामी निर्वाचित भएका छन् ।
यस्तै, सुर्खेत क्षेत्र नम्बर २ को अधिवेशनमा पनि पार्टी सभापति शेरबहादुर देउवा पक्षको प्यानलले नै वर्चश्व जमाएको छ । क्षेत्रीय सभापतिका लागि भएको मतदानमा देउवा पक्षका ईन्द्रबहादुर रावलले ६४८ मत ल्याएर विजयी भएका छन् । रावलले रामचन्द्र पौडेल पक्षका उम्मेदवार ललित भट्टराईलाई १ सय ९८ भारी मतान्तरले हराएका हुन् । भट्टराईले २८८ मत ल्याएका छन् । सभापतिका उम्मेदवार लालवीर भण्डारीले भने ६ मत मात्रै पाए ।
प्रकाशित : मंसिर ८, २०७८ १३:३९
