जाजरकोटमा विद्यालय भवन भत्किँदा नौ विद्यार्थी घाइते

बालविकास कक्षा संचालन हुँदै आएको उक्त भवनको कक्षा कोठाको गारो शुक्रबार दिउँसो एक्कासी भत्किएपछि भागदौडको क्रममा विद्यार्थी घाइते भएको शिक्षक कालीप्रसाद थापाले बताए । उनका अनुसार विद्यार्थीहरु हिम्मत सिंह, स्मृति शाही, दिप्सन नेपाली, विजया शाही, अतिथ नेपाली, अनिशा शाहीलगायत घाइते भएका छन् । उनीहरुको आधारभूत अस्पताल लिम्सामा उपचार भइरहेको छ ।

घाइतेमध्ये ४ जनाको अवस्था गम्भीर रहेको सूचना प्राप्त भएको जिल्ला प्रहरी प्रमुख मधुकुमार थापाले बताए । तत्काल अन्य विद्यार्थी, शिक्षक र प्रहरीले घाइते विद्यार्थीको उद्धार गरेर अस्पताल पुर्‍याएका थिए ।

जीर्ण चुहिने भवन बिहीबार परेको पानीका कारण गारो भत्किएको प्रहरीको अनुमान छ ।