गाउँ पसे दलहरू- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

गाउँ पसे दलहरू

तुलाराम पाण्डे

कालीकोट — कोरोना महामारीका कारण सुस्ताएका विभिन्न पार्टीका गतिविधिहरू गाउँ केन्द्रित बन्न थालेका छन् । जिल्लाका सबैजसो दलले सदस्यता वितरण, भेला, प्रशिक्षण, आमसभालगायत कार्यक्रमलाई तीव्रता दिएका हुन् । 

कांग्रेस महाधिवेशनको तयारीका लागि गाउँ पसेको छ भने एमालेले विधान अधिवेशनको तयारीलाई ग्रामीण क्षेत्रमा पुर्‍याएको छ । माओवादी केन्द्र, एकीकृत समाजवादी, राष्ट्रिय प्रजातन्त्र पार्टी, नेत्रविक्रम चन्द समूहले विभिन्न गतिविधिलाई सदरमुकाम बाहिर केन्द्रित गरेका छन् ।

एमाले र एकीकृत समाजवादीका नेताहरू कार्यकर्तालाई आफ्नो पार्टीमा ल्याउन क्रियाशील बनिरहेका छन् । अन्य दलको तुलनामा उनीहरूको सक्रियता बढी छ । कार्यकर्ताहरू गलत प्रचारको पछि नलागून् भनेर गाउँमा बढी मिहिनेत गर्नुपरेको एमाले अध्यक्ष नगिन्द्र शाहीले बताए । ‘पार्टी विभाजनको असर समुदायसम्म त परेको छैन,’ उनले भने, ‘केही अवसरवादी नेताहरू पाखा लागेका मात्र हुन् ।’ कालीकोटमा उनीसहित उपाध्यक्ष रमेशकुमार शाही एमालेमै छन् ।

साविक एमालेका सचिव चित्रसिंह गाउँले, उपसचिव कमलबहादुर शाही, पूर्वसांसद तुलाराज विष्ट, नरहरिनाथ गाउँपालिका अध्यक्ष धीरबहादुर विष्ट, खाडाचक्र नगरपालिका उपप्रमुख विजया विष्ट, शुभकालिका गाउँपालिका अध्यक्ष खडानन्द चौलागार्इं र उपाध्यक्ष पम्फाकुमारी शाहीलगायत नेताले एकीकृत समाजवादी रोजेका छन् । आगामी निर्वाचनमा एमालेका उम्मेदवारको जमानत जफत हुने गरी आफूहरू पार्टी विस्तारमा लागेको एकीकृत समाजवादीका अध्यक्ष चित्रसिंह गाउँलेले बताए ।

कालीकोटको खाडाचक्रमा माओवादी केन्द्रद्वारा आयोजित प्रशिक्षण कार्यक्रममा अन्य दलबाट आएकालाई पार्टी प्रवेश गराउँदै कर्णालीका मुख्यमन्त्री महेन्द्रबहादुर शाही । तस्बिर : तलाराम/कान्तिपुर

कोरोनामा राजनीतिक गतिविधि शून्यजस्तै भएको कालीकोटमा भदौ लागेपछि सबै दलले गतिविधि बढाएको जिल्ला प्रहरी प्रमुख डीएसपी चक्रबहादुर शाहले बताए । उनका अनुसार दिनहुँजसो गाउँगाउँमा विभिन्न पार्टीका आमसभा, भेला, भेटघाटलगायतका गतिविधि भइरहेका छन् । उनले दलका कार्यकर्ताबीच हालसम्म कुनै अप्रिय घटना नभए पनि चुनाव नजिकिँदै जाँदा हिंसाका घटना हुन सक्नेमा प्रहरी सचेत रहेको जानकारी दिए ।

महाधिवेशन नजिकिएसँगै कांग्रेसले पनि वडा, पालिका र निर्वाचन क्षेत्रको भेलालाई तीव्र बनाएको नेता भूपेन्द्रजंग शाहीले बताए । उनका अनुसार सबै वडा र ९ वटै स्थानीय तहमा अधिवेशन सम्पन्न भइसकेको छ । ‘केन्द्रमा यो पक्ष र त्यो पक्ष भए पनि जिल्लाका सबै स्थानीय तहमा सहमतिको आधारमा नेतृत्व चयन भएको छ,’ उनले भने, ‘यसले आगामी चुनाव कांग्रेसले जित्ने सन्देश दिएको छ ।’

नेत्रविक्रम चन्द्र समूह, जनमोर्चा र नेमकिपाले एमसीसीविरुद्ध गाउँगाउँमा खबरदारी गर्दै आएको जनाएका छन् । माओवादी केन्द्रले पनि सबै स्थानीय तहमा भेला, प्रशिक्षण तथा जनवर्गीय संगठनको गठनलाई तीव्रता दिइएको जनाएको छ । कर्णाली प्रदेशका मुख्यमन्त्री तथा कालीकोटका इन्चार्ज महेन्द्रवहादुर शाही महिनैपिच्छे कालीकोट आएर प्रदेश सरकारका योजनासहित पार्टी गतिविधिमा संलग्न हुने गरेका छन् । उनी झन्डै दुई साता विभिन्न गाउँमा पार्टीका कार्यक्रममा सहभागी भएर सोमबार मान्म फर्किए ।

एकै दिन ३ दलका कार्यक्रम

सदरमुकाम मान्ममा मंगलबार ३ दलका ठूला कार्यक्रम सञ्चालन भए । कांग्रेस र राप्रपाले त पञ्चेबाजा, हुड्केसहित पालैपालो बजार परिक्रमा गरेर सभा गरे भने माओवादी केन्द्रले खाडाचक्र नगरपालिकास्तरीय प्रशिक्षण कार्यक्रम सञ्चालन गर्‍यो । कांग्रेसको ‘क’ प्रदेशस्तरीय अधिवेशन मान्मको खुलामञ्चमा र राप्रपाको एकता भेला जिल्ला समन्वय समितिमा थियो । माओवादीले एक होटलमा प्रशिक्षण कार्यक्रम चलाएको थियो । त्यस्तै कांग्रेसले ‘ख’ प्रदेश अधिवेशन मंगलबार नै रास्कोटमा सुरु गरेको छ ।

प्रकाशित : आश्विन १४, २०७८ १२:२८
प्रतिक्रिया
पठाउनुहोस्

सुक्खा क्षेत्रमा खाद्य कचहरी

तुलाराम पाण्डे

कालीकोट — सुक्खा खडेरीग्रस्त पलाता गाउँपालिकामा नियमित रुपमा खाद्य कचहरी सञ्चालन गर्न थालिएको छ । पलाताको खाद्य संकट समाधान गर्न समुदाय स्तरमा छलफल गरेर वडास्तरीय कचहरी सञ्चालन गर्ने गरिएको हो । 

वडाका समस्यालाई सामूहिक रुपमा सरोकारवालासँग राखेर साझा कार्य योजना निर्माण गर्ने गरिएको पलाता–२ का वडाध्यक्ष बिरी विश्वकर्माले बताए । उनका अनुसार कचहरीले स्थानीय उत्पादन वृद्धि गर्न पनि सकारात्मक भूमिका खेलेको छ । वार्षिक २ पटक आयोजना हुने कचहरीलाई मासिक रूपमा सञ्चान गर्न पहल थालिएको उनले जानकारी दिए ।

डेनिस रेडियोको सहयोगमा गाउँपालिकाकामा खाद्य कचहरी, किशोरी समूहमा संवाद कक्षा, विद्यालय पढ्ने बालिका लक्षित गरेर होमवर्क (गृहकार्य) सेसनलगायत कार्यक्रम सञ्चालन भइरहेको हो । सरोकारवालालाई जवाफदेही बनाउँदै विपन्न समुदायका लागि साक्षरता कक्षा, सशक्तीकरण र आयआर्जनका कार्यक्रम कचहरीमार्फत भइरहेको पलाता २ राडुनेटाकी संगीता बमले बताइन् । एक महिनाअघि भएको कचहरीमा पलाताको खाद्य सुरक्षालाई प्रभावकारी बनाउन समुदायमा जनचेतनामूलक अभियान सञ्चालन गर्ने, पानीका मुहान संरक्षण गर्न वृक्षारोपण गर्ने, खाद्यान्न अभावका कारण समस्यामा परेका बालबालिका, किशोरी र महिलाको आयआर्जनमा टेवा पुर्‍याउनेलगायत प्रतिबद्धता गरिएको थियो । त्यस्तै, सरोकारवालाले किसानलाई फलफूल तथा नगदेबालीमा संलग्न गराउन बजेट विनियोजन गर्ने, किशोरीहरूको विद्यालय नियमित गराउन उनीहरूका अभिभावकलाई आयआर्जनका क्रियाकलापमा सहभागी गराउने, खाद्यसुरक्षासम्बन्धी असल अभ्यासलाई संरक्षण गर्न प्रोत्साहित गर्नेलगायत प्रतिबद्धता गरेको गाउँपालिकाले जनाएको छ ।

खाद्यान्न खरिदको लागि सदरमुकाम मान्म, जितेलगायत बजार धाउन बाध्य पलातावासी क्रमशः कृषिमा आत्मनिर्भर बन्न थालेको स्थानीय बुद्धिजीवी पहलसिंह बमले बताए । उनका अनुसार थिर्पूको तुलनामा खिस्न र धौलागोहमा बढी खाद्यान्न समस्या हुने गरेको छ । यो वर्षअनुकूल वर्षा भएकाले खाद्यान्नको उत्पादन राम्रो हुने देखिएको उनले बताए । खाद्य कचहरीको सुझावअनुसार खडेरीविरुद्ध लड्न आकाशेपानी संकलन, कर्णाली नदीको पानी लिफ्टमार्फत पम्पिङ, सिँचाइ पोखरी निर्माणलगायत योजना निर्माण गरिने गाउँपालिकाले जनाएको छ । दुरदराजका बासिन्दाको चेतनास्तर बढाउन र गलत मूल्य मान्यतालाई हटाउन कचहरी प्रभावकारी बनेको गाउँपालिका अध्यक्ष लक्ष्मणबहादुर बमले बताए । ‘वर्षौदेखि अशिक्षा, अभाव र भोकमरीको चपेटामा परेका स्थानीयहरू आत्मनिर्भर बन्न थालेका छन्,’ उनले भने । आइतबार थिर्पूमा आयोजित सिकाइ आदानप्रदान कार्यक्रममा बमले जनताको चेतना बढाउँदै उन्नत कृषि प्रविधि अपनाउन सके पलातालाई आत्मनिर्भर बनाउन सकिने बताए ।

प्रकाशित : आश्विन १२, २०७८ १२:१७
पूरा पढ्नुहोस्
प्रतिक्रिया
पठाउनुहोस्
×