सुरक्षागार्डको भरमा टेलिकम- कर्णाली - कान्तिपुर समाचार

सुरक्षागार्डको भरमा टेलिकम

कार्यालयमा प्रमुख र प्राविधिक नहुँदा प्रशासनिक, टेलिफोन मर्मत, नयाँ जडान, सिमकार्ड वितरण बन्द
राजबहादुर शाही

मुगु — नेपाल टेलिकमको जिल्ला कार्यालय झन्डै दुई सातादेखि सुरक्षागार्डको भरमा छ । अन्य कर्मचारी नभएपछि टेलिकमको सेवा सुरक्षागार्ड सुरेन्द्र रावलको भरमा सञ्चालन भइरहेको हो ।

वैशाखमा कार्यालय प्रमुख विशालकुमार देवकोटा सरुवा भएपछि उनको ठाउँमा कसैलाई पठाइएको छैन । निमित्तको जिम्मेवारी सम्हाल्दै आएका प्राविधिक रमेश खड्का सुत्केरी बिदामा घर गएपछि टेलिकम कर्मचारीविहीन बनेको हो । सुरक्षागार्ड रावलले प्रमुखदेखि कार्यालय सहयोगीसम्मको कामकाज आफैंले सम्हाल्दै आएका छन् । कार्यालयमा प्रमुख र प्राविधिक नहुँदा प्रशासनिक कामदेखि टेलिफोन मर्मत, नयाँ जडान, मोबाइल सिमकार्ड वितरणलगायत काम बन्द भएको छ । बन्द गएका सिमकार्ड खोल्ने र इन्टरनेट जडानका काम पनि ठप्प भएको उनले जानकारी दिए । उनका अनुसार राजस्व संकलनको काम पनि लामो समयदेखि हुन सकेको छैन ।

प्रमुख तथा प्राविधिक नहुँदा सेवाग्राही सास्ती खेप्न बाध्य छन् । दैनिक ५० जनासम्म सेवाग्राही आउने गरे पनि रित्तोहात फर्काउनु परेको रावलले बताए । टेलिकम कार्यालय कर्मचारीविहीन हुँदा सानो कामका लागि पनि सास्ती भोग्नुपरेको छायानाथरारा नगरपालिकाका तिलकबहादुर मल्लले बताए । ‘सञ्चारजस्तो महत्त्वपूर्ण कार्यालयमा न त प्रमुख छन्, न प्राविधिक नै,’ उनले भने, ‘बेहाल स्थितिमा कार्यालय छोडिएको छ, नियमन गर्ने निकाय पनि मौन छन् ।’ उनले टावर हेरफेर र मर्मत नहुँदा केही गाउँहरू सञ्चार सुविधाविहीन बनेको बताए ।

नेटवर्क खराबीले हैरान

गमगढीस्थित नेपाल टेलिकमको टावरमा समस्या आएपछि मोबाइल नेटवर्कमा खराबी आएको छ । छिनछिनमा मोबाइल नेटवर्क बन्द हुने समस्याले उपभोक्ता आजित छन् । कुरा गर्दागर्दै बीचैमा फोन काटिने समस्या देखिन थालेको स्थानीय हस्ता भामले बताइन् । ‘फोन गर्दा न राम्ररी सुनिन्छ न पुरै कुरा गर्न पाइन्छ,’ उनले भनिन्, ‘इन्टरनेट सेवा पनि भरपर्दो छैन ।’

मोबाइल नेटवर्क खराबीले अत्यावश्यक काम पर्दा समेत आफन्तसँग कुरा गर्न समस्या भएको स्थानीय व्यवसायी नागमल शाहीले बताए । ‘इन्टरनेट सेवा बेलाबेलामा अवरुद्ध हुँदा व्यवसाय नै प्रभावित भएको छ,’ उनले भने, ‘फोनकै कारण जनताले कहिलेसम्म सास्ती भोग्नुपर्ने हो ?’

दैलेख र कालीकोट सीमास्थित माइथाप्ला टावरमा खराबी आएकाले नेटवर्कमा समस्या आएको टेलिकमका सुरक्षागार्ड रावलले बताए । ‘क्षेत्रीय कार्यालय नेपालगन्जमा यसबारे कुरा भइसकेको छ,’ उनले भने, ‘त्यहाँबाट प्राविधिक आएपछि १/२ दिनमा टावर मर्मतको काम सुरु हुन्छ ।’

प्रकाशित : आश्विन ५, २०७८ ११:३५
प्रतिक्रिया
पठाउनुहोस्

ओमानबाट नेपाली क्रिकेट टोली फर्कियो

कान्तिपुर संवाददाता

काठमाडौँ — ओमान, अमेरिका र नेपाल सम्मिलित त्रिकोणात्मक सिरिज खेलेर नेपाली राष्ट्रिय क्रिकेट टोली मंगलबार स्वदेश फर्किएको छ । युवा खेलाडी बाहुल्यता रहेको टोलीले भ्रमणका चार खेल मध्येका दुई खेलमा जित निकाल्न सफल भयो । साथै आईसीसी विश्वकप क्रिकेट लिग डिभिजन–२ को तालिकामा स्थान सुधारसमेत गरेर फर्किएको छ ।

युवा खेलाडीको प्रदर्शन राम्रो भएको भन्दै कप्तान ज्ञानेन्द्र मल्ल आगामी दिनमा थप अनुभवको जरुरी भएको स्वदेश फर्किएपछि विमानस्थलमा बताए । अल अमिरात क्रिकेट मैदानमा भएको सिरिजको ४ खेलमा नेपालले दुई जित निकाल्दा पहिलो पटक लिग–२ को खेलमा ओमान पराजित गर्दै ऐतिहासिक सफलता पनि पार्‍यो । घरेलु टोलीलाई उसैको मैदानमा पराजित गर्नु टोलीका लागि राम्रो पक्ष भएको नेपाली टोलीका कप्तान ज्ञानेन्द्र मल्लले बताए । युवा खेलाडीमा गरेको लगानीको प्रतिफलको असर विस्तार टोलीमा देखिन थालेको बताए ।

कप्तान मल्लले सिरिजमा अझै राम्रो गर्नका लागि धेरैभन्दा धेरै खेल युवा खेलाडीका लागि खाँचो रहेको थपे । यस्तै, प्रशिक्षक डेभ ह्वाटमोरको छोटो बसाईमा टोलीमा राम्रो छाप परे पनि दीर्घकालीन योजन अनुसार अगाडि बढ्न असर पर्ने कप्तान मल्लले तर्क राखे ।


खेलका ८ खेलमध्ये चारमा सफलता हात पारेको नेपालले तालिकामा दुई स्थान सुधार गर्दै चौथो स्थानमा उक्लिँदा नेपाली युवा खेलाडीको प्रदर्शन तारिफ योग्य रह्यो । यसअघि ओपनिङमा समस्या देखिँदै आएकोमा ओमान भ्रमणमा भने केही सुधारिएको प्रदर्शन नेपाली टोली गर्न सफल भयो । कुशल भुर्तेल र आशिफ शेखले नेपाली टोलीको ओपनिङ इनिङ्लाई सम्हालेका थिए । जसमा दुवै ब्याट्सम्यानले व्यक्तिगत करियरमा भ्रमण सार्थक बनाउन सफल भए । ओपनिङ मध्येका युवा ब्याट्सम्यान कुशल भुर्तेलले रणनीतिक हिसाबमा खेल्दा ओमान भ्रमण व्यक्तिगत र टोलीका लागि राम्रो भएको प्रतिक्रिया दिए ।


यस्तै, राष्ट्रिय टोलीबाट एक दिवसीय खेलमा डेब्युको मौका पाएका विक्रम शोबले पनि भ्रमण व्यक्तिगत करियर र टोलीका लागि राम्रो भएको प्रतिक्रिया दिए । विक्रम शोबले अमेरिकाविरुद्ध डेब्यु गर्दा पाएको पहिलो ओभरको बलिङको पनि पहिलो बलमा विकेट निकाल्न सफल भएका थिए । व्यक्तिगत खेललाई निर्खानका लागि अझै मिहिनेत गर्नुपर्ने उनले बताए ।


विक्रमको अलावा ओमान भ्रमणमा गुल्सन झाले राष्ट्रिय टोलीमा डेब्यू गर्दा कप्तान ज्ञानेन्द्र मल्ल एकदिवसीय अन्तर्राष्ट्रियमा नेपालका लागि सर्वाधिक रन बनाउने खेलाडी बनेका छन् । साथै कप्तान मल्लले एक दिवसीय करिअरमा चार वटा अर्धशतक पनि पूरा गरेका छन् । चार अर्धशतक प्रहार गर्ने पहिलो ब्याट्सम्यान बनेका छन । एक दिवसीय खेलमा पहिलो पटक ओमानविरुद्ध बलिङ गर्दा शरद भेषवाकरले पहिलो विकेट आफ्नो नाममा पनि लेखाए । त्रिकोणात्मक सिरिज अघि नेपाली टोलीले ओमान रहादा पपुवा न्युगिनीविरुद्ध दुई खेलको एकदिवसीय अन्तराष्ट्रिय सिरिज खेलेको थियो । जसमा नेपालले सिरिज क्लिन स्विप गरेको थियो ।

प्रकाशित : आश्विन ५, २०७८ ११:३५
पूरा पढ्नुहोस्
प्रतिक्रिया
पठाउनुहोस्
×