वडाध्यक्षद्वारा सेवाग्राहीलाई डोरीले बाँधेर निर्घात कुटपिट- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

वडाध्यक्षद्वारा सेवाग्राहीलाई डोरीले बाँधेर निर्घात कुटपिट

३ घन्टासम्म बन्धक
भीमबहादुर सिंह

जाजरकोट — जुनीचाँदे गाउँपालिका-२ का वडाध्यक्ष रामबहादुर नेपालीले डोरीले बाँधेर एक युवालाई कुटपिट गरेका छन् । वडाअध्यक्ष नेपालीले मजकोटका १८ वर्षीय सर्पे दमाईलाई डोरीले बाँधेर कुटपिट गरेका हुन् ।

दाजु रमेश दमाईका छोराछोरीको पोषण भत्ता बुझ्‍न गएका सर्पेले वडा कार्यालय मदिरा सेवन गरेर होहल्ला गरेको भन्दै वडाध्यक्ष नेपालीले उनलाई बाँधेर निर्घात कुटपिट गरेका हुन् ।

पोषण भत्ता माग्दा वडा सचिवले बालबालिका लिएर आएपछि मात्र दिने भनेपछि सर्पे र वडासचिवबीच विवाद भएको थियो । सोही विवादको निहुँमा वडाध्यक्ष नेपालीले सर्पेलाई स्थानीय गब्बले तिरुवाको घरको दलानमा डोरीले बाँधेर निर्घात कुटपिट गरी ३ घण्टासम्म बन्दक बनाएका थिए ।

पोषण भत्ता पाउन ढिलाइ भएपछि वडा सचिवसँग वादविवाद गरिरहेको अवस्थामा वडाअध्यक्षले सर्पेलाई लतार्दै वडा कार्यालय नजिकै रहेको गब्बले घरमा लिई डोरीले बाँधेर कुटपिट गरी बन्दक बनाएको स्थानीय जय नाथले बताए । वडा अध्यक्षले सर्पेलाई गत साउन १५ गते बाँधेर कुटपिट गरेका हुन् । वडाध्यक्ष नेपालीले सर्पेलाई डोरीले बाँधेर कुटपिट गरेको भिडियो सामाजिक सञ्जालमा सार्वजनिक भएपछि सर्वत्र विरोध भएको छ ।

वडाअध्यक्ष नेपालीद्वारा डोरीले बाँधेर बन्दक बनाइएका सर्पेलाई ३/४ घण्टापछि इलाका प्रहरी कार्यालय पञ्चालाको प्रहरी टोलीले उद्धार गरेको नाथले बताए । सर्पेलाई बाँधेर कुटपिट गरेपछि वडाअध्यक्ष नेपालीले वडा कार्यालयमा असुरक्षा भयो भन्दै प्रहरीलाई खबर गरेको उनले बताए ।

सरकारी सेवा पाउन वडा कार्यालयमा पुगेका सेवाग्राहीलाई वडाअध्यक्ष जस्तो व्यक्तिले पदको दुरुपयोग गरी मानिसलाई बाँधेर कुटपिट गर्नु गलत भएको पीडितका बाबु रंगे नेपालीले बताए । ‘जनप्रतिनिधिले बाँधेर कुटपिट गर्ने तथा बन्धक बनाउने उल्टै पीडितलाई आगामी दिन गल्ती गर्ने छैन भनी प्रहरीमा कागज गराउनु जस्तो अपराध अरु के हुन सक्छ,’ नेपालीले भने । विकास र समृद्धिका आशामा भोट हालेर निर्विचित बनाएका जनप्रतिनिधिबाटै कुटाइ खानु परेको उनले बताए । छोरालाई बाँधेर कुटपिट नगर्न बारम्बार आग्रह गर्दा पनि वडाअध्यक्ष नेपालीले नमानेर लगातार कुटपिट गरेको उनले बताए ।

अध्यक्ष नेपालीले कुटपिटको विरुद्धमा पीडितलाई प्रहरी समक्ष पुग्न नदिई दबाब दिँदै आएका छन् । मदिरा सेवन गरेर वडा कार्यालयमा जथाभावी बोल्नुको साथै होहल्ला गरेपछि सर्पेलाई नियन्त्रणमा लिएर सम्झाइ बुझाइ मात्र गरेको वडा अध्यक्ष नेपालीले बताए । अध्यक्ष नेपाली २०७४ मा नेकपा एमालेबाट वडा अध्यक्षमा निर्वाचित भएका थिए ।

प्रकाशित : श्रावण २०, २०७८ १४:००
प्रतिक्रिया
पठाउनुहोस्

शिक्षक र कर्मचारीले ७ महिनादेखि तलब पाएनन्

कर्णाली स्वास्थ्य विज्ञान प्रतिष्ठानद्वारा जाजरकोटमा फार्मेसी कार्यक्रमको पठनपाठन बन्द गर्ने तयारी
भीमबहादुर सिंह

जाजरकोट — कर्णाली स्वास्थ्य विज्ञान प्रतिष्ठानअन्तर्गत सञ्चालन भएको ‘डिप्लोमा इन फार्मेसी’ कार्यक्रमका शिक्षक तथा कर्मचारीले ७ महिनादेखि तलब पाएका छैनन् । फार्मेसी कार्यक्रमले शिक्षक र कर्मचारीहरूलाई ७ महिनाको झन्डै ३६ लाख रुपैयाँ तलब भुक्तानी दिन बाँकी छ । 

जाजरकोटस्थित भेरी ज्ञानोदय क्याम्पसमा सञ्चालन भएको ‘डिप्लोमा इन फार्मेसी’ कार्यक्रममा अध्ययनरत विद्यार्थी । तस्बिर : भीमबहादुर/कान्तिपुर 

भेरी ज्ञानोदय क्याम्पसमा २०७६ सालदेखि फार्मेसी कार्यक्रम सञ्चालन गरिएको थियो । उक्त क्याम्पसमा ३१ जना विद्यार्थीले फार्मेसी अध्ययन गरिरहेका छन् । कार्यक्रमका लागि ९ शिक्षक र ४ कर्मचारी भर्ना गरिएको क्याम्पसले जनाएको छ । प्रतिष्ठानले पूर्णकालीन शिक्षकको व्यवस्था गर्न नसकेपछि आंशिकको भरमा कार्यक्रम चलिरहेको शिक्षक जनक केसीले बताए । ‘प्रथम वर्षको कोर्स पूरा गरेर विद्यार्थीले दोस्रो वर्ष प्रवेश गरिसके,’ उनले भने, ‘तर शिक्षक र कर्मचारीले अझै तलब पाएनौं ।’ विद्यार्थीबाट झन्डै ५०/६० लाख शुल्क रकम असुलेर पनि तलब नखुवाउनु प्रतिष्ठानको चरम लापरबाही भएको उनको भनाइ छ ।

फार्मेसी कार्यक्रमका लागि आवश्यक पर्ने बजेटको व्यवस्था गर्न नसक्दा शिक्षक र कर्मचारीलाई तलब भुक्तानी गर्न ढिलाइ भएको प्रिन्सिपल रवीन्द्रकुमार रोकायले बताए । कार्यक्रम सञ्चालन गर्नुअघि आवश्यक बजेट जिल्लाबाटै जुटाउने सहमति भए पनि सरोकारवालाले वास्ता नगर्दा समस्या भएको उनको भनाइ छ । ‘सञ्चालन तथा व्यवस्थापन खर्च र शिक्षक कर्मचारीको तलबलगायत खर्च जिल्लास्तरबाटै व्यहोर्ने गरी जाजरकोटमा डिप्लोमा इन फार्मेसी कार्यक्रम सुरु भएको हो,’ उनले भने, ‘तर विद्यार्थीको शुल्कबाहेक अरू रकम जुट्न सकेन ।’

सम्बन्धित संस्थामा बजेटको व्यवस्था हुन नसकेपछि प्रतिष्ठानमार्फत तलब खुवाउन पहल थालिएको रोकायले बताए । उनका अनुसार विद्यार्थीहरूबाट अहिलेसम्म ५० प्रतिशत मात्र शुल्क लिइएको छ । विद्यार्थीहरूले ३ वर्षे फार्मेसी कार्यक्रम अध्ययनका लागि करिब ४ लाख रुपैयाँ तिर्नुपर्ने उनले जानकारी दिए ।

कर्णाली स्वास्थ्य विज्ञान प्रतिष्ठानले भने जाजरकोटमा फार्मेसी कार्यक्रमको पठनपाठन बन्द गर्ने तयारी गरेको छ । चिकित्सा शिक्षा आयोगले सीटीईभीटीबाहेकका संस्थाले डिप्लोमा फार्मेसीलगायत शैक्षिक कार्यक्रम सञ्चालन गर्न नपाउने नियम बनाएपछि प्रतिष्ठानले उक्त कार्यक्रम बन्द गर्ने तयारी गरेको हो । कार्यक्रम बन्द हुने भएपछि घर छेउमा डिप्लोमा तहको प्राविधिक विषय पढ्न पाउने आशा बोकेका विद्यार्थी निराश बनेका छन् । ‘जाजरकोटमा फार्मेसी कार्यक्रम हात्ती आयो, हात्ती आयो फुस्साजस्तै भयो,’ विद्यार्थी कल्पना बुढाले भनिन्, ‘एक ब्याजबाहेक अरू पढाइ नहुने भएपछि विद्यार्थीलाई मर्का परेको छ ।’

प्रकाशित : असार २९, २०७८ १०:११
पूरा पढ्नुहोस्
प्रतिक्रिया
पठाउनुहोस्
×