यातायातमा मनपरी भाडा- कर्णाली - कान्तिपुर समाचार
कान्तिपुर वेबसाईट
AdvertisementAdvertisement

यातायातमा मनपरी भाडा

हरि गौतम

रुकुम पश्चिम — सदरमुकाम खलंगादेखि सल्यानको श्रीनगरसम्मको भाडा ३ सय रुपैयाँ हो । तर केही दिनदेखि यात्रुले त्यसको तेब्बर भाडा तिर्दै आएका छन् । खलंगादेखि श्रीनगरसम्म जाने यात्रुले अहिले १ हजार रुपैयाँसम्म भाडा तिरेका हुन् । मुसीकोटदेखि झन्डै ३७ किमिको दूरीको रुकुम पूर्वको रुकुमकोट जाने यात्रुलाई पनि ७ सय रुपैयाँ भाडा तिर्नुपर्ने बाध्यता छ । 

रुकुम पश्चिममा सञ्चालन हुने जिपहरू । तस्बिर : हरि/कान्तिपुर

कोरोना महामारीका कारण जिल्लामा निषेधाज्ञा लागेको छ । तर सवारीसाधन चलिरहेका छन् । जिल्लाभित्र चल्ने सवारीसाधनलाई बिनाअनुमति चलाउन भनिएको छ भने बाहिर जाने गाडीले अनुमति लिएर यातायात सेवा सञ्चालन गरिरहेका छन् । कोरोना महामारी र निषेधाज्ञाको बहानामा यात्रुबाट चर्को भाडा असुल्न थालिएको हो । लागेको र तोकिएको भाडाभन्दा बढी भाडा तिर्नुपर्दा विपन्न यात्रु समस्यामा छन् । ‘धेरै दिन घर बस्न सकिन्न रोजीरोटीका लागि पनि बाहिर हिँड्नै पर्‍यो,’ स्थानीय संजोक केसीले भने, ‘तर कोरोना र निषेधाज्ञाको निहुँमा भाडादर निकै महँगो बनाइएको छ ।’ नियमन र अनुगमन नहुँदा यातायात व्यवसायीको मनपरी बढेको उनले बताए ।

स्थानीय प्रशासनको बेवास्ताले यात्रुहरू मर्कामा परेको अर्की यात्रु देउसरा पुनले बताइन् । ‘गाडी चलाउन भनियो तर त्यो कसरी चलिरहेको छ भन्नेबारे कतैबाट अनुगमन भइरहेको छैन,’ उनले भनिन्, ‘लकडाउनले मारमा परेका हामीलाई गाडीघोडाको मार पनि थपिएको छ ।’ धेरै गाडी नचल्ने भएकाले चर्को भाडा तिर्नुपर्ने बाध्यता भएको उनले बताइन् ।

चार महिनाअघि मात्रै जिल्ला यातायात व्यवस्था समितिले नयाँ भाडादर कायम गरेको थियो । प्रमुख जिल्ला अधिकारी बद्रीनाथ गैरेले भाडा चर्को लिएकोबारे गुनासो आएको बताए । ‘हामीकहाँ पनि त्यो गुनासो छ, प्रहरीमार्फत त्यसको निवारण गर्ने प्रयास भइरहेको छ,’ उनले भने, ‘नियमभन्दा बाहिर गएर काम गर्नेलाई कानुनबमोजिम कारबाही हुन्छ ।’ गुनासो आएपछि केही सवारीसाधनलाई कारबाही गरिएको उनले बताए । उनका अनुसार प्रहरीले केही सवारीसाधनबाट जरिवाना लिएको छ भने र केहीलाई यात्रा गर्न नै रोक लगाएको छ ।

यसैबीच, सल्यान प्रहरीले बढी भाडा असुल्ने १० यात्रुबाहक गाडीलाई नियन्त्रणमा लिएको छ । सरकारले तोकेको भन्दा बढी भाडा लिएको र क्षमताभन्दा बढी यात्रु राखेको पाइएपछि सवारीसाधन नियन्त्रणमा लिइएको हो । कोरोना महामारीको फाइदा उठाउँदै यातायात व्यवसायीले बढी भाडा लिएपछि जिल्ला प्रहरीले अनुगमन थालेको थियो । बिहीबार ३ बस, २ जिप, १ भ्यान र ४ अटो रिक्सा नियन्त्रणमा लिइएको जिल्ला प्रहरी प्रमुख डीएसपी गोविन्द थापाले बताए ।

प्रकाशित : श्रावण १, २०७८ ०९:१७
प्रतिक्रिया
पठाउनुहोस्

खोपको प्राथमिकतामा शिक्षक

हरि गौतम

रुकुम पश्चिम — आठबीसकोट नगरपालिकाले खोपको पहिलो प्राथमिकतामा शिक्षकलाई राखेको छ । अरू उमेर समूह र जोखिम समूहमा रहेकाहरूसँगै नगरपालिकाले शिक्षकलाई पनि खोप लगाइरहेको हो । 

छिट्टै विद्यालय सञ्चालन गर्नुपर्ने भएकाले शिक्षकलाई पनि पहिलो प्राथमिकतामै राखेर खोप लगाउने काम भइरहेको नगरपालिकाले जनाएको छ । नगरपालिकामा रहेका झन्डै ४ सय शिक्षकमध्ये आधाले खोप लगाइसकेको स्वास्थ्य संयोजक मणिराज शाहले बताए । उनका अनुसार केहीले दोस्रो मात्राको खोप लगाइसकेका छन् । ‘ज्येष्ठ नागरिकलाई खोपको मात्रा लगभग पूरा भएकाले शिक्षकलाई प्राथमिकतामा राखेका हौं,’ उनले भने, ‘पछिल्लोपटक खोप लगाउनेमा शिक्षककै संख्या बढी छ ।’

नगरपालिकाका अनुसार अहिलेसम्म २ हजार ४ सय ७२ जनाले खोप लाएका छन् । जसमध्ये २ सय ३७ जना शिक्षक छन् । त्यस्तै ६२ उमेर माथिका १ हजार ६ सय ६९ र २ सय ९६ जनप्रतिनिधि, कर्मचारी तथा स्वास्थ्यकर्मीलाई खोप दिइएको छ । २ सय ७० जना व्यवसायी र पत्रकारलाई पनि खोप दिइएको शाहले बताए । उनका अनुसार १ देखि ६ नम्बर वडामा सबै विद्यालयका

सबै शिक्षकले खोप लगाइसकेका छन् । ७ देखि १३ नम्बर वडाका शिक्षकलाई खोप लगाउन अभियान सञ्चालन भइरहेको उनले जानकारी दिए ।

एक सातायता शिक्षकहरूलाई खोप लगाउन विभिन्न वडामा अभियान सञ्चालन गरेको नगरप्रमुख गोर्खबहादुर केसीले बताए । ‘हरेक दिन भीडभाड र धेरैको सम्पर्कमा जाने शिक्षकहरू नै हुन्,’ उनले भने, ‘यसैले शिक्षकलाई प्राथमिकतामा राखेर खोप दिइरहेका हौं ।’ अवस्था सहज हुनबित्तिकै विद्यालय सञ्चालन गर्नुपर्ने भएकाले शिक्षकलाई प्राथमिकतामा राखिएको उनले बताए 

जिल्लाका अन्य ५ स्थानीय तहका शिक्षकले पनि खोपको माग गरिरहेका छन् । नेपाल शिक्षक महासंघ र अन्य संघसंगठनका तर्फबाट शिक्षकलाई खोप नभएसम्मका लागि विद्यालय खोल्न नसकिने भन्दै सरोकारवालालाई ज्ञापनपत्र बुझाइएको छ । विद्यालय खोल्नुपूर्व खोपको विकल्प नभएको बाल कल्याण माविका शिक्षक टोपबहादुर हमालले बताए । ‘भीडभाड भएकै कक्षामा जानुपर्ने भएकाले विद्यार्थी र शिक्षक दुवैबाट एकअर्कालाई कोरोना संक्रमणको जोखिम छ,’ उनले भने, ‘खोपका लागि ध्यान दिनुपर्नेमध्येको एउटा मुख्य क्षेत्र शिक्षा भए पनि बेवास्ता भइरहेको छ ।’

प्रकाशित : असार ३०, २०७८ ०९:३९
पूरा पढ्नुहोस्
प्रतिक्रिया
पठाउनुहोस्
×